நெல்சன் மண்டேலா உடல் நிலை தொடர்ந்து கவலைக்கிடம்

கேப்டவுண்: ஆஸ்பத்திரில் அனுமதிக்கப்பட்டுள்ள நெல்சன் மண்டேலாவின் உடல் நிலை தொடர்ந்து கவலைக்கிடமாக இருப்பதாக அவரை பரிசோதித்த மருத்துவர்கள் தெரிவித்துள்ளனர்.

தென்னாப்பிரிக்க முன்னாள் அதிபரான 94 வயது நெல்சன் மண்டேலா நுரையீரல் நோய்த்தொற்று காரணமாக ஜூன் 8-ம் தேதி பிரிட்டோரியா நகரில் உள்ள மருத்துவமனையில் அனுமதிக்கப்பட்டார்.

கடந்த ஞாயிற்றுக்கிழமை அவரது உடல்நிலை திடீரென மோசமானதைத் தொடர்ந்து, தென்னாப்பிரிக்க அதிபர் ஜேக்கப் ஜூமா, துணை அதிபர் சிரில் ராமபோசா ஆகியோர் அன்று மாலை மண்டேலாவை மருத்துவமனை சென்று பார்த்தனர்.

அதன் பின்னர் அதிபர் ஜூமோ சார்பில் வெளியிடப்பட்ட அறிக்கையில், "மண்டேலாவுக்கு சிகிச்சை அளித்து வரும் மருத்துவக் குழுவினரை அதிபர் ஜேக்கப் ஜூமா சந்தித்து அவரது உடல்நிலை குறித்துக் கேட்டறிந்தார். கடந்த 24 மணி நேரமாக மண்டேலாவின் உடல்நிலை கவலைக்கிடமாகவே உள்ளது என்று மருத்துவக் குழுவினர் தெரிவித்துள்ளனர். அவரது உடல்நிலையில் முன்னேற்றத்தை ஏற்படுத்தத் தேவையான அனைத்து நடவடிக்கைகளையும் டாக்டர்கள் மேற்கொண்டுள்ளனர்' என தெரிவிக்கப்பட்டுள்ளது.

English summary

Former South African President Nelson Mandela remains in a critical condition in hospital, President Jacob Zuma says.