மது பழக்கம் தாழ்த்தப்பட்ட மக்களிடம்தான் அதிகம்.. டிவி விவாதத்தில் பாஜக பிரமுகர் பேச்சால் சர்ச்சை!

சென்னை: மது பழக்கம் என்பது தாழ்த்தப்பட்ட மக்களிடம்தான் அதிகம் என டிவி விவாதத்தில் பாஜக பிரமுகர் ஜி.கே.நாகராஜ் தெரிவித்ததால் சர்ச்சை ஏற்பட்டுள்ளது.

சன் நியூஸ் தொலைக்காட்சியின் கேள்வி களம் விவாத நிகழ்ச்சியில் பாஜக பிரமுகர் ஜிகே நாகராஜ் கூறியதாவது: சமூக நீதி கவலைப்படுகிற அரசு, மதுவால் அதிகமாக பாதிக்கப்படுவது மக்கள். தாழ்த்தப்பட்ட மக்கள் குறிப்பாக பட்டியல் இன மக்கள். அதைப் பற்றி கவலை கொண்டிருக்கிறதா? என் கேள்வி. இவ்வாறு ஜி.நாகராஜ் கூறினார்.

அப்போது குறுக்கிட்ட சன் செய்தி ஆசிரியரும் நெறியாளருமான மு.குணசேகரன், நீங்க கொச்சைப்படுத்துறீங்க.. ஒரு சமூகத்தை கொச்சைப்படுத்துறீங்க.. தமிழ்நாட்டில் எல்லா ஜாதிக்காரங்களும்தான் குடிக்கிறாங்க. குடிக்காத ஜாதின்னு எதாச்சும் இருக்கா? நீங்க ஒரு சமூகத்தை கொச்சைப்படுத்துறீங்க என்றார்

இதற்கு பதிலளித்த பாஜகவின் ஜிகே நாகராஜன், நீங்க தயவு செய்து பட்டியலின மக்கள் வாழும் பகுதிகளில் போய் பாருங்க.. நான் போய் பார்த்திருக்கிறேன். யாருடைய வாழ்வாதாரம் பாதிக்கப்படுதுன்னு போய் பாருங்க என்றார்.

அண்ணன் .@GunasekaranMu அவர்களின் instant, clear, strong rebuttal ❤️🔥🖤

டேட்டா இருக்கா? குடிக்காத ஜாதின்னு ஏதும் இருக்கா? உயர் சாதில குடிக்கலயா? BC MBC-ல குடிக்கலயா? நீங்க பிறந்த சாதில குடிக்கலயா? pic.twitter.com/xEUFAa6OOH

— Social Justice:சமூகநீதி (@Sathyantweets) November 14, 2023

இதனை நிராகரித்த நெறியாளர் குணசேகரன், நீங்க சொல்றதுக்கு எதாவது பட்டியல் இருக்கிறதா? டேட்டா இருக்கிறதா? உயர்ஜாதியினர் குடிக்கலையா? எம்பிசி குடிக்கலையா? மற்ற ஜாதிகள் குடிக்கலையா? நீங்க பிறந்த ஜாதியிலோ அல்லது நான் பிறந்ததாக சொல்லப்படுகிற ஒரு ஜாதியிலோ யாரும் குடிக்கலையா? ஒரு குறிப்பிட்ட ஜாதியினர்தான் குடிக்கிறாங்கன்னு எப்படி சொல்றீங்கன்னு எனக்கு புரியலை என்றார்.

இந்த விவாதம் தற்போது சமூக வலைதளங்களிலும் விவாதிக்கப்பட்டு வருகிறது. தாழ்த்தப்பட்ட மக்களுக்கு எதிரான பாஜக பிரமுகர் ஜிகே நாகராஜின் இந்த கருத்து இடம் பெற்ற கேள்வி களம் வீடியோ, சமூக வலைதளங்களில் பகிரப்பட்டு பேசுபொருளாகி இருப்பதால் சர்ச்சையாகி இருக்கிறது.

English summary

A New Controversy erupted over BJP Functionary's comments against Dalits.