பிரதமர் வேட்பாளராக நரேந்திர மோடியா? ஏற்க முடியாது- மமதா பானர்ஜி, அன்னா ஹசாரே!

By Shankar

Updated: Saturday, July 20, 2013, 11:17 [IST]

Subscribe to Oneindia Tamil

கொல்கத்தா: பிரதமர் வேட்பாளராக குஜராத் முதல்வர் நரேந்திர மோடியை ஏற்க முடியாது என்று திரிணாமுல் காங்கிரஸின் தலைவரும் மேற்கு வங்க முதல்வருமான மமதா பானர்ஜி தெரிவித்துள்ளார். இதேபோல் மோடிக்கு அன்னா ஹசாரேவும் எதிர்ப்பு தெரிவித்துள்ளார்.

மேற்கு வங்க மாநிலத்தில் உள்ளாட்சி தேர்தல் பிரசாரக் கூட்டத்தில் பேசிய மமதா, காங்கிரஸ் தலைமையிலான ஐக்கிய முற்போக்குக் கூட்டணி அரசு கடந்த 9 ஆண்டுகளாக ஆட்சியில் இருந்து வருகிறது. இவ்வளவு நாட்களாக குஜராத் முதல்வர் நரேந்திர மோடி பற்றி பேசாத காங்கிரஸ் தலைவர்கள் இப்போது அவரை கடுமையாக விமர்சிக்கின்றனர்.

காங்கிரசும், நரேந்திர மோடியும் மக்களை ஏமாற்றும் வகையில் நாடகமாடுகின்றனர். ஒரு நாணயத்தின் இரு பக்கங்களாக காங்கிரசும் மோடியும் உள்ளனர். நரேந்திர மோடியின் பேச்சுக்களை கணக்கில் எடுத்துக் கொள்ள முடியாது.

நாட்டை வழி நடத்த முன் வரும் தலைவர் எல்லா தரப்பினராலும் ஏற்றுக் கொள்ளப்பட்ட ஒருவராக இருக்க வேண்டும். அந்த வகையில் நரேந்திர மோடிக்கு பிரதமர் வேட்பாளருக்கான தகுதி இல்லை என்றார் அவர்.

இதனிடையே மோடி மதச்சார்பற்றவர் என்று தாம் ஒருபோதும் புகழாரம் சூட்டவில்லை என்றும் அப்படிச் சொல்வதற்கு என்னிடம் எந்த ஆதாரமும் இல்லையே என்றும் சமூக ஆர்வ்லர் அன்னா ஹசாரே கூறியுள்ளார். அவர் பாரதிய ஜனதா கட்சிக்கு தலைமை ஏற்றால் நிச்சயமாக அது மதவாத சக்தியாகத்தான் இருக்கும். மோடியா? ராகுல் காந்தியா? யார் பிரதமர் என்பதை நாட்டு மக்கள்தான் தீர்மானிப்பார்கள் என்றார்.