அச்சு அசல் பாஜக முதல்வர் பசரவாஜ் பொம்மை டூப்ளிகேட்- கர்நாடகாவை அதிர வைக்கும் காங். பிரசார வீடியோ!

பெங்களூர்: கர்நாடகா தேர்தல் களத்தில் காங்கிரஸ் வெளியிட்ட பிரசார வீடியோ பெரும் பரபரப்பை ஏற்படுத்தி வருகிறது. அதுவும் அந்த வீடியோவில் கர்நாடகா பாஜக முதல்வர் பசவராஜ் பொம்மை போலவே ஒருவரை காங்கிரஸ் நடிக்க வைத்திருப்பதுதான் பேசுபொருளாகி இருக்கிறது.

கர்நாடகா சட்டசபை தேர்தல் மே 10-ந் தேதி நடைபெற உள்ளது. மொத்தம் 224 தொகுதிகளுக்கும் ஒரே கட்டமாக தேர்தல் நடத்தப்பட்டு மே 13-ந் தேதி வாக்கு எண்ணிக்கை நடைபெற உள்ளது.

கர்நாடகா சட்டசபை தேர்தல் களத்தில் முன்னெப்போதும் இல்லாத வகையில் கட்சி தாவல்கள் அதிகமாக உள்ளன. குறிப்பாக பாஜகவின் மூத்த தலைவர்கள், சிட்டிங் எம்.எல்.ஏக்கள் அக்கட்சியில் இருந்து வெளியேறி காங்கிரஸ், ஜேடிஎஸ் கட்சிகளில் இணைந்து வருகின்றனர். கர்நாடகா தேர்தல் களமானது காங்கிரஸுக்கு சாதகமாக இருக்கிறது என்கின்றன பெரும்பாலான தேர்தல் கருத்து கணிப்புகள்.

காங்கிரஸ் கட்சியைப் பொறுத்தவரையில் மிகப் பெரும் நம்பிக்கையுடன் இருக்கிறது. மூத்த தலைவர் ராகுல் காந்தியும் தேர்தல் பிரசாரம் மேற்கொண்டிருக்கிறார். இந்த நிலையில் காங்கிரஸ் கட்சியானது ஒரு பிரசார வீடியோவை வெளியிட்டிருக்கிறது. இந்த பிரசார வீடியோதான் கர்நாடகா தேர்தல் களத்தில் இப்போது ஹாட் டாபிக்.

கர்நாடகாவில் ஆளும் பாஜக அரசு, 40% கமிஷன் பெறுகிறது; ஆகையால் மொத்தம் 40 இடங்களை மட்டுமே அந்த கட்சிக்கு வாக்காளர்கள் கொடுக்க வேண்டும் என ராகுல் காந்தி பேசியிருந்தார். இதனை வழிமொழியும் வகையில் 40% கமிஷனில் ஆளும் பாஜக அரசின் முதல்வர் பசவராஜ் பொம்மை மூழ்கி திளைப்பது போல காட்சி அமைப்புடன் இந்த வீடியோ தயாரிக்கப்பட்டிருக்கிறது. இதில் ஹைலேட்டை பசவராஜ் பொம்மை கேரக்டர்தான். அப்படி அச்சு அசலாக முதல்வர் பசவராஜ் பொம்மையை போல இருக்கும் ஒரு நபரை தேடிப் பிடித்து நடிக்க வைத்திருக்கிறது காங்கிரஸ். சமூக வலைதளங்களிலும் இப்படி ஒரு டூப்ளிகேட் பசவராஜ் பொம்மை எப்படி கிடைத்தார் காங்கிரஸுக்கு என்பது நெட்டிசன்களின் கேள்வியாகவும் இருக்கிறது.

English summary

Congress released 40% commission video against BJP ahead of Karnataka Assembly Election 2023.