அமேசான், பிளிப்கார்ட்டுக்கு இனி ரொம்ப கஷ்டம்தான்.. இந்தியாவில் மாறியது ஷாப்பிங் கலாச்சாரம்!

சென்னை: இந்தியாவில் 'க்விக் காமர்ஸ்' எனப்படும் மிக விரைவான டெலிவரி சேவை வழங்கும் ஆன்லைன் வர்த்தகத் தளங்கள் வேகமாகப் பிரபலமடைந்து வருகின்றன. சோமாட்டோவின் Blinkit, ஸ்விக்கியின் Instamart, Zepto போன்ற பல புதிய நிறுவனங்களின் வருகை, Flipkart மற்றும் Amazon போன்ற ஏற்கனவே ஆதிக்கம் செலுத்தி வரும் பாரம்பரிய இ-காமர்ஸ் தளங்களுக்குப் புதிய அச்சுறுத்தலாகவும், சவாலாகவும் அமையலாம் எனக் கருதப்படுகிறது.

பாரம்பரிய இ-காமர்ஸ் தளங்களான ஃபிளிப்கார்ட் மற்றும் அமேசானில் ஒரு பொருளை ஆர்டர் செய்தால், அது நம் கைக்கு வந்து சேரக் குறைந்தபட்சம் இரண்டு நாட்களாவது ஆகிறது. ஆனால், க்விக் காமர்ஸ் தளங்களான Blinkit மற்றும் Zepto போன்றவற்றில் நீங்கள் ஆர்டர் செய்த பொருட்கள் வெறும் 10 முதல் 30 நிமிடங்களுக்குள்ளேயே உங்கள் வீட்டு வாசலுக்கு வந்து சேர்ந்துவிடுகின்றன. இந்த நிறுவனங்கள் இப்போது மளிகை, அத்தியாவசியப் பொருட்களைத் தாண்டி தங்கள் வர்த்தகத்தை எலெக்ட்ரானிக்ஸ் பொருட்கள் வரை விரிவுபடுத்தியுள்ளன. ஆம், இப்போது நீங்கள் இந்தத் தளங்களில் ஐபோன்கள் மற்றும் பிற நிறுவனங்களின் போன்களையும் ஆர்டர் செய்து, அரை மணி நேரத்திற்குள்ளேயே பெற முடியும். ஆப்பிள் தயாரிப்புகளுக்கும் இதில் தள்ளுபடிகள் கிடைக்கின்றன.

மாறும் ஷாப்பிங் முறை

க்விக் காமர்ஸ் நிறுவனங்கள் இந்தத் துறையில் வேகமாக முன்னேறும்போது, பாரம்பரிய இ-காமர்ஸ் நிறுவனங்களுக்கான போட்டி தவிர்க்க முடியாததாகிறது. எலெக்ட்ரானிக்ஸ் பொருட்கள் என்பது ஒரு மிகப்பெரிய விற்பனைப் பிரிவு. இதற்காகவே பெரும்பாலானோர் ஃபிளிப்கார்ட் மற்றும் அமேசானுக்குச் செல்கின்றனர். அதே விலைக்கோ அல்லது சிறப்பான சலுகைகளுடனோ ஒரு பொருள் வெறும் 30 நிமிடங்களில் கிடைக்குமென்றால், இரண்டு நாட்கள் காத்திருக்க யாரும் பெரிதாக விரும்ப மாட்டார்கள். இது மக்களின் ஷாப்பிங் செய்யும் முறையையே மெல்ல மெல்ல மாற்றத் தொடங்கியுள்ளது.

இந்தச் சவாலை பாரம்பரிய இ-காமர்ஸ் நிறுவனங்களும் உணர்ந்துள்ளன. அதனால்தான் அவர்களும் தங்கள் வாடிக்கையாளர்களைத் தக்கவைத்துக்கொள்ள விரைவு டெலிவரி சேவைகளைத் தொடங்கியுள்ளனர். உதாரணமாக, ஃபிளிப்கார்ட் நிறுவனம் 'ஃபிளிப்கார்ட் மினிட்ஸ்' (Flipkart Minutes) என்ற பெயரிலும், மிந்த்ரா (Myntra) நிறுவனம் 'எம்நௌ' (MNow) என்ற பெயரிலும் விரைவான டெலிவரி சேவைகளை வழங்கத் தொடங்கியுள்ளன.

சவால்களும் வித்தியாசங்களும்

எனினும், க்விக் காமர்ஸ் மற்றும் பாரம்பரிய இ-காமர்ஸ் இரண்டிற்கும் இடையே சில முக்கிய வித்தியாசங்களும், சவால்களும் உள்ளன. க்விக் காமர்ஸ் தளங்களில் தற்போது கிடைக்கும் பொருட்களின் வகைகள் (variety) பாரம்பரிய இ-காமர்ஸ் தளங்களுடன் ஒப்பிடும்போது குறைவாகவே உள்ளது. மேலும், இவற்றின் சேவை தற்போது நாட்டின் குறிப்பிட்ட சில நகரங்களின் சில பகுதிகளில் மட்டுமே கிடைக்கிறது. ஆனால், அமேசான் மற்றும் ஃபிளிப்கார்ட் போன்ற பெரிய நிறுவனங்கள் நாடு முழுவதும் உள்ள தொலைதூரப் பகுதிகளுக்கும் தங்கள் சேவையை வழங்குகின்றன.

நுகர்வோருக்கு நன்மை

இந்தியா போன்ற பெரிய சந்தையில் இது போன்ற புதிய தளங்களின் வருகையால் இறுதியில் நுகர்வோருக்கே பெரிய நன்மை கிடைக்கும். ஒரே விலையில் ஒரு போனோ அல்லது வேறு பொருளோ, க்விக் காமர்ஸ் மற்றும் பாரம்பரிய இ-காமர்ஸ் இரண்டிலும் கிடைக்கும் போது, நிறுவனங்களுக்கு இடையே போட்டி அதிகமாகும். போட்டி அதிகரித்தால், அதன் பலனாக நுகர்வோருக்குச் சிறந்த சலுகைகளும் தள்ளுபடிகளும் கிடைக்கும்.

மோர்டோர்ட் இன்டலிஜென்ஸ் (Mordor Intelligence) அறிக்கையின்படி, தற்போது இந்திய க்விக் காமர்ஸ் சந்தையின் மதிப்பு சுமார் 3.49 பில்லியன் டாலர்கள். இது 2030ஆம் ஆண்டுக்குள் 4.35 பில்லியன் டாலர்களாக வளரலாம். அதே சமயம், இந்தியாவின் ஒட்டுமொத்த இ-காமர்ஸ் சந்தை தற்போது 137.21 பில்லியன் டாலர்களாக உள்ளது. இது 2030ஆம் ஆண்டுக்குள் மிகப்பெரிய அளவில் வளர்ந்து 363.3 பில்லியன் டாலர்களை எட்ட வாய்ப்புள்ளது.

ஆகஸ்ட் 2024இல் வெளியான எகனாமிக் டைம்ஸ் அறிக்கையின்படி, அன்றாடப் பயன்பாட்டுப் பொருட்களின் (FMCG) ஆன்லைன் விற்பனையில் க்விக் காமர்ஸ் தளங்களின் பங்கு 30 முதல் 40% வரை உயர்ந்துள்ளது. மேலும், ஆன்லைன் மளிகை (e-grocery) ஆர்டர்களில் இவற்றின் ஆதிக்கம் மிக அதிகம்; இவற்றின் பங்கு 70 முதல் 75% வரை உள்ளது. இது பாரம்பரிய இ-காமர்ஸ் தளங்களுக்கு நேரடி தாக்கத்தை ஏற்படுத்துகிறது. எனினும், அதிக வகைப்படுத்தல் மற்றும் பரந்த அணுகல் பாரம்பரிய இ-காமர்ஸ் தளங்களுக்கு இன்னும் சாதகமாகவே உள்ளது.

இது ஒரு போரல்ல... மாறும் போக்கு!

மொத்தத்தில், க்விக் காமர்ஸ் வருகையை பாரம்பரிய இ-காமர்ஸ் நிறுவனங்களுக்கு இடையேயான ஒரு நேரடி 'போர்' என்று சொல்வதை விட, மக்களின் வாங்கும் பழக்கம் மற்றும் ஆன்லைன் ஷாப்பிங் செய்யும் முறை மாறி வரும் ஒரு புதிய போக்கு எனக் கூறலாம். ஒரு காலத்தில் மக்கள் கடைகளுக்கு நேரில் சென்று வாங்குவதைக் குறைத்துவிட்டு, ஆன்லைன் இ-காமர்ஸ் தளங்களைத் தேர்ந்தெடுத்தனர். இப்போது சிலர் மிக விரைவான டெலிவரிக்காக க்விக் காமர்ஸ் நோக்கி நகரத் தொடங்கிவிட்டனர்.

இதற்கேற்ப, பாரம்பரிய இ-காமர்ஸ் நிறுவனங்களும் தங்கள் டெலிவரி நேரத்தைக் குறைக்கத் தொடங்கிவிட்டன. இதனால், க்விக் காமர்ஸ் மற்றும் இ-காமர்ஸ் இடையே உள்ள டெலிவரி நேர இடைவெளி எதிர்காலத்தில் மேலும் குறையும் என எதிர்பார்க்கப்படுகிறது.

English summary

Quick Commerce platforms like Blinkit, Swiggy Instamart, and Zepto are rapidly gaining popularity in India and pose a significant challenge to traditional e-commerce giants like Flipkart and Amazon. Unlike traditional platforms where delivery takes at least two days, Quick Commerce offers delivery within 10-30 minutes. These platforms are now expanding beyond groceries to include electronics, allowing customers to receive items like iPhones within half an hour, often with discounts.