திமுகவுடனான நெருக்கத்தில் திசைவழி தெரியாத நடுக்காட்டில் திணறும் நடிகர் கமல்ஹாசன்.. மீளுமா மநீம?
சென்னை: நடிகர் கமல்ஹாசனின் மக்கள் நீதி மய்யம் என்ற கட்சி இப்போது எந்த திசையில் பயணிக்கிறது என்பதை கூட மக்கள் அனேகமாக மறந்துவிட்ட நிலைதான். தமிழ்நாட்டை உலுக்குகிற பிரச்சனைகளில் கூட கருத்து எதுவும் தெரிவிக்காமல் கனத்த மவுனமாக இருக்கும் ஒரு கட்சியாக மக்கள் நீதி மய்யம் மறைந்தும் கரைந்தும் கொண்டே போகிறது என்பதுதான் கள நிலவரம்.
சினிமா உலகில் தனித்துவமான பாதையை உருவாக்கிய கமல்ஹாசன், அரசியலில் கால் பதித்தபோது மக்கள் மத்தியில் பெரும் எதிர்பார்ப்பு ஏற்பட்டது. 'மக்கள் நீதி மய்யம்' என்ற பெயரில் தொடங்கிய அவரது கட்சி, புதிய அரசியல் பாதையைப் பதிவு செய்யும் எனவும், அதனால் தமிழக அரசியலில் மாற்றம் வரும் எனவும் எதிர்பார்க்கப்பட்டது.
ஆனால், இன்றுவரை அவரது அரசியல் பயணம் திசைவழி தெரியாது திருப்பமின்றி குழப்பத்தில் இருக்கிறது. கமல்ஹாசன் முதலில் திமுகவுக்கு எதிராக பல்வேறு கருத்துகளை வெளிப்படுத்தி கடுமையாக விமர்சித்தார். ஆனால், 2021 சட்டமன்ற தேர்தலில் மக்கள் நீதி மய்யம் கட்சியின் தோல்விக்குப் பிறகு, திமுகவுடன் ஒத்துழைப்பதற்கான சிக்னல்கள் வெளிப்படையாக வெளிப்பட்டன.. இதனுடன், சமூக ஊடகங்களில் திமுக அரசை ஆதரிக்கும் வகையிலான கருத்துக்களும் பதிவாக ஆரம்பமாகின.
தோல்விக்குப் பிறகான மாற்றம்
தேர்தலில் அமோக வெற்றி பெற முடியாத நிலையில், கமலின் கட்சிக்கு ஆதரவளிக்க மக்கள் தயங்கினார்கள். இதனால், 'மக்கள் நீதி மய்யம்' பார்வையாளர்களின் மனதில் ஒரு குறுகிய தாக்கத்தை மட்டும் ஏற்படுத்தியதாகும். தொடர்ந்து கமலின் அரசியல் நிலைப்பாட்டில் இடைவெளி தோன்றியது. சமூக ஊடகங்களில் அவர் அனுப்பிய கருத்துக்களும் குறைந்தது.
அவரது இந்த நிலைப்பாட்டால் பொதுமக்களிடம் ஒரு பெரிய குழப்பம் ஏற்பட்டுள்ளது. அவர் தொடர்ந்து திமுகவுடன் கூட்டணியில் பயணிப்பாரா?அல்லது தனித்து போட்டியிடுவாரா என்ற கேள்விக்கு இன்னும் பதிலில்லாமல் உள்ளது.
அடுத்த கட்ட அரசியல் இயக்கம்
2026 தமிழக சட்டமன்ற தேர்தலில் அவர் எந்த வழியைத் தேர்வு செய்வார் என்பதே அனைவரின் பார்வையும் சுமக்கின்றது. அவர் தனித்து தேர்தலில் போட்டியிடும் போது எந்த விதமான அரசியல் வடிவமைப்பை எடுத்துக்கொள்வார் என்பதும் ஆவலுடன் எதிர்பார்க்கப்படுகிறது.
குழப்பம் நீடிக்கிறது
கமல்ஹாசன் அரசியலுக்கு வந்தபோது "மாற்றத்தை உருவாக்குவேன்" என்ற உறுதியுடன் செயல்பட்டார். ஆனால், தற்போது அவரது செயல்கள் இதற்குச் சற்றும் ஏற்புடையதாக இல்லை. இது, அவர் முழுமையாக அரசியல் பாணியை மாற்றிக்கொள்கிறாரா அல்லது படிப்படியாக அரசியலில் இருந்து விலகவோ விரும்புகிறாரா என்ற கேள்விகளையும் எழுப்புகிறது.
கமல்ஹாசனின் திமுகவுடனான நட்பு
தமிழக அரசியலில் கமல்ஹாசன் தனது 'மக்கள் நீதி மய்யம்' கட்சியை தொடங்கிய போது, வாரிசு அரசியலுக்கு எதிரான குரலாக திகழ்ந்தார். திமுகவின் குடும்ப அரசியல் மீது கடுமையான விமர்சனங்களை முன்வைத்து, "மாற்றத்துக்கான குரல்" என மக்கள் மத்தியில் முழங்கினார். ஆனால், இந்த கோஷங்களும் முழக்கங்களும் தற்போது மங்கியுள்ளன.
திமுகவைச் சாடிய முதல் அத்தியாயம்
கமலின் அரசியல் பயணத்தின் ஆரம்பம், வாரிசு அரசியலை கண்டித்து, அதை ஒழிக்க வேண்டும் என்ற கர்ஜனையுடன் தொடங்கியது. மக்கள் கூட, ஒரு சினிமா நடிகர் அரசியலுக்கு வந்தாலும், முற்றிலும் புதிய அரசியல் கோட்பாடு கொண்டு வருகின்றார் என்பதால் அவரது கருத்தை அங்கீகரித்தனர். ஆனால், முழு நேர அரசியல்வாதியாக களத்தில் முழுமையாக தன்னை ஈடுபடுத்தாமல், பார்ட்-டைம் அரசியல்வாதியாக செயல்பட்டது அவரின் முதன்மை தவறாகவே பார்க்கப்படுகிறது.
திமுகவுடன் உருவான புதிய நட்பு வட்டம்
திமுக அரசு வெற்றி பெற்ற பிறகு, கமல்ஹாசன் திமுகவுடனான அணுக்கத்துக்கு ஒரு புதிய பாதையை அமைத்தார். முதல்வர் மு.க. ஸ்டாலினை அவரது இல்லத்தில் சந்தித்த கமல், அரசியல் விமர்சனங்களை மறந்து திமுகவுடன் நட்பு வளர்க்க ஆர்வம் காட்டினார். இதன் தொடர்ச்சியாக துணை முதல்வர் உதயநிதி ஸ்டாலினுடன் கமலின் நெருக்கம் கூடுவதற்கான பல சம்பவங்கள் நடந்தன.
நட்பு அரசியல் மாற்றத்தை நோக்குமா?
திமுகவுடனான இந்த நட்பு வட்டம், கமலின் அடுத்த கட்ட அரசியல் செயல்பாடுகளை எளிதாக்கும் வகையில் அமைந்தாலும், அவரின் முதன்மை கோட்பாடுகளுக்கு எதிரானதாக பார்க்கப்படுகிறது. வாரிசு அரசியலுக்கு எதிராக குரல் கொடுத்தவர், தற்போது அதையே காப்பாற்றும் நிலையில் இருப்பது ஒரு சர்ச்சையான மாற்றமாகவே விளங்குகிறது. கமலின் இந்த நட்பை மக்கள் ஏற்றுக்கொள்வார்களா? அல்லது அவர் எப்போது மீண்டும் தனது முதன்மை கோட்பாடுகளை மறுபடியும் முன்வைப்பார் என்பதற்கான எதிர்பார்ப்பு தான் தற்போதைய நிலை. திமுகவுடனான கூட்டணி எனப்படும் 'நட்பு' கமலின் அரசியல் பயணத்தை எந்த திசையில் அழைத்துச் செல்லும் என்பதை எதிர்வரும் நாட்கள் மட்டுமே தீர்மானிக்கும்.
- குரு கிருஷ்ணன்
Click it and Unblock the Notifications
Sign in with Google