அடேங்கப்பா.. அமேசானில் ஒரு பிளாஸ்டிக் வாளி விலை ரூ 26 ஆயிரம்! இஎம்ஐ ஆப்ஷனும் இருக்கு!

Updated: Wednesday, May 25, 2022, 16:47 [IST]

Subscribe to Oneindia Tamil

சென்னை: அமேசானில் பிளாஸ்டிக் வாளியின் விலை ரூ 26 ஆயிரம் என்பதால் இதை கண்டு வாடிக்கையாளர்கள் அதிர்ச்சி அடைந்துள்ளனர். மேலும் இந்த பக்கெட்டை வாங்குவதற்கு மாதத் தவணை வசதியும் இருக்கிறதாம்.

ஒரு சின்ன குண்டூசியாக இருந்தாலும் அதை கடைக்கு போய் வாங்கிய காலம் போய் இன்று நகைகள் வரை வீட்டில் இருந்தபடியே ஆன்லைனில் வாங்கும் அளவுக்கு மின்னணு விற்பனை மக்களிடையே அதிகரித்துள்ளது.

ஒரு செல்போன் வாங்குவதற்கு கூட கடைகளுக்கு போய் மாடல் பார்த்து வாங்குவதில்லை. உட்கார்ந்த இடத்தில் அமேசான், பிளிப்கார்ட் உள்ளிட்ட செயலிகளில் பணம் செலுத்தி வாங்கி கொள்ளும் பழக்கம் அதிகரித்துள்ளது.

பழுது

ஒரு வேளை ஏதாவது பழுது ஏற்பட்டாலும் நிபந்தனைக்குட்பட்ட பழுதுகளுக்கு அந்த பொருளை திருப்பி ஈகாமர்ஸ் நிறுவனத்திற்கே அனுப்பினால், நமக்கு வேறு பொருளோ அதற்கான பணமோ கிடைத்துவிடும். இந்த நவீன உலகில் பெரும்பாலும் மக்கள் இதையே விரும்புகிறார்கள்.

மின்னணு நிறுவனங்கள்

அதிலும் நிறைய மின்னணு நிறுவனங்களில் குறிப்பிட்ட பொருளின் விலையை ஒப்பிட்டு பார்த்து பின்னர் எங்கு குறைந்து காணப்படுகிறதோ அங்கு வாங்குகிறார்கள். அதற்காக வரட்டி எல்லாம் விற்பதா என்ற கேள்வியும் எழுகிறது. அமேசானில் வரட்டி விற்பனை செய்யப்பட்டது. இதை பல வாடிக்கையாளர்கள் கிண்டல் செய்தனர்.

இந்தியா

இந்தியாவில் இருப்போருக்கு இந்த வரட்டி எளிதாக கிடைத்து விடும். ஆனால் வெளிநாடுகளில் இருப்போருக்கு பசு மாட்டு வரட்டி என்பது குதிரை கொம்பு. வீட்டில் ஹோமம் வளர்க்கும் போது வரட்டிகள் தேவை. இதனால் வெளிநாட்டில் வாழும் இந்தியர்களுக்காக வரட்டி விற்பனை செய்யப்பட்டிருக்கலாம் என நியாயப்படுத்தப்பட்டது.

6 செட் பக்கெட் ரூ 25,999

ஆனால் தற்போது நெட்டிசன்கள் ஒருவர் போட்டுள்ளது அதிர்ச்சி கலந்த செய்தியாகும். அதாவது ஒரு பிளாஸ்டிக் வாளி 6 செட் ரூ 25,999 மட்டுமே. அதுவும் 28 சதவீத விலைகுறைப்புக்கு பிறகு இந்த விலையாம். இதற்கு மாத தவணை வசதி எல்லாம் இருக்கிறதாம். இலவச டெலிவரியாம். இன்னிக்கு ஆர்டர் போட்டால் மே 29 ஆம் தேதி கிடைக்கும்.

55 சதவீதம்

ஆனால் ஸ்டாக் தீர்ந்து போய்விட்டதாம். அது போல் குளிப்பதற்கு பயன்படுத்தும் பக்கெட்டின் விலை 55 சதவீத விலைக் குறைப்புக்கு பிறகு 9 ஆயிரமாம். இதை பார்க்கும் நெட்டிசன்கள் அதிர்ச்சி அடைந்துள்ளனர். ஒரு சிலர் தசம புள்ளியை மறந்திருப்பர் என்கிறார்கள். 259.99 ரூபாய்க்கு பதிலாக ரூ 25999 என போட்டிருக்கலாம். ஆனால் இன்னும் சிலரோ போய் எம்ஆர்பியை பாருங்க ரூ 35,900 இருக்கிறது என்கிறார்கள். நிஜமாகவே அந்த பக்கெட்டின் விலை இவ்வளவா இல்லை தொழில்நுட்ப கோளாறால் இப்படி ஒரு விலையை காட்டுகிறதா என தெரியவில்லை.