அமலாக்கத்துறை ’தூக்கிய' செந்தில் பாலாஜி-மீண்டு வந்து கர்நாடகா டிகே சிவகுமார் போல பாஜகவை பந்தாடுவாரா?

சென்னை: மத்திய பாஜக அரசின் கட்டுப்பாட்டில் உள்ள அமலாக்கப் பிரிவு அதிகாரிகளால் கைது செய்யப்பட்டுள்ள தமிழ்நாடு அமைச்சர் செந்தில் பாலாஜியின் அரசியல் எதிர்காலம் தொடர்பாக சமூக வலைதளங்களில் பல்வேறு விவாதங்கள் நடைபெற்று வருகின்றன. அதில் ஒன்றுதான் அடுத்த டிகே சிவகுமாரா? என்பது.

கர்நாடகா மாநிலத்தில் இன்றைக்கு காங்கிரஸ் அபார வெற்றி பெற்று ஆட்சியில் அமர்ந்திருக்கிறது எனில் அதில் துணை முதல்வர் டிகே சிவகுமாரின் பங்களிப்பு பிரதானமானது என்பது மிகை அல்ல. ஆனால் இதே டிகே சிவகுமார்தான் பாஜகவுக்கு நெடுங்காலமாக சிம்ம சொப்பனமாகவே இருந்து வருகிறார். டிகே சிவகுமாரை கண்ட்ரோல் செய்வதற்காகவே அமலாக்கத்துறை ரெய்டுகள், கைதுகள், குடும்பத்தினருக்கு நெருக்கடி என எல்லாம் அரங்கேற்றமானது. ஓட ஓட விரட்டப்பட்டார் டிகே சிவகுமார். ஆனால் அவருக்கு அது ஆகப் பெரும் அனுதாபத்தை கொடுத்தது. மிகப் பெரிய நம்பிக்கையை தந்தது. அண்டை மாநிலத்து- மகாராஷ்டிரா மாநிலத்து நாராயண் ரானே போலவோ அஸ்ஸாம் மாநிலத்து ஹிமந்த பிஸ்வாஸ் போலவே பாஜகவுக்கு ஓடிப் போயிருந்தால் டிகே சிவகுமார் மீதான அத்தனை வழக்குகளும் இன்று காணாமலே போயிருக்கும். ஆனாலும் பாஜகவை முழு வீச்சோடு நின்று எதிர்த்தார். பாஜகவுக்கு எதிராக தேர்தல் களத்தில் வியூகம் வகுத்து செயல்பட்டார். இதன் விளைவாக தென்னிந்தியாவில் பாஜக ஆட்சி செய்கிற ஒற்றை மாநிலம் கர்நாடகா எனும் பெருமையை காலி செய்து கரி பூசி அனுப்பிவிட்டார் டிகேஎஸ். இப்போது கர்நாடகா மாநில துணை முதல்வராக பதவி வகித்து வருகிறார் டிகே சிவகுமார்.

இன்று தமிழ்நாட்டில் அமலாக்கத்துறை கைது செய்திருக்கக் கூடிய அமைச்சர் செந்தில் பாலாஜியும் கோவை மண்டலம் எனப்படும் மேற்கு தமிழ்நாட்டில் பாஜகவுக்கு ஆகப் பெரும் சவாலாக இருப்பவர். இந்த மேற்கு மண்டலத்தைத்தான் பாஜக மலைபோல நம்பி இருக்கிறது. இந்த மேற்கு மண்டலத்தைதான் மத்திய இணை அமைச்சர் எல்.முருகன் பதவி ஏற்ற போது கொங்கு நாடு அதிகாரப்பூர்வமற்ற தனி மாநிலமாக மத்திய அரசு எழுதியிருந்தது. இந்த கொங்கு மண்டலம், திமுகவுக்கு சவாலாக இருந்தது. இந்த சவால்களை காலி செய்து பாஜகவுக்கு மிரட்சியை தந்து கொண்டிருப்பவர் செந்தில் பாலாஜி. ஆகையால் அவருக்கு நெருக்கடி தந்து கைது செய்துவிட்டது; ஆனால் டிகே சிவகுமார் போல மீண்டும் வந்து பாஜகவை இன்னும் வெலவெலக்க வைப்பார் அண்ணன் செந்தில் பாலாஜி என நம்பிக்கையுடன் எழுதுகின்றனர் அவரது ஆதரவாளர்கள்.

English summary

Tamilnadu Minsiter Senthil Balaji supporters said that After the arrest, Senthil Balaji will emerge as Karnataka's DK Shivakumar against BJP.