கர்நாடகா பாஜகவுக்கு கடும் ஜூரம்.. காங்கிரஸுக்கு தாவும் மாஜி முதல்வர் சதானந்த கவுடா?

பெங்களூர்: கர்நாடகா முன்னாள் முதல்வர் சதானந்த கவுடா, பாஜகவில் இருந்து விலகி காங்கிரஸ் கட்சியில் இணைய இருப்பதாக தகவல்கள் வெளியாகி உள்ளன.

கர்நாடகாவில் பாஜகவின் முகங்களில் ஒருவராக இருந்தவர் சதானந்த கவுடா. பாஜகவில் பல்வேறு பொறுப்புகளை வகித்தவர். மத்திய அமைச்சராகவும் பதவி வகித்தார். 2006-ல் கர்நாடகா பாஜக தலைவராகவும் பதவி வகித்தார் சதானந்த கவுடா. 2011-ல் கர்நாடகா முதல்வராகவும் பதவி வகித்தவர் சதானந்த கவுடா. பிரதமர் மோடியின் அமைச்சரவையில் அடுத்தடுத்து பல பொறுப்புகளை வகித்தார்.

ஆனால் வயது மூப்பு உள்ளிட்ட காரணங்களால் மத்திய அமைச்சர் பதவியில் இருந்து சதானந்த கவுடா நீக்கப்பட்டார். இந்த நிலையில் பெங்களூர் வடக்கு லோக்சபா தொகுதியில் போட்டியிட விரும்பினார் சதானந்த கவுடா. ஆனால் பாஜக மேலிடமோ அவருக்கு சீட் தர மறுத்துவிட்டது. இதனால் கடும் அதிருப்தி அடைந்துள்ளார் சதானந்த கவுடா.

பாஜகவில் கடும் அதிருப்தியில் இருக்கும் சதானந்த கவுடாவுடன் கர்நாடகாவில் ஆளும் காங்கிரஸ் அரசின் துணை முதல்வர் டிகே சிவகுமார் பேச்சுவார்த்தை நடத்தினார். இந்தப் பேச்சுவார்த்தைகளைத் தொடர்ந்து சதானந்த கவுடா, காங்கிரஸுக்கு தாவ இருப்பதாக கூறப்படுகிறது. காங்கிரஸுக்கு தாவும் சதானந்த கவுடா, பெங்களூர் வடக்கு லோக்சபா தொகுதி அல்லது மைசூர் தொகுதி வேட்பாளராகவும் அறிவிக்கப்படக் கூடும் எனவும் தகவல்கள் தெரிவிக்கின்றன.

இது தொடர்பாக சதானந்த கவுடா கூறுகையில், பாஜகவில் இருந்து விலகி காங்கிரஸில் இணைய அழைப்பு விடுக்கப்பட்டிருப்பது உண்மைதான். என் குடும்பத்தினருடன் ஆலோசனை நடத்தி முடிவை அறிவிக்க இருக்கிறேன். லோக்சபா தேர்தலில் சீட் மறுக்கப்பட்டவர்கள் பாஜக தலைமையுடன் பேச முயற்சித்தோம். ஆனால் அது நடக்கவில்லை. லோக்சபா தேர்தலில் சீட் மறுக்கப்பட்ட ஈஸ்வரப்பா சுயேட்சையாக போட்டியிடுவது அவரது தனிப்பட்ட முடிவு என்றார்.

முன்னதாக கடந்த ஆண்டு நவம்பர் மாதம் தாம் தேர்தல் அரசியலில் இனி பங்கேற்க போவது இல்லை; 2024 லோக்சபா தேர்தலிலும் போட்டியிடப் போவதில்லை என அறிவித்திருந்தார் சதானந்த கவுடா. அப்போது கூட பாஜகவில் இருந்து விலகுவதாகவோ அதிருப்தியில் இருப்பதாகவோ சதானந்த கவுடா தெரிவிக்கவில்லை என்பதும் குறிப்பிடத்தக்கது.

English summary

Former Karnataka Chief Minister DV Sadananda Gowda may quit from BJP.