கோட்டை போனதோ! கொத்தளம் போனதோ! கவுடாக்கள் மட்டுமல்ல முஸ்லிம்களும் மஜதவுக்கு குட்பை சொல்லிவிட்டார்களே!

பெங்களூரு: கர்நாடகா சட்டசபை தேர்தலில் ஒக்கலிகா கவுடாக்களைப் போல முஸ்லிம்களும் மதச்சார்பற்ற ஜனதா தளத்துக்கு இம்முறை பெருமளவு வாக்குகளை அளிக்காமல் போயிருப்பது அக்கட்சித் தலைவர்களை அதிர்ச்சி அடைய வைத்துள்ளது.

கர்நாடகா தேர்தல்களில் மஜதவுக்கு நம்பிக்கை ஆதாரமாக இருப்பவையே ஒக்கலிகா கவுடாக்கள் வாக்குகளும் இஸ்லாமியர் வாக்குகளும்தான். பழைய மைசூரு மண்டலத்தில் இந்த இரு பெரும் சமூகங்களின் வாக்குகளை சிந்தாமல் சிதறாமல் லாவகமாக அறுவடை செய்து வந்தது மஜத. ஆனால் இம்முறை அப்படியே சிந்தாமல் சிதறாமல் காங்கிரஸுக்கு ஓட்டுப் போட்டுவிட்டன இந்த இரு சமூகங்கள்- குறிப்பாக இஸ்லாமியர்கள்.

இதனால் இம்முறை மஜத நிறுத்திய ஒரு முஸ்லிம் வேட்பாளர் கூட வெற்றி பெறவில்லை. 2008-ம் ஆண்டுக்குப் பின் கடந்த 15 ஆண்டுகளில் மஜத ஒரு முஸ்லிம் எம்.எல்.ஏ.வை கூட பெற முடியாத நிலையை இத்தேர்தல் முடிவுகள் உருவாக்கி கொடுத்துவிட்டன. இந்த தேர்தலில் காங்கிரஸ் கட்சி 15 முஸ்லிம் வேட்பாளர்களை நிறுத்தியது. இவர்களில் 9 பேர் வென்றுவிட்டனர். மஜத மொத்தம் 22 முஸ்லிம் வேட்பாளர்களை நிறுத்தியது. ஒருவர் கூட வெல்லவில்லை.

2018-ம் ஆண்டு கர்நாடகா சட்டசபையில் 7 முஸ்லிம் எம்.எல்.ஏக்கள் இருந்தனர். இவர்களில் 5 பேர் காங்கிரஸ், 2 பேர் மஜத. அத்தேர்தலில் மொத்தம் 25 முஸ்லிம்கள் வேட்பாளர்களாக நிறுத்தப்பட்டனர். காங்கிரஸ் 17 முஸ்லிம்களையும் மஜத 8 முஸ்லிம்களையும் வேட்பாளர்களாக நிறுத்தியது. பாஜகவைப் பொறுத்தவரை 2018, 2023 தேர்தல்களில் ஒரு இஸ்லாமியாரை கூட வேட்பாளராக நிறுத்தியதும் இல்லை.

இத்தேர்தலைப் பொறுத்தவரை மஜத, தேர்தலுக்குப் பின் பாஜகவுடன் கூட்டணி அமைக்கக் கூடிய சாத்தியங்களை அத்தலைவர்களை வெளிப்படுத்தி வந்தனர். ஏற்கனவே பாஜக அரசின் மத மாற்ற தடை சட்டம், 4% இடஒதுக்கீடு பறிப்பு உள்ளிட்டவைகளால் கொந்தளித்துக் கொண்ட முஸ்லிம் வாக்காளர்கள் மொத்தமாக காங்கிரஸின் கை சின்னத்துக்கு வாக்குகளை கொட்டித் தீர்த்துவிட்டனர். பழைய மைசூரு என்றுதான் இல்லை.. கடலோர கர்நாடகாவிலும் இதே நிலைமைதான். இம்முறை மஜதவை முஸ்லிம்கள் நம்பி ஏமாறத் தயாராக இல்லை என்பதை அறிவித்துவிட்டனர். அதனால் மஜதவின் அரசியல் எதிர்காலமும் கூட பெரும் கேள்விக்குறியாகிவிட்டதாகவே அரசியல் பார்வையாளர்கள் சுட்டிக்காட்டுகின்றனர்.

English summary

In Karnataka Assembly Election Result, Muslims confident support to Congress, leave from JDS.