‛‛சரி.. ரெடியா இருங்க’’.. பாஜக ஆதரவான சுதீப்புக்கு நடிகர் பிரகாஷ் ராஜ் ஓபன் சவால்! கடும் கோபம்
பெங்களூர்: கர்நாடகா சட்டசபை தேர்தலில் நடிகர் சுதீப், பாஜக முதல்வர் பசவராஜ் பொம்மைக்கு ஆதரவு தெரிவித்துள்ளார். இதனை நடிகர் பிரகாஷ் ராஜ் விரும்பவில்லை. இந்நிலையில் தான் நடிகர் சுதீப்புக்கு, நடிகர் பிரகாஷ் ராஜ் ஓபன் சவால் செய்துள்ளது கர்நாடகாவில் பரபரப்பை ஏற்படுத்தி உள்ளது.
கர்நாடகா சட்டசபை தேர்தலில் மே மாதம் 10ம் தேதி நடைபெற உள்ளது. ஓட்டு எண்ணிக்கை மே மாதம் 13ம் தேதி நடைபெற உள்ளது. இந்நிலையில் தான் மீண்டும் ஆட்சியை தக்க வைக்க பாஜக முயன்று வருகிறது. அதேவேளையில் வரும் தேர்தலில் வெற்றி பெற்று இழந்த ஆட்சியை மீட்டெடுக்க காங்கிரஸ் வியூகம் வகுத்து வருகிறது.
இதேபோல் முன்னாள் முதல்வர் எச்டி குமாரசாமியின் ஜேடிஎஸ் மற்றும் அரவிந்த் கெஜ்ரிவாலின் ஆம்ஆத்மி கட்சிகளும் தங்களின் செல்வாக்கை நிரூபிக்க தயாராகி வருகின்றன. இதேபோல் இன்னும் பல கட்சிகள் தேர்தலில் வேட்பாளர்களை களமிறக்கி உள்ளன.
இந்நிலையில் தான் கன்னட திரையுலகில் முன்னணி நடிகராக உள்ள சுதீப், முதல்வர் பசவராஜ் பொம்மைக்கு ஆதரவு தெரிவித்துள்ளார். சுதீப் பாஜகவில் சேர உள்ளதாக தகவல்கள் வெளியான நிலையில் வரும் சட்டசபை தேர்தலில் முதல்வர் பசவாஜ் பொம்மைக்கு ஆதரவு தெரிவித்துள்ளார். இதுதொடர்பாக சுதீப், பசவராஜ் பொம்மையுடன் பத்திரிகையாளர்களை நேற்று முன்தினம் சந்தித்தார்.
அப்போது, ‛‛வரும் சட்டசபை தேர்தலில் எனது ஆதரவை முதல்வர் பசவராஜ் பொம்மைக்கு வழங்க உள்ளேன். அவர் மீது கொண்ட மரியாதை காரணமாக அவரை மாமா என்ற உறவு முறை கூறி அழைத்து வருகிறேன். எனது கஷ்டகாலத்தில் அவர் உதவினார். இதனால் நன்றி மற்றும் மரியாதைக்காக அவருக்கு ஆதரவு தெரிவிக்கிறேன். சட்டசபை தேர்தலில் பசவராஜ் பொம்மை மற்றும் அவரது ஆதரவு கோரும் பாஜக வேட்பாளர்களுக்கு ஆதரவாக பிரசாரம் செய்வேன். நான் பாஜகவில் இணையவில்லை. சட்டசபை தேர்தலில் போட்டியிடவில்லை. பசவராஜ் பொம்மைக்கு ஆதரவு மட்டுமே அளிக்கிறேன். '' என்றார்.
இந்நிலையில் நடிகர் சுதீப்பின் இந்த நடவடிக்கையை நடிகர் பிரகாஷ் ராஜ் விரும்பவில்லை. இதனால் அவர் கோபமடைந்துள்ளனர். இந்நிலையில் நடிகர் பிரகாஷ் ராஜ் தனது ட்விட்டர் பக்கத்தில், ‛‛டியர் சுதீப்.. அனைவராலும் விரும்பப்படும் கலைஞனாக, மக்களின் குரலாக நீங்கள் இருப்பீர்கள் என எதிர்பார்த்தேன். ஆனால் நீங்கள் உங்களுக்கென தனிசாயம் பூச ஒரு அரசியல் கட்சியை தேர்வு செய்துள்ளீர்கள். சரி இருக்கட்டும். பதிலளிக்க தயாராகுங்கள். ஏனென்றால் ஒவ்வொரு மக்களும் உங்களையும், உங்கள் கட்சியையும் பார்த்து கேள்வி எழுப்புவார்கள்'' என தெரிவித்துள்ளார்.
முன்னதாக நடிகர் சுதீப் பாஜகவில் இணைவதாக தகவல் வெளியானது. இதை பார்த்து நடிகர் பிரகாஷ் ராஜ் ஷாக் ஆனார். அதோடு தனது ட்விட்டர் பக்கத்தில் கர்நாடகா சட்டசபை தேர்தலில் தோல்வியின் விளிம்பில் உள்ள பாஜக இதுபோன்ற போலியான செய்திகளை பரப்புகிறது என கூறியிருந்தார். இந்த பதிவை பிரகாஷ் ராஜ் செய்திருந்த அடுத்த நாளே நடிகர் சுதீப் பாஜகவுக்கு ஆதரவு தெரிவிப்பதாக அறிவித்தார் என்பது குறிப்பிடத்தக்கது.
Click it and Unblock the Notifications
Sign in with Google