என்னாது.. பாஜக - காங்கிரஸ் வாக்கு வித்தியாசம் இவ்ளோதானா.. முழு டேட்டா இதோ.. மஜத நிலையை பாருங்க!

பெங்களூர்: கர்நாடக சட்டமன்ற தேர்தலில் காங்கிரஸ் கட்சி தனிப்பெரும்பான்மையுடன் வெற்றி பெற்று ஆட்சி அமைக்க உள்ளது. கர்நாடகாவில் இழந்த ஆட்சியை காங்கிரஸ் கைப்பற்றிய நிலையில், பாஜக தோல்வியை சந்தித்து ஆட்சியை பறிகொடுத்துள்ளது. கர்நாடக சட்டமன்ற தேர்தலில் கட்சிகள் பெற்ற வாக்கு சதவிகித விவரங்களை பார்க்கலாம்.

கர்நாடக சட்டமன்றத்திற்கு கடந்த மே 10 ஆம் தேதி தேர்தல் நடைபெற்றது. ஒரே கட்டமாக தேர்தல் நடைபெற்ற நிலையில், தேர்தலில் பதிவான வாக்குகள் நேற்று எண்ணப்பட்டன. கர்நாடகாவில் தொங்கு சட்ட சபைக்கு வாய்ப்பு என்று பெரும்பாலான கணிப்புகள் கூறிய நிலையில், அதையெல்லாம் தவிடு பொடியாக்கி காங்கிரஸ் அசத்தல் வெற்றியை பெற்றுள்ளது.

காங்கிரஸ் கட்சி 135 தொகுதிகளில் வெற்றியை பெற்றிருக்கிறது. பெரும்பான்மைக்கு 113 இடங்கள் தேவை என்ற நிலையில், இந்த மேஜிக் எண்ணை காங்கிரஸ் எளிதாக தாண்டிவிட்டது. பாரதிய ஜனதா 65 தொகுதிகளிலும், ஜனதா தளம்(எஸ்) 19 தொகுதிகளிலும் வெற்றி பெற்றுள்ளன. 4 தொகுதிகளில் சுயேச்சை வேட்பாளர்கள் வெற்றி பெற்றுள்ளனர்.

தனிப்பெரும்பான்மையுடன் காங்கிரஸ் கட்சி வெற்றி பெற்றுள்ள நிலையில் இன்று எம்.எல்.ஏக்கள் கூட்டம் நடைபெற உள்ளது. இந்தக் கூட்டத்தில் காங்கிரஸ் கட்சியின் சட்டமன்ற குழு தலைவர் தேர்வு செய்யப்பட இருக்கிறார். புதிய அரசை அமைப்பதற்கான நடவடிக்கைகளில் காங்கிரஸ் கட்சி வேகம் காட்ட தொடங்கி விட்டது.

இதனிடையே கர்நாடக சட்டமன்ற தேர்தலில் கட்சிகள் பெற்ற வாக்கு சதவிகிதங்கள் எவ்வளவு என்ற விவரம் வெளியாகியுள்ளது. கர்நாடகாவில் ஆட்சி அமைக்கும் காங்கிரஸ் கட்சி 42.9 சதவீத வாக்குகளை பெற்றுள்ளது. பாரதிய ஜனதா கட்சி பெற்ற வாக்குகளின் சதவிகிதம் 36 சதவிகிதமாக உள்ளது. மதசார்பற்ற ஜனதா தளம் கட்சி 13.3 சதவீத வாக்குகள் பெற்றுள்ளது.

அரவிந்த் கெஜ்ரிவாலின் ஆம் ஆத்மி கட்சி 0.58 சதவீத வாக்குகள் பெற்றுள்ளது. பி.எஸ்.பி கட்சி 0.31 சதவீத வாக்குகளும் ஓவைசி கட்சி 0.02 சதவீத வாக்குகளும் பெற்றுள்ளது. கர்நாடக சட்டமன்ற தேர்தலில் பாஜக சார்பில் 224 வேட்பாளர்களும், காங்கிரஸ் சார்பில் 223 வேட்பாளர்களும், ஜனதாதளம் (எஸ்) கட்சி சார்பில் 207 வேட்பாளர்களும், ஆம் ஆத்மி கட்சி சார்பில் 217 வேட்பாளர்களும் போட்டியிட்ட்டு இருந்தனர்.

மொத்தமாக 2,430 ஆண்களும், 184 பெண்களும், ஒரு திருநங்கையும் சட்டசபை தேர்தலில் களம் கண்டனர். தேர்தலின் போது 73.19 சதவீத ஓட்டுகள் பதிவாகி இருந்தது. தேர்தலில் 70 ஆயிரத்து 300 வாக்குப்பதிவு எந்திரங்களும், 76 ஆயிரத்து 202 வி.வி.பேட்பயன்படுத்தப்பட்டது. தேர்தலில் பதிவான வாக்குகள் மாநிலம் முழுவதும் 36 மையங்களில் வைக்கப்பட்டது. பலத்த பாதுகாப்புடன் வாக்கு எண்ணிக்கை நடைபெற்று முடிவுகள் அறிவிக்கப்பட்டன.

English summary

The Congress party is going to form the government by winning the Karnataka assembly elections with a single majority. While the Congress has taken over the lost power in Karnataka, the BJP has lost power and lost power. Check the details of the percentage of votes received by the parties in the Karnataka assembly elections.