ஒக்கலிகா கவுடாக்கள் 11 பேருக்கு அமைச்சர் பதவி கேட்ட டிகேஎஸ்- ஆடிப்போன சித்து- அடுத்த லிஸ்ட் எப்போ?

பெங்களூர்: கர்நாடகா காங்கிரஸ் அரசில் ஒக்கலிகா கவுடா ஜாதியின் 11 எம்.எல்.ஏ.க்களுக்கு அமைச்சர் பதவி தர வேண்டும் என துணை முதல்வர் டிகே சிவகுமார் வலியுறுத்தியதால் முதல்வர் சித்தராமையா கடும் அதிர்ச்சி அடைந்தார் என்கின்றன காங்கிரஸ் வட்டாரங்கள்.

கர்நாடகா முதல்வராக சித்தராமையா, துணை முதல்வராக டிகே சிவகுமார், 8 அமைச்சர்கள் நேற்று பதவியேற்றனர். நாடு தழுவிய அளவில் எதிர்க்கட்சித் தலைவர்களின் சங்மமாக இந்த பதவியேற்பு விழா இருந்தது. என்னதான் பதவியேற்பு விழா முடிவடைந்தாலும் சித்தராமையா, டிகேஎஸ் இடையேயான முட்டல் மோதல் தொடரவே செய்கின்றன. அதனால்தான் அமைச்சரவை பட்டியல் முழுமையாக இறுதி செய்யப்படவும் இல்லை என்கின்றன காங்கிரஸ் வட்டாரங்கள்.

உதாரணமாக சில நிகழ்வுகள் குறித்த தகவல்களும் வெளியாகி இருக்கின்றன. முதல்வர் சித்தராமையா தரப்பில் பிகே ஹரிபிரசாத், என்.ஏ.ஹரீஷ் ஆகியோர் அமைச்சரவை பட்டியலில் இடம்பெற கடும் எதிர்ப்பு தெரிவிக்கப்பட்டதாம். டிகேஎஸ் தரப்பி, கிருஷ்ண பைரே கவுடா, தினேஷ் குண்டுராவ், ஜமீர் அகமது கான், எம்பி பாட்டீல், அகமது கான் ஆகியோரை அமைச்சரவையில் சேர்க்க எதிர்ப்பு தெரிவிக்கப்பட்டதாம். ஆகையால் உடனடியாக காங்கிரஸ் மேலிடம் தலையிட்டு அமைச்சரவை பட்டியலை நாங்கள் இறுதி செய்கிறோம் என்றதாம். அதனடிப்படையில்தான் நேற்று அமைச்சரவை பதவியேற்பும் நடந்தததாம்.

இது ஒருபுறம் இருக்க, சித்தராமையா தரப்பைப் பொறுத்தவரையில் மதச்சார்பற்ற ஜனதா தளத்தில் இருந்து தம்முடன் வெளியேறி காங்கிரஸ் இணைந்த சகாக்களுக்கு எப்படியாவது அமைச்சரவையில் இடம் பெற்றுத் தர வேண்டும் என்பதில் முனைப்பு காட்டுகிறாராம். ஆனால் டிகே சிவகுமாரோ, காங்கிரஸ் கட்சி சீனியர்களுக்குதான் முதல் முன்னுரிமை என என்கிறாராம்.

குறிப்பாக தமது இமேஜை பலமடங்கு உயர்த்தும் வகையில் வெற்றி வாய்ப்பை அள்ளித் தந்த தாம் சார்ந்த ஒக்கலிகா கவுடா ஜாதியினர் 11 பேரை அமைச்சராக்க வேண்டும் என்கிறாராம் டிகே சிவகுமார். இப்படி ஒரே ஜாதியை சேர்ந்தவர்களை அமைச்சராக்குவதற்கு பதில் பரந்துபட்ட அளவில் மைனாரிட்டி ஜாதியினருக்கும் கூட அமைச்சர் பதவி கொடுத்தால் வாக்கு வங்கிக்கும் உதவும் என்றாராம் சித்தராமையா. கர்நாடகாவில் மொத்தம் 34 பேர் அமைச்சரவையில் இடம் பெற முடியும். தற்போது 8 பேர் அமைச்சர்களாகி இருக்கின்றனர். எஞ்சிய பட்டியல், இத்தகைய அக்கப்போர்களுக்கு நடுவே வெளியாக உள்ளது.

English summary

Sources said that DK Shivakumar has demanded 11 Ministerial Berths to Vokkaliga Gowda in Cabinet.