பாஜக வளருவது அதிமுகவுக்கும் தமிழகத்துக்கும் நல்லது அல்ல..எச்சரிக்கை தேவை-பொன்னையன் பேச்சால் பரபரப்பு
சென்னை: தமிழகத்தில் பாஜக வளருவது என்பது அதிமுகவுக்கு நல்லது அல்ல; ஆகையால் எச்சரிக்கையுடன் இருக்க வேண்டும் என்று அக்கட்சியின் மூத்த தலைவர் பொன்னையன் பேசியிருப்பது பெரும் பரபரப்பை கிளப்பி உள்ளது.
அதிமுகவில் யாருக்கு செல்வாக்கு என்பதில் ஓபிஎஸ், ஈபிஎஸ் கோஷ்டிகள் முட்டி மோதுவதை தொடர்ந்து வாடிக்கையாக வைத்து கொண்டிருக்கின்றன. இன்னொரு பக்கம் அதிமுகவுக்குள் நுழைந்துவிடுவது என்பதில் சசிகலா தீவிரமாக இருக்கிறார்.
ஓபிஎஸ், ஈபிஎஸ் தரப்பு தங்களது ஆதரவாளர்களை தக்க வைப்பதில்தான் கவனம் செலுத்துகின்றன. எதிர்க்கட்சியாக இருந்த போதும் ஆளுங்கட்சிக்கு எதிராக தீவிரமான செயல்பாடுகளை வெளிப்படுத்தாமல் இருக்கிறது. இதனால்தான் தாமும் இருக்கிறேன் என்பதற்காக ஈபிஎஸ் பேசுகிறார் என விமர்சனங்களை கடந்து செல்கிறது ஆளும் திமுக அரசு.
இன்னொரு பக்கம் பாஜகவோ, ஏதோ ஒரு பிரச்சனையை கிளப்பி லைம் லைட்டில் இருந்து கொண்டே இருக்கிறது. அதாவது அதிமுக செய்ய வேண்டிய வேலையை பாஜக செய்கிறதே என்கிற குமுறல் அதிமுகவிலேயே கேட்க முடிகிறது. அதிமுக தலைவர்கள் சம்பிரதாயத்துக்கான அறிக்கைகளை வெளியிடுவதுடன் நின்றுவிடுகிறார்கள் என்கிற ஆதங்கமும் அக்கட்சியில் இருந்து வருகிறது.
இந்த நிலையில் சென்னை அதிமுக தலைமை அலுவலகத்தில் அக்கட்சியினருக்கான பயிற்சி முகாம் நடைபெற்றது. இதில் எம்ஜிஆர் காலத்து அரசியல்வாதியான மூத்த அதிமுக தலைவர் பொன்னையன் பங்கேற்று பேசினார். அப்போது, பாஜகவைப் பொறுத்தவரை தமிழக நலனுக்கு எதுவும் குரல் கொடுப்பது இல்லை. காவிரி நதிநீர் விவகாரத்தில் பாஜக இரட்டை வேடம் போடக் கூடியது. பாஜகவால் தமிழ்நாட்டுக்கு எந்த பலனுமே இல்லை.
தமிழ்நாட்டில் அதிமுகவின் இடத்தில் பாஜக இருப்பதாக நம்ப வைக்கப்பட்டு வருகிறது. இப்படியான முயற்சி அதிமுகவின் எதிர்காலத்துக்கு நல்லது அல்ல. அதிமுகவை அழித்துவிட்டு அந்த இடத்தில் பாஜக உட்கார இருக்கிறது. அந்த கட்சி நம்முடைய கூட்டணியில் இருக்கிறது. இதனை பகிரங்கமாக பொதுவெளியில் பேசக் கூடிய சூழ்நிலை இல்லை. ஆனால் பாஜகவின் உண்மை முகத்தை சமூக வலைதளங்களில் அதிமுகவினர் அம்பலப்படுத்தி பிரசாரம் செய்ய வேண்டும். அதுதான் அதிமுகவின் எதிர்காலத்துக்கும் நல்லது என்றார் பொன்னையன். பொன்னையனின் இந்த பேச்சுதான் அதிமுக, பாஜக வட்டாரங்களில் விவாதப் பொருளாகி இருக்கிறது.
Click it and Unblock the Notifications
Sign in with Google