பிரதமரின் அன்பு கட்டளையை ஏற்போம்.. இந்தியனாய் இருப்போம்! தேசிய கொடியேற்ற சொல்லும் நடிகர் பார்த்திபன்

Updated: Sunday, August 7, 2022, 9:20 [IST]

Subscribe to Oneindia Tamil

சென்னை: பிரதமர் நரேந்திர மோடியின் அன்பு கட்டளையை ஏற்று வீட்டில் அனைவரும் தேசியக் கொடியை ஏற்றுவோம் என்று நடிகரும் இயக்குநருமான பார்த்திபன் கேட்டுக்கொண்டு இருக்கிறார்.

இந்தியாவின் 75 வது சுதந்திர தினத்தை மத்திய அரசு அமுத பெருவிழாவாக கொண்டாட தயாராகி வருகிறது. குறிப்பாக சுதந்திர தின விழாவுக்காக தேசியக்கொடி விதிமுறைகளில் மத்திய அரசு மாற்றங்களை செய்து இருக்கிறது.

கைத்தறி பருத்தி துணியால் மட்டுமே தேசிய கொடிகளை பயன்படுத்த வேண்டும் என்ற விதி இருந்த நிலையில், எந்திரத்தால் தயாரிக்கப்பட்ட பாலிஸ்டர், காட்டன், கம்பளி, பட்டு போன்றவற்றால் தயாரிக்கப்பட்ட தேசியக் கொடிகளை பயன்படுத்தலாம் என்று மத்திய அரசு அனுமதி வழங்கியுள்ளது.

மான் கி பாத்

இதற்காக கடந்த ஆகஸ்டு 2 ஆம் தேதியில் இருந்து சுதந்திர தினமான ஆகஸ்டு 15 ஆம் தேதி வரை சமூக வலைதள கணக்குகளின் புரொபைல் படங்களில் தேசிய கொடியை வைக்குமாறு பிரதமர் மோடி கேட்டுக்கொண்டார். இது தொடர்பாக கடந்த ஜூலை 31 ஆம் தேதி மான் கி பாத் வானொலி உரையில் நாட்டு மக்களிடம் பேசிய பிரதமர் நரேந்திர மோடி, "இந்த மான் கி பாத் உரை மிகவும் சிறப்புமிக்கது.

75 வது சுதந்திர தினம்

அதற்கு முக்கிய காரணம் இந்தியா சுதந்திரம் அடைந்து 75 வது ஆண்டை நிறைவு செய்து இருக்கிறது. நான் வரலாற்று சிறப்புமிக்க தருணத்தின் ஆதாரங்களாக விளங்குகிறோம். நாட்டுக்காக பல்வேறு தியாகங்களை செய்த புரட்சியாளர்களுக்கு எனது அஞ்சலியை நான் செலுத்துகிறேன். இந்திய சுதந்திரத்தின் அமுத பெருவிழா மக்கள் பேரியக்கமாக உருவெடுத்து இருப்பது எனக்கு மகிழ்ச்சியளிக்கிறது.

பிரதமர் மோடி ட்விட்டர் கணக்கு

ஆகஸ்டு 13 ஆம் தேதி முதல் ஆகஸ்டு 15 ஆம் தேதி தேதி வரை வீடுதோறும் தேசியக்கொடி ஏற்ற சிறப்பு ஏற்பாடு செய்யப்பட்டு இருக்கிறது. இந்த இயக்கத்தில் பங்கேற்று நீங்களும் உங்கள் இல்லங்களில் தேசியக்கொடியை ஏற்றி பறக்க விடுங்கள். இதனை தொடர்ந்து பிரதமர் நரேந்திர மோடி, மத்திய அமைச்சர்கள் என பலரும் தேசியக் கொடியை ட்விட்டர் கணக்கில் புரொபைல் படங்களாக வைத்துள்ளார்கள்.

இயக்குநர் பார்த்திபன்

இது குறித்து இயக்குநரும் நடிகருமான பார்த்திபன் வெளியிட்டு உள்ள வீடியோவில், "இந்தியர்கள் அனைவருக்கும் என்னுடைய பணிவான வணக்கம். இன்று நாம் சுதந்திர காற்றை சுவாசிக்கிறோம். சுதந்திரமாக யோசிக்கிறோம். சுதந்திரமாக செயல்படுகிறோம். இதெல்லாம் 75 ஆண்டுகளுக்கு முன்பாக வெறும் கனவாக மட்டுமே இருந்தது.

வீட்டில் கொடியேற்றுவோம்

இன்று 75 வது சுதந்திர தினத்தை சிறப்பாக கொண்டாட நமது பாரத பிரதமர் ஒரு அன்பு கட்டளை ஒன்றை விடுத்து உள்ளார். இது கட்டளையல்ல, கடமை. சுதந்திர தின அமுதப் பெருவிழாவை கொண்டாடும் விதத்தில் நம் இல்லங்களில் இந்த மூவர்ணக் கொடியை ஏற்றி, தாய், தந்தையரை வணங்குவதைபோல் நம் தாய் திருநாட்டை வணங்கி மகிழ்வோம்." என்று தெரிவித்து உள்ளார்.