மிகப்பெரிய சாதனை! முதல் முறையாக சூரியனின் Full disk படங்களை எடுத்த ஆதித்யா எல்1.. வெளியிட்டது இஸ்ரோ!
பெங்களூர்: ஆதித்யா விண்கலம் எடுத்த சூரியனின் புகைப்படங்களை இஸ்ரோ வெளியிட்டுள்ளது. சூரியனின் முழு வட்டு (Full-disk) புகைப்படங்கள் எடுக்கப்பட்டுள்ளது இதுவே முதன்முறை.
சூரியனின் வளிமண்டலம் மற்றும் வெளிப்புற அடுக்குகளை ஆய்வு செய்ய ஆதித்யா எல்-1 விண்கலம் கடந்த செப்டம்பர் மாதம் ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் ஏவுதளத்தில் இருந்து பிஎஸ்எல்வி-சி57 ராக்கெட் மூலம் விண்ணில் வெற்றிகரமாக செலுத்தப்பட்டு விண்கலம் தனியாக பிரிக்கப்பட்டு பூமியில் இருந்து சுமார் 15 லட்சம் கி.மீ தொலைவில் உள்ள 'லாக்ராஞ்சியன் பாயின்ட் ஒன்' எனும் பகுதியில் பூமியின் சுற்றுவட்டப் பாதையில் நிலைநிறுத்தப்பட்டது.
இந்நிலையில், ஆதித்யா-எல்1 விண்கலத்தில் பொருத்தப்பட்டுள்ள SUIT தொழில்நுட்பக் கருவி, சூரிய அனலில் இருந்து வெளியாகும் புற ஊதாக் கதிர் அலைநீளங்களை முதல்முறையாக படமெடுத்து அனுப்பியுள்ளது. கடந்த 29ஆம் தேதி பதிவான படத்தை கிராப் வடிவில் இஸ்ரோ வெளியிட்டுள்ளது. ஆதித்யா எல்1 அனுப்பிய தரவுகள் சூரிய ஆற்றல் மற்றும் எலக்ட்ரான் குறித்த ஆய்வுகளை மேற்கொள்ள உதவும் என்று இஸ்ரோ தெரிவித்துள்ளது.
அண்மையில் ஆதித்யா விண்கலத்தின் 2-ஆவது ஆய்வுக் கருவி செயல்பாட்டுக்கு வந்தது. இந்த நிலையில் ஆதித்யா விண்கலம் எடுத்த சூரியனின் புகைப்படங்களை இஸ்ரோ இன்று வெளியிட்டுள்ளது. ஆதித்யா விண்கலத்தில் உள்ள புறஊதா கதிர்கள் மூலம் இயங்கும் தொலைநோக்கி இந்த புகைப்படங்களை எடுத்துள்ளது.
அதில், சூரியனை சுற்றியுள்ள குரோமோஸ்பியர் மண்டலத்தை வெவ்வேறு அலைநீளத்தில் படம்பிடித்துள்ளது ஆதித்யா எல் 1. 200 முதல் 400 nm வரையிலான அலைநீளங்களில் சூரியனின் முதல் முழு-வட்டு புகைப்படங்கள் ஆதித்யா எல் 1 மூலம் கிடைக்கப்பெற்றுள்ளன. இந்தப் படங்கள் சூரியனின் ஒளிக்கோளம் மற்றும் குரோமோஸ்பியர் பற்றிய சிக்கலான ஆராய்ச்சிகளுக்கு பெரிய திறப்பை வழங்கும் எனக் கூறப்படுகிறது.
Click it and Unblock the Notifications
Sign in with Google