தப்பிக்குமா பெங்களூர்? கர்நாடகாவில் 5 நாட்கள் கொட்டப்போகும் கனமழை.. வானிலை மையம் வார்னிங்
பெங்களூர்: கர்நாடகாவில் ஆகஸ்ட் 26ம் தேதி முதல் ஆகஸ்ட் 30ம் தேதி வரை பல மாவட்டங்களில் கனமழை பெய்யும் என்று இந்திய வானிலை ஆய்வு மையம் தெரிவித்துள்ளது. மேலும் பெங்களூர் வானிலை நிலவரம் குறித்து முக்கிய அப்டேட்டும் வழங்கப்பட்டுள்ளது.
கர்நாடகாவில் சில இடங்களில் தற்போது மழை பெய்து வருகிறது. கர்நாடகா - மகாராஷ்டிரா எல்லையோர மாவட்டங்கள், கடலோர மாவட்டங்களில் மழை பெய்து வருகிறது. ஆனால் பெங்களூரில் எதிர்பார்த்த அளவுக்கு மழை பெய்யவில்லை. அவ்வப்போது லேசாக சாரல் மழை மட்டுமே பெய்து வருகிறது.
நேற்று முன்தினம் இரவு பெங்களூர் புறநகர் மாவட்டங்களில் பல இடங்களில் கனமழை பெய்தது. சாலைகளில் மழை நீர் பெருக்கெடுத்து ஓடியது. இதற்கிடைய தான் கர்நாடகாவில் அடுத்த 5 நாட்கள் கனமழை பெய்ய உள்ளதாக இந்திய வானிலை ஆய்வு மையம் தெரிவித்துள்ளது.
இதுதொடர்பாக வெளியிடப்பட்டுள்ள செய்திக்குறிப்பில், ஆகஸ்ட் 26ம் தேதி முதல் கடலோர கர்நாடகா, மேற்கு தொடர்ச்சி மலை மாவட்டங்கள் மற்றும் வடகர்நாடகா மாவட்டங்களில் கனமழை பெய்ய உள்ளது. ஆகஸ்ட் 26ம் தேதி தட்சிண கன்னடா, உடுப்பி, உத்தர கன்னடா மாவட்டங்களில் கனமழை பெய்யும் வாய்ப்பு உள்ளது.
அதன்படி உத்தர கன்னடா, உடுப்பி, தட்சின கன்னடா, ஹாசன், சிவமொக்கா, குடகு, சிக்கமகளூர், பெலகாவி மற்றும் விஜயாப்புரா மாவட்டங்களில் மழைக்கான மஞ்சள் எச்சரிக்கை (எல்லோ அலர்ட்) விடுக்கப்பட்டுள்ளது. அதேபோல் பீதர், கலபுரகி மற்றும் யாதகிரியில் மணிக்கு 40-50 கிலோமீட்டர் சூறைக்காற்றுடன் மழை பெய்ய வாய்ப்புள்ளது.
மேலும் கொப்பல் ராய்ச்சூர், ஹாவேரி மாவட்டங்களில் கனமழை வாய்ப்புள்ளதாக வானிலை ஆய்வு மையம் தெரிவித்துள்ளது. மேலும் தார்வார், கதக், தாவணகெரே, ஹாவேரி மாவட்டங்களிலும் கனமழை பெய்ய வாய்ப்புள்ளது. விஜயநகர், துமகூரு, ராமநகர், மைசூர், மண்டியா, கோலார், சிக்கபள்ளாப்புரா, சாம்ராஜ்நகர், பெங்களூர் புறநகர், பெங்களூர் சிட்டி உள்ளிட்ட இடங்களிலும் கனமழை பெய்யும் என தெரிவிக்கப்பட்டுள்ளது.
இருப்பினும் பெங்களூரை எடுத்து கொண்டால் பெரிய அளவில் மழை இருக்காது எனவும், மாலை நேரங்களில் மட்டும் மழைக்கு வாய்ப்பு இருக்கும் என்றும் கணிக்கப்பட்டுள்ளது. பெங்களூர் நகரில் அதிகபட்ச வெப்பநிலை 27 டிகிரி செல்சியஸாகவும், குறைந்தபட்ச வெப்பநிலை 19 டிகிரி செல்சியஸாகவும் இருக்கும் எனவும் தெரிவிக்கப்பட்டுள்ளது.
Click it and Unblock the Notifications
Sign in with Google