கார்கே மகனுக்கு நிலம் ஒதுக்கீடு முறைகேடு- கர்நாடகா மாநில தலைமை செயலாளருக்கு ஆளுநர் புது நோட்டீஸ்!
பெங்களூர்: அகில இந்திய காங்கிரஸ் கமிட்டித் தலைவர் மல்லிகார்ஜூன கார்கே மகன் ராகுல் கார்கேவுக்கு விமானவியல் பூங்காவில் சட்டவிரோதமாக நிலம் ஒதுக்கீடு செய்யப்பட்ட விவகாரம் தொடர்பாக விளக்கம் அளிக்க வேண்டும் என கர்நாடகா மாநில அரசின் தலைமைச் செயலாளருக்கு அம்மாநில ஆளுநர் தாவர்சந்த் கெலாட் புதியதாக நோட்டீஸ் அனுப்பி இருப்பது பரபரப்பை ஏற்படுத்தி உள்ளது. ஏற்கனவே முதல்வர் சித்தராமையா மனைவிக்கு நில ஒதுக்கீடு விவகாரத்திலும் ஆளுநர் கெலாட் நோட்டீஸ் அனுப்பி இருந்தார்.
கர்நாடகா மாநில முதல்வர் சித்தராமையா மனைவி பார்வதிக்கு மைசூர் நகர்ப்புற மேம்பாட்டு ஆணையமான மூடா, சட்டவிரோதமாக 14 வீட்டு மனைகளை ஒதுக்கீடு செய்தது என்பது குற்றச்சாட்டு. இதனை முதல்வர் சித்தராமையா திட்டவட்டமாக மறுத்தார்.
ஆனால் இந்த முறைகேடு தொடர்பாக முதல்வர் சித்தராமையா விளக்கம் தர கோரி அம்மாநில ஆளுநர் கெலாட் நோட்டீஸ் அனுப்பியிருந்தார். இந்த நோட்டீஸை திரும்பப் பெற கோரி கர்நாடகா அமைச்சரவை தீர்மானம் நிறைவேற்றியது. பின்னர் முதல்வர் சித்தராமையா மீது வழக்கு தொடரவும் ஆளுநர் கெலாட் அனுமதி கொடுத்தார். இது தொடர்பான வழக்குகள் நீதிமன்றத்தில் நிலுவையில் உள்ளன.
இந்த நிலையில் அகில இந்திய காங்கிரஸ் கமிட்டித் தலைவர் மல்லிகார்ஜூன கார்கேவும் அடுத்த சிக்கலில் சிக்கி இருக்கிறார். கார்கே மகன் ராகுல் கார்கேவுக்கு விமானவியல் பூங்காவில் நிலம் ஒதுக்கீடு செய்யப்பட்டது சட்டவிரோதம் என பாஜக, ஜேடிஎஸ் கட்சிகள் குற்றம்சாட்டின. இது தொடர்பாக ஆளுநர் கெலாட்டை சந்தித்தும் மனு கொடுத்திருந்தன.
இதனைத் தொடர்ந்து மல்லிகார்ஜூன கார்கே மகனுக்கு நிலம் ஒதுக்கப்பட்டது தொடர்பாக விளக்கம் தர வேண்டும் என கர்நாடகா மாநில அரசின் தலைமைச் செயலாளர் ஷாலினி ரஜனீசுக்கு ஆளுநர் கெலாட் புதியதாக நோட்டீஸ் அனுப்பி இருக்கிறார். இது கர்நாடகா அரசியலில் பரபரப்பை கிளப்பி உள்ளது.
இதனிடையே தொழில் நிறுவனங்களுக்கு நிலம் ஒதுக்கீடு செய்ததில் முறைகேடு நடந்துள்ளதால் கர்நாடகா தொழில்துறைஅ மைச்சர் எம்பி பட்டீல் மீதும் வழக்கு தொடர ஆளுநர் கெலாட்டிடம் அனுமதி கோரியுள்ளார் சமூக ஆர்வலர் தினேஷ் கல்லஹள்ளி. இது தொடர்பாகவும் விளக்கம் தர வேண்டும் எனவும் தலைமைச் செயலாளருக்கு ஆளுநர் கெலாட் மற்றொரு நோட்டீஸ் அனுப்பி உள்ளார்.
Click it and Unblock the Notifications
Sign in with Google