என்னவாம்? அதிமுக மாவட்ட செயலாளர்கள் கூட்டம் முதலில் ரத்து- இப்ப அதிமுக செயற்குழு கூட்டம் கேன்சல்!

சென்னை: சென்னை அதிமுக தலைமை அலுவலகத்தில் ஏப்ரல் 7-ந் தேதி நடைபெற இருந்த அக்கட்சியின் செயற்குழு கூட்டம் திடீரென ரத்து செய்யப்பட்டுள்ளது.

அதிமுகவின் பொதுச்செயலாளராக எடப்பாடி பழனிசாமி அண்மையில் பொறுப்பேற்றார். அதிமுக பொதுச்செயலாளராக பதவியேற்ற எடப்பாடி பழனிசாமி, முதல் முறையாக அதிமுக தலைமை கழக நிர்வாகிகள் மற்றும் மாவட்ட செயலாளர்கள் கூட்டம் ஏப்ரல் 7-ந் தேதி சென்னையில் உள்ள அதிமுக தலைமை அலுவலகத்தில் நடைபெறும் என அறிவித்திருந்தார்.

ஆனால் திடீரென இந்த மாவட்ட செயலாளர்கள் கூட்டத்தை எடப்பாடி பழனிசாமி ரத்து செய்தார். இது தொடர்பாக வெளியிடப்பட்ட அறிவிப்பில், அதிமுக செயற்குழுக் கூட்டம் வரும் 07.04.2023 வெள்ளிக்கிழமை பகல் 12 மணிக்கு, சென்னை ராயப்பேட்டை, அவ்வை சண்முகம் சாலையில் உள்ள தலைமைக் கழகம் புரட்சித் தலைவர் எம்ஜிஆர் மாளிகையில், கழக அவைத் தலைவர் டாக்டர் அ.தமிழ்மகன் உசேன் தலைமையில் நடைபெறும். இக்கூட்டத்தில், கட்சியின் செயற்குழு உறுப்பினர்களான தலைமைக் கழகச் செயலாளர்கள், மாவட்ட கழகச் செயலாளர்கள், பிற மாநில கழகச் செயலாளர்கள், கட்சியின் நாடாளுமன்ற, சட்டமன்ற உறுப்பினர்கள், கட்சியின் தலைமைச் செயற்குழு உறுப்பினர்கள் (மகளிர்) அனைவரும் தவறாமல் கலந்துகொள்ள வேண்டும் என்று கேட்டுக்கொள்கிறேன்.
தலைமைக் கழகச் செயலாளர்கள், மாவட்டக் கழக செயலாளர்கள் ஆலோசனைக் கூட்டம் 7.4.2023 அன்று நடைபெறும் என தலைமைக் கழகத்தால் வெளியிடப்பட்ட அறிவிப்பு ரத்து செய்யப்படுகிறது என்பதையும் தெரிவித்துக் கொள்கிறேன் என கூறியிருந்தார்.

அதாவது மாவட்ட செயலாளர்கள் கூட்டம் ரத்து செய்யபப்ட்டு செயற்குழுக் கூட்டம் நடைபெறும் என அறிவிக்கப்பட்டிருந்தது. தற்போது அதிமுக தலைமை அலுவலகத்தில் ஏப்ரல் 7-ந் தேதி நடைபெற இருந்த அதிமுக செயற்குழுக் கூட்டமும் ரத்து செய்யப்பட்டுள்ளதாக அறிவிக்கப்பட்டுள்ளது. ஒரு சில காரணங்களுக்காக இந்தக் கூட்டம் ரத்து செய்யப்பட்டுள்ளதாக அதிமுக தலைமை அலுவலகம் தெரிவித்துள்ளது.

English summary

AIADMK canceled its executive meeting on April 7.