அடுத்த ரவுண்டு.. கர்நாடக தேர்தலுக்கான 2ம் கட்ட வேட்பாளர் பட்டியலை வெளியிட்டது பாஜக! இன்னும் இருக்கு
டெல்லி: கர்நாடக சட்டசபைத் தேர்தலுக்கான 2 ஆம் கட்ட வேட்பாளர் பட்டியலை பாஜக வெளியிட்டு உள்ளது. 23 வேட்பாளர்களை கொண்ட வேட்பாளர் பட்டியலை வெளியிட்டு இருக்கும் பாஜக, இன்னும் 12 தொகுதிகளுக்கான வேட்பாளர்களை அறிவிக்கவில்லை.
பசவராஜ் பொம்மை தலைமையிலான கர்நாடகா மாநில பாஜக அரசின் பதவிகாலம் மே மாதத்துடன் முடிவடைய உள்ளது. இதனை அடுத்து அந்த மாநிலத்துக்கான சட்டசபைத் தேர்தல் தேதியை இந்திய தலைமை தேர்தல் ஆணையம் அறிவித்தது. சட்டசபைத் தேர்தலுக்கான வாக்குப்பதிவு மே மாதம் 10 ஆம் தேதியும், மே மாதம் 13 ஆம் தேதி வாக்கு எண்ணிக்கையும் நடைபெற்று முடிவுகள் அறிவிக்கப்பட இருக்கின்றன.
கர்நாடகாவில் ஆட்சியை தக்க வைப்பதற்காக பல்வேறு வியூகங்களை ஆளும் பாஜக கையில் எடுத்து உள்ளது. பிரதமர் நரேந்திர மோடி கர்நாடகாவுக்கு இந்த ஆண்டில் மட்டும் பல முறை பயணம் சென்று பல்வேறு திட்டங்களை தொடங்கி வைத்து இருக்கிறார். மத்திய உள்துறை அமைச்சர் அமித்ஷா, மத்திய அமைச்சர்கள், நாடாளுமன்ற உறுப்பினர்கள் என கட்சியின் பல தலைவர்கள் கர்நாடகாவில் தங்கி பிரச்சாரம் செய்து வருகின்றனர்.
மறுபக்கம் காங்கிரஸ், மதசார்பற்ற ஜனதா தளம் ஆகிய கட்சிகளும் ஆட்சியை பிடிக்க வேண்டும் என்ற முனைப்புடன் தீவிர தேர்தல் பிரச்சாரங்களில் ஈடுபட்டு வருகின்றன. 224 தொகுதிகளை கொண்ட கர்நாடக சட்டமன்ற தேர்தலில், 166 இடங்களில் போட்டியிடும் வேட்பாளர்களின் பட்டியலை காங்கிரஸ் கட்சி ஏற்கனவே வெளியிட்டு அங்கு பிரச்சாரத்தை செய்து வருகிறது.
அதே நேரம் பாஜகவில் நிலவி உட்கட்சி பூசல், ஆளும் கட்சி மீதான அதிருப்தி, எதிர்மறையான கருத்துக்கணிப்புகளின் காரணமாக வேட்பாளர்கள் தேர்வில் அக்கட்சித் தலைமை தீவிர கவனம் செலுத்தி வந்தது. பாஜக தேசிய தலைமையே இதில் நேரடியாக தலையிட்டு வேட்பாளர்கள் தேர்வில் ஈடுபட்டது. நேற்று முந்தினம் பிரதமர் நரேந்திர மோடி, உள்துறை அமைச்சர் அமித்ஷா, பாஜக தேசிய தலைவர் ஜேபி நட்டா தலைமையில் டெல்லியில் கர்நாடக தேர்தல் தொடர்பாக ஆலோசனைக் கூட்டம் நடைபெற்றது.
கர்நாடக முதலமைச்சர் பசவராஜ் பொம்மை, முன்னாள் முதலமைச்சர் எடியூரப்பா, மத்திய அமைச்சர்கள், மாநில நிர்வாகிகள் உள்ளிட்ட பலர் அந்த கூட்டத்தில் கலந்துகொண்டனர். இந்த நிலையில் நேற்று கர்நாடக தேர்தலில் போட்டியிடும் முதற்கட்ட வேட்பாளர் பட்டியலை பாஜக வெளியிட்டு இருந்தது. 189 தொகுதிகளில் போட்டியிடும் வேட்பாளர்களை கொண்ட அந்த பட்டியலில் புதிதாக 52 புதிய வேட்பாளர்களுக்கு பாஜக வாய்ப்பு வழங்கி உள்ளது. இந்த நிலையில் இன்று 23 பேர் கொண்ட 2 ஆம் கட்ட வேட்பாளர் பட்டியலை பாஜக வெளியிட்டு உள்ளது. இன்னும் 12 தொகுதிகளுக்கான வேட்பாளர்களை பாஜக இன்னும் அறிவிக்கவில்லை. மூன்றாம் கட்டமாக அந்த வேட்பாளர்கள் பட்டியல் வெளியாகும் என்று கூறப்படுகிறது.
Click it and Unblock the Notifications
Sign in with Google