பிரஜ்வல் கேஸ்- தேவகவுடாவின் ஜேடிஎஸ் கட்சியை கூட்டணியை விட்டு கழுத்தை பிடித்து வெளியே தள்ளும் பாஜக?
பெங்களூர்: 300 பெண்களை நாசமாக்கி 3,000 ஆபாச வீடியோக்கள் எடுத்த ஜேடிஎஸ் எம்பி பிரஜ்வல் ரேவண்ணாவால் பாஜக தலைமையிலான தேசிய ஜனநாயகக் கூட்டணிக்கு கடும் நெருக்கடி ஏற்பட்டுள்ளது. இதனால் ஜேடிஎஸ் கட்சியை கூட்டணியில் இருந்து பாஜக வெளியேற்றக் கூடும் என கூறப்படுகிறது.
பிரஜ்வல் ரேவண்ணா விவகாரத்தில் 3,000 ஆபாச வீடியோக்களை வெளியிட்டது யார் என்பது தொடர்பாக பாஜக- காங்கிரஸ் இடையே தொடர்ந்து மோதல் நீடிக்கிறது. பிரஜ்வல் ரேவண்ணாவின் ஓட்டுநர் கார்த்திக் கவுடா, தாம் பிரஜ்வல் ரேவண்ணாவின் 2976 வீடியோக்களுடன் கூடிய பென் டிரைவ்வை பாஜகவின் தேவராஜ் கவுடாவிடம் ஒப்படைத்தேன் என்கிறார். இதை தேவராஜ் கவுடாவும் மறுக்கவில்லை. ஆனால் தாம் பொதுவெளியில் இருந்த வீடியோக்களை வெளியிடவே இல்லை என்கிறார் தேவராஜ் கவுடா. காங்கிரஸ் தலைவர்களுடன் நெருக்கமாக இருந்தார் கார்த்திக் கவுடா; காங்கிரஸ் கட்சியினரே இந்த வீடியோக்களை வெளியிட்டனர் என்கிறார் தேவராஜ் கவுடா. முன்னாள் முதல்வர் குமாரசாமியும் இதே குற்றச்சாட்டை முன்வைக்கிறார். ஆனால் துணை முதல்வர் டிகே சிவகுமார் உள்ளிட்டோர் இதனை திட்டவட்டமாக மறுக்கின்றனர்.
மேலும் பிரஜ்வல் ரேவண்ணா விசா இல்லாமல், தூதரக பாஸ்போர்ட் மூலம் வெளிநாட்டுக்கு தப்பிய விவகாரத்திலும் மத்திய பாஜக அரசு மீது கர்நாடகா காங்கிரஸ் அரசு குற்றம் சாட்டுகிறது. இதனை மத்திய அரசும் மறுத்து வருகிறது.
இந்த நிலையில், ஹாசன் தொகுதியில் பிரஜ்வல் ரேவண்ணா வென்றாலும் எம்பி பதவியை பறிப்போம் என்கிறார் கர்நாடகா சட்டசபை எதிர்க்கட்சித் தலைவரான பாஜகவின் அசோகா (அசோக்). அதேநேரத்தில் ஜேடிஎஸ் கட்சியை கூட்டணியில் இருந்து வெளியேற்றப் போகிறதா? என்கிற கேள்விக்கு அசோக் நேரடியாக பதில் தரவில்லை. இது தொடர்பாக அசோக் கூறுகையில், ஜேடிஎஸ் கட்சியுடனான கூட்டணியை முடிவு செய்தது கர்நாடகா பாஜக இல்லை; தேசிய அளவில்தான் கூட்டணி குறித்து முடிவு செய்யப்பட்டது. இதனால் ஜேடிஎஸ் கட்சியை பாஜக தலைமையிலான தேசிய ஜனநாயகக் கூட்டணியில் இருந்து வெளியேற்றுவது குறித்து கட்சி மேலிடமே முடிவெடுக்கும் என்கிறார்.
ஏற்கனவே ஜேடிஎஸ் கட்சியில் இருந்து 12 எம்.எல்.ஏக்கள் கூண்டோடு காங்கிரஸுக்கு தாவப் போவதாக தகவல்கள் வெளியாகி பரபரப்பை ஏற்படுத்திய நிலையில் கூட்டணியில் இருந்தே ஜேடிஎஸ் கட்சியை பாஜக வெளியேற்றும் என்கிற தகவல் கர்நாடகா அரசியலில் கூடுதல் பரபரப்பை ஏற்படுத்தி உள்ளது.
Click it and Unblock the Notifications
Sign in with Google