‛‛சித்தராமையா வேண்டாம்’’.. கர்நாடகா முதல்வராக டிகே சிவக்குமார்? ஆதரவு தெரிவித்த காங்கிரஸ் எம்எல்ஏ
பெங்களூர்: கர்நாடகா முதல்வராக சித்தராமையாவுக்கு பதில் துணை முதல்வர் டிகே சிவக்குமாரை நியமிக்க காங்கிரஸ் எம்எல்ஏ சிவகங்கா பசவராஜ் ஆதரவு தெரிவித்து பரபரப்பை கிளப்பி உள்ளார்.
கர்நாடகாவில் கடந்த ஆண்டு சட்டசபை தேர்தல் நடந்தது. இதில் பாஜகவை வீழ்த்தி காங்கிரஸ் கட்சி வெற்றி பெற்றது. இதையடுத்து காங்கிரஸ் சார்பில் முன்னாள் முதல்வர் சித்தராமையா மற்றும் கர்நாடகா காங்கிரஸ் தலைவர் டிகே சிவக்குமார் ஆகியோர் இடையே முதல்வர் பதவியை பிடிப்பதில் கடும் போட்டி நிலவியது.
இறுதியாக முதல்வர் பதவி என்பது சித்தராமையாவுக்கு வழங்கப்பட்டது. டிகே சிவக்குமார் துணை முதல்வராக உள்ளார். மேலும் முதல் இரண்டரை ஆண்டுகள் சித்தராமையாவும், அடுத்த இரண்டரை ஆண்டுகள் டிகே சிவக்குமாரும் முதல்வராக பொறுப்பு வகிப்பார்கள் என்றும் கூறப்பட்டு வருகிறது. ஆனால் இதுபற்றி காங்கிரஸ் மேலிடம் இதுவரை எந்த தகவலையும் வெளிப்படையாக கூறவில்லை.
இத்தகைய சூழலில் தான் கெம்பேகவுடா ஜெயந்தி விழாவில் முதல்வர் சித்தராமையா பங்கேற்றார். இந்த விழாவில் ஒக்கலிகா சமுதாயத்தை சேர்ந்த மடாதிபதி சந்திரசேகர சுவாமி பேசினார். அப்போது, டிகே சிவக்குமாருக்காக சித்தராமையா முதல்வர் பதவியை விட்டு தர வேண்டும் என்று கூறினார்.
இதுதொடர்பாக மடாதிபதி சந்திரசேகர சுவாமி பேசும்போது, ‛‛ஒவ்வொருவருக்கும் முதல்வர் ஆகும் உரிமை இருக்கிறது. நம்முடைய டிகே சிவக்குமார் இன்னும் முதல்வர் ஆகவில்லை. சித்தராமையா ஏற்கனவே முதல்வராக இருந்தவர். தற்போதும் முதல்வராக செயல்பட்டு வருகிறது. வரும் காலத்தில் சித்தராமையாக தனது பதவியை டிகே சிவக்குமாரரக்கு விட்டு கொடுக்க வேண்டும். மீண்டும் ஒருமுறை சித்தராமையாவிடம் வேண்டுகோள் வைக்கிறேன். டிகே சிவக்குமாரை முதல்வராக்குங்கள் என்று'' என கூறினார்.
இதுபற்றி சித்தராமையாவிடம் கேட்டபோது, ‛‛முதல்வர் யார் என்பதை கட்சி மேலிடம் தான் முடிவு செய்கிறது. அதனால் இந்த விஷயத்தில் கட்சி மேலிடம் தான் முடிவு செய்யும்'' என்றார். இதையடுத்து தற்போது கர்நாடகா காங்கிரஸில் மீண்டும் முதல்வர் பதவி தொடர்பான விவாதம் சூடுபிடிக்க தொடங்கி உள்ளது. இதுதொடர்பாக டிகே சிவக்குமார் மற்றும் சித்தராமையா தரப்பினர் இடையே கருத்து மோதல் ஏற்பட்டது. இதனால் கர்நாடகாவில் காங்கிரஸார் இரண்டு கோஷ்டிகளாக மோதி வருகின்றனர். இது பெரும் சர்ச்சையான நிலையில் முதல்வர் பதவி பற்றி யாரும் வாய்திறக்க கூடாது என்று டிகே சிவக்குமார் தனது ஆதரவாளர்களுக்கு உத்தரவிட்டார்.
இந்நிலையில் தான் கர்நாடகா முதல்வர் பதவிக்கு சித்தராமையாவுக்கு பதில் துணை முதல்வர் டிகே சிவக்குமாரை நியமிக்க சன்னிகிரி காங்கிரஸ் எம்எல்ஏ சிவகங்கா பசவராஜ் ஆதரவு தெரிவித்துள்ளார். இதுதொடர்பாக சன்னிகிரி காங்கிரஸ் எம்எல்ஏ சிவகங்கா பசவராஜ் கூறுகையி்ல, ‛‛டிகே சிவக்குமாரால் கட்சிக்கு உழைக்கவும், தியாகம் செய்யவும் முடிகிறது. இதனால் தான் காங்கிரஸ் தலைரவாக நியமிக்கப்பட்டார். அவரது பணி அனைவரையும் ஈர்த்துள்ளது. இத்தகைய சூழலில் தேவையின்றி துணை முதல்வர் பதவியை உருவாக்க நினைக்கிறார்கள். என்னை பொறுத்தவரை எத்தனை துணை முதல்வர்களை வேண்டுமானாலும் நியமித்து கொள்ளுங்கள். ஆனால் டிகே சிவக்குமாரை முதல்வராக்க வேண்டும்'' என தெரிவித்துள்ளார். இதனால் மீண்டும் கர்நாடகாவில் முதல்வர் பதவி தொடர்பான விவகாரம் பூதாகரமாகி உள்ளது.
Click it and Unblock the Notifications
Sign in with Google