கர்நாடகா புதிய முதல்வர் சித்து? சிவா? காங். எம்எல்ஏக்கள் கூட்டத்தில் 'இமாச்சல்' பாணி வாக்கெடுப்பு!
பெங்களூரு: கர்நாடகா மாநிலத்தின் புதிய முதல்வர் யார் என்பதை காங்கிரஸ் எம்.எல்.ஏக்கள் வாக்கெடுப்பு மூலம் தேர்வு செய்ய உள்ளதாக தகவல்கள் வெளியாகி உள்ளன.
கர்நாடகா சட்டசபையின் 224 தொகுதிகளுக்கு ஒரே கட்டமாக மே 10-ல் தேர்தல் நடைபெற்றது. இத்தேர்தலில் பதிவான வாக்குகள் எண்ணப்பட்டு அனைத்து முடிவுகளும் அறிவிக்கப்பட்டுவிட்டன.
மொத்தம் உள்ள 224 தொகுதிகளில், காங்கிரஸ் 135; பாஜக- 66; மஜத 19 இடங்களைக் கைப்பற்றி உள்ளன. இம்மாநிலத்தில் பெரும்பான்மைக்கு தேவை 113 இடங்கள். பெரும்பான்மைக்கும் மிக அதிகமான இடங்களைப் பெற்று தனிப்பலத்துடன் காங்கிரஸ் ஆட்சி அமைக்கிறது.
கர்நாடகாவில் அமைய இருக்கும் புதிய ஆட்சியில் முதல்வர் யார் என்ற சிக்கல் எழுந்துள்ளது. பொதுவாக கர்நாடகா காங்கிரஸில் தற்போதைய நிலையில் சித்தராமையா அல்லது டிகே சிவகுமார்தான் முதல்வர் என்கிற எதிர்பார்ப்புகள் இருக்கின்றன. ஆனால் காங்கிரஸ் வட்டாரங்களில் சித்தராமையாவுக்குதான் ஆதரவு அதிகம்; டிகே சிவகுமாருக்கு முக்கிய இலாகாதான் கிடைக்கும். ஒக்கலிகா, லிங்காயத், முஸ்லிம் என 3 தரப்பினருக்கு தலா 1 துணை முதல்வர் பதவி ஒதுக்கப்படும் என கூறப்பட்டு வருகிறது.
இந்நிலையில் இன்று கர்நாடகா காங்கிரஸ் எம்.எல்.ஏக்கள் கூட்டம் நடைபெற உள்ளது. பெங்களூருவில் இன்று மாலை நடைபெறும் இந்த எம்.எல்.ஏக்கள் கூட்டத்தில் புதிய முதல்வர் யார் என்பது தேர்ந்தெடுக்கப்பட்டு அதிகாரப்பூர்வமாக அறிவிக்கப்பட உள்ளது.
இமாச்சல பிரதேசத்தில் காங்கிரஸ் ஆட்சியை கைப்பற்றிய போது யார் முதல்வர் என்கிற சிக்கல் வந்தது. அப்போது அத்தனை தரப்பும், வாக்கெடுப்பு நடத்தி முடிவு செய்து கொள்ளலாம் என தீர்மானித்தனர். அதனால் சுமூகமாக முதல்வர் யார் என்ற பிரச்சனை முடிவுக்கு வந்தது.
தற்போது அதே பாணியில் கர்நாடகா முதல்வர் யார் என்பதை தீர்மானிக்க காங்கிரஸ் மேலிடம் முடிவு செய்துள்ளதாம். இன்றைய கர்நாடகா காங்கிரஸ் எம்.எல்.ஏக்கள் கூட்டத்தில் புதிய முதல்வர் யார் என வாக்கெடுப்பு நடத்தி முடிவு செய்ய இருக்கின்றனராம். அதனால் டிகே சிவகுமாரும் முதல்வர் ரேஸில் இருப்பார் என்கின்றன.
Click it and Unblock the Notifications
Sign in with Google