”உங்கள் மகள் உங்களுடன்".. ஹரியானா தேர்தலில் காங்கிரஸ் வேட்பாளராக களமிறங்கும் வினேஷ் போகத்?
சண்டிகர்: மத்திய பாஜக அரசுக்கு எதிராக 200 நாட்களாக பஞ்சாப்- ஹரியானா எல்லையான ஷம்பு பகுதியில் முகாமிட்டு போராட்டம் நடத்தி வரும் விவசாயிகளை மல்யுத்த வீராங்கனை வினேஷ் போகத் நேரில் சென்று சந்தித்து ஆதரவு தெரிவித்தார். இதனால் ஹரியானா சட்டசபை தேர்தலில் காங்கிரஸ் வேட்பாளராக வினேஷ் போகத் களமிறங்கக் கூடும் என்கின்றன அரசியல் வட்டாரங்கள்.
ஹரியானா மாநில சட்டசபை தேர்தல் அக்டோபர் 1-ந் தேதி நடைபெறும் என முதலில் அறிவிக்கப்பட்டது. ஆனால் பாஜக உள்ளிட்ட அரசியல் கட்சிகள் தொடர்ந்து விடுத்த கோரிக்கையை ஏற்று அக்டோபர் 5-ந் தேதி சட்டசபை தேர்தல் நடைபெறும்; அக்டோபர் 8-ந் தேதி வாக்குகள் எண்ணப்பட்டு முடிவுகள் அறிவிக்கப்பட உள்ளன.
ஹரியானாவில் ஆளும் பாஜகவுக்கு எதிரான அதிருப்தி அலை வீசுவதாக கருத்து கணிப்புகள் தெரிவித்துள்ளன. ஹரியானாவில் காங்கிரஸ் பக்கம் காற்று வீசுவதாகவும் அந்த கணிப்புகள் தெரிவித்து வருகின்றன. ஹரியானா தேர்தலில் விவசாயிகள் போராட்டம் மிகப் பெரிய தாக்கத்தை ஏற்படுத்தக் கூடும் எனவும் கூறப்படுகிறது.
மத்தியில் ஆளும் பாஜக அரசு விவசாயிகளின் கோரிக்கைகளை நிறைவேற்ற கோரி பஞ்சாப்- ஹரியானா எல்லையான ஷம்பு பகுதியில் முகாமிட்டு போராட்டம் நடத்தி வருகின்றனர். டெல்லி நோக்கிப் புறப்பட்ட விவசாயிகளை ஹரியானாவில் ஆளும் பாஜக அரசுதான் ஷம்பு பகுதியில் தடுத்தது. இதனால் அங்கேயே முகாமிட்டு விவசாயிகள் போராட்டம் நடத்தி வருகின்றனர்.
இந்த நிலையில் பாரீஸ் ஒலிம்பிக்கில் பதக்கம் பெற இயலாமல் போன மல்யுத்த வீராங்கனை வினேஷ் போகத் நேற்று ஷம்பு எல்லையில் போராடும் விவசாயிகளை நேரில் சந்தித்து ஆதரவு தெரிவித்தார். அப்போது, உங்கள் மகள் நான்.. உங்களுடன் இருக்கிறேன் என உருக்கமாகவும் வினேஷ் போகத் பேசினார். முன்னதாக விவசாயிகளின் காப் பஞ்சாயத்து கூட்டத்திலும் வினேஷ் பங்கேற்றிருந்தார்.
வினேஷ் போகத்தின் உறவினரான மல்யுத்த வீராங்கனை பபிதா போகத், பாஜகவில் இணைந்து 2019 தேர்தலில் போட்டியிட்டார். ஆனால் மல்யுத்த வீராங்கனைகளுக்கு பாலியல் தொந்தரவு கொடுத்த பாஜகைவ்ன் பிரிஜ் பூஷண் சிங்குக்கு எதிராக வினேஷ் போகத், தீவிரமாக போராட்டம் நடத்தினார். இதனால் வினேஷ் போகத் மீது பபிபாவுக்கு கடும் கோபமாம். பாரீஸ் ஒலிம்பிக் விவகாரத்திலும் பபிதா எந்த கருத்தும் தெரிவிக்காமல அமைதி காத்திருந்தார்.
இந்த நிலையில் விவசாயிகள் போராட்டம், விவசாயிகள் பஞ்சாயத்து கூட்டம் என அடுத்தடுத்து பங்கேற்று வரும் வினேஷ் போகத்,ஹரியானா சட்டசபைத் தேர்தலில் உறவினரான பபிதா போகத்தை எதிர்த்து காங்கிரஸ் வேட்பாளராகப் போட்டியிட இருக்கிறார்; இதற்காகவே விவசாயிகள் போராட்டத்தை ஆதரித்துள்ளார் என்கின்றனர் அம்மாநில அரசியல் வட்டாரங்கள்.
Click it and Unblock the Notifications
Sign in with Google