பாஜக- அதிமுக கூட்டணி சேர வேண்டும்.. ஆனால் எடப்பாடியை வைத்துக் கொண்டு எப்படி? துக்ளக் குருமூர்த்தி

சென்னை: பாஜகவும் அண்ணா திமுகவும் கூட்டணி சேரத்தான் வேண்டும்; பாஜகவுக்கு 10,12 சீட் அதிமுக கொடுத்திருந்தால் திமுகவுக்கு தனிப் பெரும்பான்மையே கிடைத்திருக்காது; ஸ்டாலினால் ஆட்சியே செய்திருக்க முடியாமல் திமுக ஆட்சி கவிழ்ந்திருக்கும் என்று துக்ளக் ஆசிரியர் குருமூர்த்தி தெரிவித்துள்ளார்.

சென்னையில் நேற்று நடைபெற்ற துக்ளக் 55-வது ஆண்டு விழாவில் இது தொடர்பாக துக்ளக் ஆசிரியர் குருமூர்த்தி பேசியதாவது: பாஜகவும் அதிமுகவும் சேர வேண்டும் என்பதில் நமக்கு சந்தேகமே இல்லை. ஆனால் எடப்பாடி பழனிசாமி என்ற ஒரு தலைவரை வைத்துக் கொண்டு எப்படி இந்த இணைப்பை ஏற்படுத்துவது என்பது எனக்குப் புரியவில்லை.

ஏனென்றால் எடப்பாடி பழனிசாமியுடன் தனிப்பட்ட முறையில் நான் பேசியிருக்கிறேன்; பழகியிருக்கிறேன். ஒரு அரசியல் தலைவருக்கு உரிய போக்கே அவரிடம் இல்லை. 10,12 சீட் கொடுத்திருந்தால் திமுகவுக்கு பெரும்பான்மை கிடைத்திருக்காது. அதிமுக-பாஜக வெற்றி பெறாதுதான்; ஆனால் திமுகவுக்கு தனிப்பெரும்பான்மை கிடைக்காது; 2006-ல் கருணாநிதி (மைனாரிட்டி) ஆட்சி செய்தது போல ஸ்டாலினால் ஆட்சி செய்ய முடியாமல் என்றைக்கு வேண்டுமானாலும் திமுக ஆட்சி கவிழும்; ஆட்சியில் பங்கு கேட்பவர்களுக்கு ஸ்டாலினால் மாட்டேன் என்று கூறிவிட முடியாது. இதை எடப்பாடி பழனிசாமி கேட்கவில்லையே.. யார் அவருக்கு ஆலோசனை கொடுக்கிறார்? யார் புள்ளி விவரம் கொடுக்கிறார்?

மிகப் பெரிய வாய்ப்பை நழுவ விட்டவர் எடப்பாடி பழனிசாமி. பாஜக- அதிமுக சேர வேண்டும் என்ற எண்ணத்தில் இருக்கிற நான் கூறுகிறேன், பாஜக தன்னுடைய நிலைமையை அதிகமாக மாற்றிக் கொண்டு அதிமுகவை கட்டிக் கொண்டால் பாஜகவுக்குதான் நட்டம் வரும் என்பதை அவர்கள் உணர வேண்டும். இவ்வாறு துக்ளக் குருமூர்த்தி பேசினார்.

English summary

Thuglak Editor Gurumurthy has questioned, 'The BJP-AIADMK alliance is desired, but how can it work with EPS in charge?.