“20-30 MLAக்கள் வருவார்கள்.. சிலர் அமைச்சர்களாகவும் ஆவார்கள்”- நயினார் நாகேந்திரன் பேச்சால் குழப்பம்

சென்னை: "எங்களுக்கு 20, 30 சட்டமன்ற உறுப்பினர்கள் வருவார்கள் என்று நினைக்கிறேன். இங்கிருந்து அமைச்சர்களாககூட வருவார்கள். இறைவன் நினைத்தல் நிச்சயமாக நடக்கும்" என சென்னையில் இன்று பாஜக மாநிலத் தலைவர் நயினார் நாகேந்திரன் பேசியுள்ளார்.

சென்னை அமைந்தகரையில் பாஜக தேர்தல் அலுவலகம் இன்று திறந்து வைக்கப்பட்டது. இந்த விழாவில் தமிழக பாஜக தலைவர் நயினார் நாகேந்திரன், தமிழக பாஜக மேலிட இணை பொறுப்பாளர் சுதாகர் ரெட்டி, தமிழக பாஜக முன்னாள் தலைவர்கள் பொன் ராதாகிருஷ்ணன், தமிழிசை சௌந்தரராஜன், சட்டமன்ற உறுப்பினர் வானதி சீனிவாசன், அதிமுக முன்னாள் அமைச்சர் கோகுல இந்திரா, அமமுக துணைப் பொதுச் செயலாளர் செந்தமிழன் உள்ளிட்ட கூட்டணி கட்சி நிர்வாகிகள் கலந்து கொண்டனர்.

அதனைத் தொடர்ந்து பாஜக மாநிலத் தலைவர் நயினார் நாகேந்திரன் செய்தியாளர்களைச் சந்தித்தார். அப்போது பேசிய அவர், “கட்சிகளோடு இணைந்து தேர்தலை சந்திக்க இருக்கிறோம். இன்று பாஜக தேர்தல் அலுவலகம் திறக்கப்பட்டு இருக்கிறது. இப்போது நடக்கும் ஆட்சியை அகற்றப்பட்ட வேண்டும்.

இது ஆட்சியே இல்லை. சட்டம் ஒழுங்கு சீர்கெட்டு போய் உள்ளது. முறையாக டிஜிபி கூட இல்லை. டிஜிபியை கூட அவர்களால் நியமனம் செய்ய முடியவில்லை. பெண்களுக்கு பாலியல் வன்கொடுமை ஏற்பட்டு இருக்கிறது. பெண்களுக்கு இந்த ஆட்சியில் பாதுகாப்பே இல்லை. திமுக அளித்த வாக்குறுதிகளை முறையாக நிறைவேற்றவில்லை. அவர்களைப் பொறுத்தவரை நோட்டை கொடுத்து ஓட்டை வாங்கி விடலாம் என இருக்கிறார்கள்” என்றார்.

மேலும், தமிழகத்தைப் பொறுத்தவரை டபுள் இஞ்சின் சர்க்கார் தான் சரியாக இருக்கும். அப்போதுதான் பல்வேறு நலத்திட்ட உதவிகளை நிறைவேற்ற முடியும். பிரதமர் மோடியின் வருகைக்கு பிறகு அதிமுகவுடன் தொகுதி பங்கீடு குறித்து பேச்சுவார்த்தை நடைபெறும் என்று தெரிவித்து உள்ளார்.

முன்னதாக நிகழ்வில் பேசிய பாஜக மாநில துணைத் தலைவர் வி.பி.துரைசாமி பாஜகவில் பலரும் அமைச்சராக வாய்ப்புள்ளதாக தெரிவித்தார். அதன்பிறகு பேசிய நயினார் நாகேந்திரன், "சட்டசபை தேர்தலுக்குப் பின், பாஜகவில் இருந்து 20-30 எம்.எல்.ஏக்கள் வருவார்கள், சிலர் அமைச்சர்களாகவும் ஆவார்கள்" எனக் கூறியுள்ளார். அதிமுக தனித்து ஆட்சி அமைக்கும் என பழனிசாமி கூறி வரும் நிலையில் நயினார் நாகேந்திரன் பேச்சால் கூட்டணியில் குழப்பம் ஏற்பட்டுள்ளது.

English summary

"I think we will have 20, 30 MLAs. They will even come from here as ministers. God willing, it will definitely happen," said BJP state president Nainar Nagendran in Chennai today.