வரிப் பங்கீட்டில் வஞ்சகம்: தமிழகம் போலவே மத்திய பாஜக அரசுக்கு எதிராக கலகக் குரல் எழுப்பும் கர்நாடகா!

பெங்களூர்: மத்தியில் ஆளும் பாஜக தலைமையிலான தேசிய ஜனநாயகக் கூட்டணி அரசு மாநிலங்களுக்கான வரிப் பகிர்வில் தொடர்ந்து பாரபட்சம் காட்டுகிறது; தென்னிந்திய மாநிலங்கள் அனைத்துக்குமான மொத்த வரிப் பகிர்வை விட எப்போதும் உத்தரப்பிரதேச மாநிலத்துக்கு கூடுதல் வரிப் பங்கீடு செய்கிறது என்பது தமிழ்நாட்டின் கலகக் குரலாக இருந்து வருகிறது. தற்போது கர்நாடகா மாநில அரசும் மத்திய பாஜக அரசின் வரிப் பங்கீட்டு வஞ்சகத்துக்கு எதிராக கலகக் குரல் எழுப்பி இருக்கிறது.

மத்திய அரசு அண்மையில் வரி வருவாயில் இருந்து மாநில அரசுகளுக்கான வரிப் பகிர்வாக ரூ.1,78,173 கோடியை விடுவித்தது. 2024 அக்டோபரில் வழங்கவேண்டிய வழக்கமான தவணையுடன் கூடுதலாக முன்கூட்டிய தவணையான ரூ. 89,086.50 கோடியும் இதில் அடங்கும்; தமிழ்நாட்டுக்கு ரூ.7,268 கோடி விடுவிக்கப்பட்டுள்ளது என தெரிவித்திருந்தது.

இந்த வரிப் பங்கீட்டில் உத்தரப்பிரதேசத்துக்கு மட்டும் அதிகமான வரிப் பகிர்வாக ரூ31,962 கோடி விடுவித்திருந்தது மத்திய அரசு. தமிழ்நாடு உட்பட 5 தென் மாநிலங்களுக்கு ஒதுக்கப்பட்ட வரிப் பகிர்வின் மொத்த தொகையையும் விடவும் இது மிகவும் கூடுதலானது.

தென் மாநிலங்களுக்கான வரிப் பங்கீடு: ஆந்திரா -ரூ. 7,211 கோடி கர்நாடகா - ரூ. 6,498 கோடி தமிழ்நாடு- ரூ. 7,268 கோடி தெலுங்கானா- ரூ. 3,745 கோடி கேரளா ரூ. 3,430 கோடி என தெரிவித்திருந்தது மத்திய அரசு. 5 தென் மாநிலங்களுக்கும் சேர்த்து மொத்தமான வரிப் பகிர்வு ரூ.28,152 கோடிதான். இந்த தொகையை விட கூடுதலாக உத்தரப்பிரதேச மாநிலத்துக்கு மட்டும் வழங்கி இருந்தது மத்திய பாஜக அரசு.

மத்திய பாஜக அரசின் இந்த வரிப் பங்கீட்டு வஞ்சகத்துக்கு எதிராக தமிழ்நாடு தொடர்ந்து குரல் கொடுத்து வருகிறது. இதேபோல கர்நாடகா முதல்வர் சித்தராமையாவும் இந்த ஓரவஞ்சனைக்கு எதிராக குரல் கொடுத்துள்ளார். பெலகாவியில் நேற்று செய்தியாளர்களிடம் பேசிய சித்தராமையா, என்னை பதவி விலக வேண்டும் என சொல்கிறது பாஜக. ஆனால் கர்நாடகா மாநிலத்துக்கு வெறும் ரூ6,498 கோடியைத்தான் மத்திய பாஜக அரசு ஒதுக்கீடு செய்துள்ளது. உத்தரப்பிரதேசத்துக்கு மட்டும் 5 மடங்கு கூடுதலாக வரிப் பங்கீடு வழங்கப்பட்டுள்ளது. இது பற்றி பாஜகவினர் ஏன் வாய் திறப்பது இல்லை எனவும் சித்தராமையா கேள்வி எழுப்பி இருக்கிறார்.

English summary

Karnataka joined hands with Tamil Nadu in Protesting Against Union Govt's Tax Revenue Allocation to the States.