கர்நாடகாவில் காங்கிரஸ் படுதோல்வி.. மொத்தமாக அள்ளிய பாஜக! அதிர்ச்சியில் டிகே சிவக்குமார் அரசு
பெங்களூர்: கர்நாடக சட்ட மேலவை தேர்தலில் ஆளும் காங்கிரஸ் கட்சிக்கு ஒரு இடம்கூட கிடைக்கவில்லை. மொத்தமுள்ள 4 இடங்களையும் பாஜக தலைமையிலான என்டிஏ கூட்டணி கைப்பற்றியுள்ளது. இதில் பாஜக 3 இடங்களிலும், அதன் கூட்டணி கட்சியான மதச்சார்பற்ற ஜனதா தளம் ஒரு இடத்திலும் வெற்றி பெற்றுள்ளன. இது ஆளும் கர்நாடக காங்கிரஸுக்கு பெரும் அதிர்ச்சியை ஏற்படுத்துவதாகவே உள்ளது.
நமது அண்டை மாநிலமான கர்நாடகாவில் இப்போது டிகே சிவக்குமார் தலைமையிலான காங்கிரஸ் ஆட்சி நடந்து வருகிறது. அங்கு பல்வேறு காரணங்களால் மக்கள் காங்கிரஸ் ஆட்சி மீது அதிருப்தியில் இருப்பதாக சொல்லப்பட்டது. அதை உறுதி செய்யும் வகையிலேயே இப்போது கர்நாடக சட்ட மேலவை தேர்தல் முடிவுகள் அமைந்துள்ளன.
காங்கிரஸ் படுதோல்வி
கடந்த அக்டோபர் 23ம் தேதி நடைபெற்ற ஆசிரியர்கள் மற்றும் பட்டதாரிகளுக்கான சட்ட மேலவை தொகுதிகளின் தேர்தல் முடிவுகள், கர்நாடக அரசியலில் கவனம் பெற்றுள்ளன. ஆசிரியர்கள் மற்றும் பட்டதாரிகள் வாக்களிக்கும் இந்த தேர்தலில் ஆளும் காங்கிரஸுக்கு மிக பெரிய அதிர்ச்சி காத்திருந்துள்ளது. மொத்தம் 4 இடங்களுக்கு தேர்தல் நடந்த நிலையில், அதில் வடகிழக்கு ஆசிரியர் தொகுதி, தென்கிழக்கு பட்டதாரிகள் தொகுதி, மேற்கு பட்டதாரிகள் தொகுதி என 3 இடங்களில் பாஜக வெற்றி பெற்றது. பெங்களூர் ஆசிரியர் தொகுதியை ஜேடிஎஸ் கைப்பற்றியது.
பாஜக பாய்ச்சல்
இந்த வெற்றியைத் தொடர்ந்து, கர்நாடகாவில் ஆளும் காங்கிரஸ் அரசை பாஜக கடுமையாக விமர்சித்துள்ளது. இது தொடர்பாக பாஜக தலைவர் அசோக் கவுடா, "இந்த வெற்றி என்டிஏ கூட்டணிக்கு கிடைத்த வெற்றி. மக்களிடையே காங்கிரஸ் தனது செல்வாக்கை இழந்துவிட்டதையே இது காட்டுகிறது. மேலும், கர்நாடகாவில் காங்கிரஸ் அரசு முழுமையாக தோல்வி அடைந்துவிட்டது. மக்கள் காங்கிரஸ் அரசை விரும்பவில்லை என்பதையே தேர்தல் முடிவுகள் காட்டுகிறது.
வரவிருக்கும் பெங்களூர் மாநகராட்சி தேர்தலிலும் இதே முடிவுகள் தான் வரப்போகிறது. மக்களிடம் காங்கிரஸுக்கு ஆதரவு இல்லை. உண்மைக்கு புறம்பான தகவல்களை பரப்புவதிலேயே அக்கட்சி கவனம் செலுத்துகிறது. அதற்கு பரிசாகவே மக்கள் இந்த தோல்வியை கொடுத்துள்ளனர்" என்றார்.
வென்றது யார்?
வடகிழக்கு ஆசிரியர் தொகுதியில் பாஜக சார்பில் மீண்டும் போட்டியிட்ட தற்போதைய மேலவை உறுப்பினர் ஷஷில் ஜி. நமோஷி வெற்றி பெற்றார். காங்கிரஸ் வேட்பாளர் ஷரணப்பா மட்டூரை அவர் தோற்கடித்தார். இந்த தொகுதியில் நமோஷி வெற்றி பெறுவது இது ஐந்தாவது முறையாகும். காங்கிரஸ் தேசிய தலைவர் மல்லிகார்ஜுன கார்கேவின் சொந்த மாவட்டமான கலபுரகியும் இந்த தொகுதியில் இடம்பெற்றுள்ளது.
தென்கிழக்கு பட்டதாரிகள் தொகுதியில் பாஜகவின் கே.எம். சுரேஷ், காங்கிரஸ் வேட்பாளர் ஷஷி ஹுலிகுண்டே முத்தை தோற்கடித்தார். மேற்கு பட்டதாரிகள் தொகுதியில் பாஜகவின் எஸ்.வி. சங்கனூர், காங்கிரஸ் வேட்பாளர் மோகன் லிம்பிகையை வீழ்த்தினார். பெங்களூரு ஆசிரியர் தொகுதியில் ஜேடிஎஸ் வெற்றி பெற்றது.
இருப்பினும், இந்த தேர்தல் முடிவுகளை மட்டுமே வைத்து கர்நாடகாவில் காங்கிரஸ் அரசுக்கு சிக்கல் என சொல்லிவிட முடியாது. சட்ட மேலவை முடிவுகள் அப்படியே சட்டசபை தேர்தலிலும் எதிரொலிக்கும் என்று அவசியம் இல்லை. அதேநேரம் இந்த தேர்தல் முடிவுகளை வைத்து, காங்கிரஸ் அரசு மீதான விமர்சனங்களை பாஜக அதிகரிக்கும்.
கர்நாடக சட்ட மேலவை
75 உறுப்பினர்களை கொண்ட கர்நாடக சட்ட மேலவையில் தற்போது காங்கிரஸுக்கு 38 உறுப்பினர்களும், பாஜகவுக்கு 24 உறுப்பினர்களும், ஜேடிஎஸ்ஸுக்கு 6 உறுப்பினர்களும் உள்ளனர். ஒரு சுயேச்சை உறுப்பினரும் அவை தலைவரும் உள்ளனர். அரசு நியமனம் செய்ய வேண்டிய 5 இடங்கள் காலியாக உள்ளன. இந்த காலியிடங்கள் நிரப்பப்படும்போது காங்கிரஸின் பலம் மேலும் அதிகரிக்க வாய்ப்புள்ளது.
Click it and Unblock the Notifications
Sign in with Google
