தவெக 4 - 6 சீட்களில் வெல்ல வாய்ப்பு.. 20% வாக்குகளை அள்ளக்கூடும்.. ABP Nadu கருத்துக்கணிப்பு ரிசல்ட்

Updated: Thursday, April 9, 2026, 13:38 [IST]

Subscribe to Oneindia Tamil

சென்னை: ABP Nadu நடத்திய தேர்தல் கருத்துக்கணிப்பில், தவெக 4 முதல் 6 இடங்கள் வரை வெற்றி பெறக்கூடும் எனத் தெரிவிக்கப்பட்டுள்ளது. இந்தக் கருத்துக்கணிப்பின்படி, திமுக மீண்டும் தமிழ்நாட்டில் ஆட்சியைக் கைப்பற்றும் என்றும் தெரிவிக்கப்பட்டுள்ளது.

இந்தியா முழுவதும் 5 மாநிலங்களில் ஜனநாயகத் திருவிழாவான சட்டமன்றத் தேர்தல்கள் களைகட்டியுள்ளன. அசாம், கேரளா, புதுச்சேரி மாநிலங்களுக்கு இன்று (ஏப்ரல் 9 ஆம் தேதி) வாக்குப்பதிவு நடைபெறுகிறது. அதைத் தொடர்ந்து தமிழகத்தில் உள்ள 234 தொகுதிகளுக்கு வரும் ஏப்ரல் 23 ஆம் தேதி ஓரே கட்டமாகவும், மேற்கு வங்காளத்திற்கு 23, 29 ஆம் தேதிகளில் இரு கட்டங்களாகவும் தேர்தல் நடைபெற உள்ளது.

ABP Nadu Poll Predicts DMK Comeback TVK Likely to Win 4 6 Seats

அனல் பறக்கும் தேர்தல் களம்

தேர்தல் முடிவுகள் மற்றும் வாக்கு எண்ணிக்கை மே மாதம் 4 ஆம் தேதி நடைபெறும் என்று அறிவிக்கப்பட்டுள்ளது. தமிழ்நாட்டில் இன்று மாலை இறுதி வேட்பாளர் பட்டியல் வெளியிடப்படுகிறது. வரும் 23ஆம் தேதி வாக்குப்பதிவு நடைபெறவுள்ள நிலையில், அரசியல் கட்சி தலைவர்கள் சூறாவளிப் பிரச்சாரம் மேற்கொண்டுள்ளனர்.

தமிழ்நாடு சட்டமன்ற தேர்தல் களம் அனல் பறக்கத் தொடங்கியுள்ளது, நான்கு முனை போட்டியாக நடைபெறும் இந்த தேர்தலில் திமுக கூட்டணி 20+ கூட்டணி கட்சிகளுடன் களம் காண்கிறது. அதிமுக தலைமையில் பாஜக உள்ளடக்கிய தேசிய ஜனநாயக கூட்டணிகளம் காண்கிறது. சீமானின் நாம் தமிழர் கட்சி, மற்றும் நடிகர் விஜய்யின் தவெக கட்சி தனித்து போட்டியிடுகிறது.

ABP Nadu - தேர்தல் கருத்துக்கணிப்பு முடிவுகள்

இதற்கிடையே, பல்வேறு ஊடக நிறுவனங்கள், தேர்தல் கருத்துக்கணிப்புகளை நடத்தி வருகின்றன. இந்த தேர்தலில் இளைஞர்களின் ஆதரவு தவெகவுக்கு அதிகம் உள்ளதால் எத்தனை இடங்கள் வெற்றி பெறுவார்கள் என்கிற எதிர்பார்ப்பு எழுந்து வருகிறது.

அந்தவகையில், ABP Nadu நடத்திய தேர்தல் கருத்துக்கணிப்பு முடிவுகள் வெளியிடப்பட்டுள்ளன. தமிழக சட்டமன்ற தேர்தலில் திமுக கூட்டணி 172 முதல் 179 தொகுதிகள் வரை வென்று மீண்டும் ஆட்சியை தக்கவைக்கும் என ABP நாடு செய்தி நிறுவனம் நடத்திய கருத்துக்கணிப்பு முடிவுகளில் தெரிவிக்கப்பட்டுள்ளது.

தவெக 4- 6 சீட்

அதிமுக கூட்டணி 50 முதல் 58 தொகுதிகளிலும், விஜய்யின் தவெக 4 முதல் 6 இடங்களிலும் வெற்றி பெறும் என ABP Nadu நடத்திய தேர்தல் கருத்துக்கணிப்பு தெரிவித்துள்ளது. நாம் தமிழர் கட்சி ஒரு இடத்தில் கூட வெல்ல வாய்ப்பில்லை என்றும் இந்தக் கருத்துக்கணிப்பில் கூறப்பட்டுள்ளது.

இந்த முறை மிகவும் எதிர்பார்ப்பை கிளப்பியுள்ள விஜய்யின் தமிழக வெற்றிக் கழகம் 4 முதல் 6 சீட்டுகளை வெல்லும் என இந்த கருத்துக்கணிப்பில் தெரிவிக்கப்பட்டுள்ளது கவனம் பெற்றுள்ளது. அதாவது, தவெக, சென்னை, மேற்கு மண்டலம், வடக்கு மண்டலம், தெற்கு மண்டலம், டெல்டா மண்டலம் என 5 மண்டலங்களிலும் தலா 1 இடம் முதல் அதிகபட்சமாக 2 இடங்கள் வரை வெல்ல வாய்ப்பு உள்ளதாக ABP Nadu நடத்திய தேர்தல் கருத்துக்கணிப்பில் தெரிவிக்கப்பட்டுள்ளது.