மத மோதலை உருவாக்கும் பாஜக உடன் கூட்டணியா? எதிர்க்கும் மஜத துணைத் தலைவர்.. கட்சிக்கு முழுக்கு
பெங்களூர்: பாரதிய ஜனதா கட்சி தலைமையிலான தேசிய ஜனநாயகக் கூட்டணியில் முன்னாள் முதல்வர் குமாரசாமியின் மதச் சார்பற்ற ஜனதா தளம் இணைந்ததற்கு எதிர்ப்பு தெரிவித்து அக்கட்சியின் துணைத் தலைவர் சையத் சஃபிபுல்லா சாகேப் கட்சியில் இருந்து விலகுவதாக அறிவித்துள்ளார்.
கர்நாடகா சட்டசபை தேர்தலில் படுதோல்வியை சந்தித்தது மதச் சார்பற்ற ஜனதா தளம். இதனையடுத்து கட்சியைத் தக்க வைக்க காங்கிரஸ் அல்லது பாஜகவுடன் சேர வேண்டிய கட்டாயம் அக்கட்சிக்கு ஏற்பட்டது. ஆனால் காங்கிரஸ் கட்சி, மதச்சார்பற்ற ஜனதா தளத்தை அரவணைக்க தயாராக இல்லை.
இதனால் வேறுவழியே இல்லாமல் பல்வேறு கட்ட பேச்சுவார்த்தைகளுக்குப் பின் பாஜக தலைமையிலான தேசிய ஜனநாயகக் கூட்டணியில் மதச் சார்பற்ற ஜனதா தளம் கட்சி இணைந்தது. டெல்லியில் மத்திய அமைச்சர் அமித்ஷாவை சந்தித்து பாஜக கூட்டணியில் இணைந்தார் குமாரசாமி.
ஆனால் மதச்சார்பற்ற ஜனதா தளம் கட்சியில் பாஜகவுடனான கூட்டணிக்கு எதிர்ப்பு கிளம்பி இருக்கிறது. சில எம்.எல்.ஏக்கள் காங்கிரஸுக்கு தாவ உள்ளதாகவும் கூறப்பட்டது. இதனை குமாரசாமி திட்டவட்டமாக மறுத்தும் இருந்தார்.
மேலும் காங்கிரஸ் கட்சிதான் மதச்சார்பற்ற ஜனதா தளம் கட்சியின் எம்.எல்.ஏக்களை வளைக்கும் முயற்சியில் ஈடுபட்டு வருகிறது. கடந்த 2 மாதங்களுக்கும் மேலாக இந்த முயற்சி நடைபெற்று வருகிறது. ஒரு எம்.எல்.ஏ. கூட எங்கள் கட்சியில் இருந்து விலகி காங்கிரஸுக்கு போகவே மாட்டார்கள் என்றும் குமாரசாமி நம்பிக்கையோடு கூறியிருந்தார்.
இந்நிலையில் மதச்சார்பற்ற ஜனதா தளத்தின் துணைத் தலைவர் சையத் சஃபிபுல்லா சாகேப் அக்கட்சியில் இருந்து விலகுவதாக அறிவித்துள்ளார். இது தொடர்பாக சையத் சஃபிபுல்லா சாகேப் கூறியதாவது: மதச்சார்பற்ற ஜனதா தளம் கட்சியில் 30 ஆண்டுகளாக பயணித்தேன். மதச்சார்பின்மையைத்தான் கட்சி இதுவரை முன்னிறுத்தியது. வாக்காளர்களிடமும் மதச்சார்பின்மை என்ற அடையாளத்தைத்தான் காட்டினோம். ஆனால் இப்போது ஜாதிகளிடையே, மதங்களிடையே மோதல்களை உருவாக்கும் சக்திகளுடன் மதச்சார்பற்ற ஜனதா தளம் கைகோர்த்துவிட்டது. மதத்தின் அடிப்படையில் செயல்படக் கூடிய கட்சியுடனான கூட்டணியை எப்படி ஏற்க முடியும? ஆகையால்தான் மதச்சார்பற்ற ஜனதா தளம் கட்சியில் இருந்து விலகுகிறேன். இவ்வாறு சையத் சஃபிபுல்லா சாகேப் கூறியுள்ளார்.
Click it and Unblock the Notifications
Sign in with Google