"உக்கிர" தமிழ்நாடு! திடுதிப்பென வினாடிக்கு 7,973 கன அடி காவிரி நீரை திறந்துவிட்ட கர்நாடகா-பாஜக ஷாக்!

பெங்களூர்: காவிரியின் குறுக்கே கட்டப்பட்ட அணைகளில் இருந்து தமிழ்நாட்டுக்கு வினாடிக்கு 7,973 கன அடி நீரை கர்நாடகா திடீரென திறந்துவிட்டுள்ளது ஆச்சரியத்தை ஏற்படுத்தி உள்ளது.

காவிரியின் குறுக்கே கர்நாடகா அணைகள் கட்டியதால் தமிழ்நாட்டின் உரிமை பறிபோனது. ஒவ்வொரு முறையும் தமிழ்நாட்டுக்கான காவிரி நீரை கர்நாடகாவிடம் கெஞ்சிப் பெறும் நிலைதான் உள்ளது.

தூண்டிவிட்ட பாஜக: காவிரியில் தமிழ்நாட்டுக்கான உரிய நீரை திறந்துவிட காவிரி மேலாண்மை ஆணையம் உத்தரவிட்டது. இதனை உச்சநீதிமன்றமும் உறுதி செய்தது. ஆனால் கர்நாடகா மாநில பாஜக, மதச்சார்பற்ற ஜனதா தள அரசுகள் ஆளும் காங்கிரஸ் அரசுக்கு நெருக்கடி தருவதற்காக கன்னட விவசாய அமைப்புகள், கன்ன அமைப்புகளை தூண்டிவிட்டன. தமிழ்நாட்டுக்கு சொட்டு நீரையும் தரக் கூடாது என மண்டியா பந்த், பெங்களூர் பந்த், கர்நாடகா பந்த் என பல போராட்டங்கள் நடத்தப்பட்டன. மண்டியாவில் ஒன்றரை மாதங்களாக நாள்தோறும் போராட்டங்கள் நடத்தப்படுவதால் காவிரியில் தமிழ்நாட்டுக்கான நீரை தர கர்நாடகா மறுத்து சொற்ப நீரை திறந்துவிட்டது.

தமிழ்நாடு சட்டசபை தீர்மானம்: இதனிடையே தமிழ்நாடு சட்டசபையில் காவிரி பிரச்சனையை முன்வைத்து மத்திய அரசை வலியுறுத்தி ஒருமனதாக தீர்மானம் நேற்று நிறைவேற்றப்பட்டது. இத்தீர்மானம் நிறைவேற்றப்பட்ட நிலையில் கர்நாடகா அரசு அதிரடியாக ஒரு நடவடிக்கை மேற்கொண்டதுதான் ஆச்சரியத்தை ஏற்படுத்தி உள்ளது.

கூடுதல் நீர் திறப்பு: தமிழ்நாட்டுக்கான காவிரி நீரை தடுத்து வைத்துள்ள கிருஷ்ணராஜ சாகர், கபினி ஆகிய அணைகளில் இருந்து மொத்தம் 7,973 கன அடி நீரை தமிழ்நாட்டுக்கு நேற்று கர்நாடகா திறந்துவிட்டுள்ளது. அதற்கு முந்தைய நாள் வினாடிக்கு 4,719 கன அடிநீரைத்தான் கர்நாடகா திறந்தது. தற்போது கிருஷ்ணராஜ சாகர் அணையில் இருந்து வினாடிக்கு 5,973, கபினி அணையில் இருந்து 2,000 கன அடி நீரை கர்நாடகா திறந்துவிட்டுள்ளது.

அணைகள் நீர் வரத்து: கடந்த வாரம் கிருஷ்ணராஜ சாகர் அணையில் இருந்து வினாடிக்கு 2,000 கன அடிக்கும் குறைவான நீரை கர்நாடகா திறந்துவிட்டது. தற்போது கிருஷ்ணராஜ சாகர் அணைக்கு வினாடிக்கு 3,503 கன அடிநீர் வரத்து உள்ளது. கபினி அணைக்கு வினாடிக்கு 1,261 கன அடிநீர் வரத்து உள்ளது.

கேஆர்எஸ் அணை நீர் மட்டம்: கர்நாடகாவின் கிருஷ்ணராஜ சாகர் அணையில் தற்போது அணையின் நீர் மட்டம் 101.22 அடியாக உள்ளது. கபினி அணை நீர்மட்டம் 57.51 அடியாக உள்ளது. காவிரி நீர் வந்து சேரும் தமிழ்நாட்டின் மேட்டூர் அணை நீர் மட்டம் வெறும் 31.3 அடிதான் உள்ளது.

English summary

Karnataka Govt increased the release of the Cauvery Water to Tamilnadu from Monday.