என் வீட்டில் ED ரெய்டு பண்ணனும்னு சொல்றீங்களே.. 'சில்லியா' இருக்கு.. ஆவேசமாக பேசிய மாணவர் ஃபயாஸ்தீன்

சென்னை: நீட் தேர்வுக்கு எதிராக பேசி வருவதால் என் வீட்டில் அமலாக்கத்துறை சோதனை நடத்த வேண்டும் என்று பாஜகவினர் பேசி வருகிறார்கள் என்று திமுக சார்பில் நடத்தப்பட்ட நீட் எதிர்ப்பு உண்ணாவிரத போராட்டத்தில் பங்கேற்ற மருத்துவ மாணவர் ஃபயாஸ்தீன் கூறினார்.

சமீபத்தில் நீட் தேர்வு காரணமாக தற்கொலை செய்து கொண்ட மாணவன் ஜெகதீஷன் நண்பரான ஃபயாஸ்தீன் இன்று திமுக நடத்திய நீட் தேர்வுக்கு எதிரான உண்ணாவிரத போராட்டத்தில் கலந்து கொண்டார். அந்தக் கூட்டத்தில் கலந்து கொண்டு பேசிய மருத்துவ மாணவரான ஃபயாஸ்தீன் கூறியதாவது:- நீட்டை பொறுத்தவரை எதிர்ப்பதற்கு ஆயிரம் கருத்துக்கள் உள்ளது. ஏழைக் குடும்பத்தில் இருந்து வருபவர்களுக்கு டாக்டர் ஆக முடியாத சூழல் இருக்கிறது.

நீட் தேர்வு என்பதே ஒரு சாபக்கேடாக உள்ளது. இரண்டு வருஷம் கஷ்டப்பட்டு படிச்சி 400 ல இருந்து 500 மார்க் வாங்குனாலும் காசு இல்லாத ஒரே காரணத்திற்காக உனக்கு இங்கே மெடிக்கல் சீட் கிடையாது.. வெறும் 100 -150 மார்க் எடுத்துட்டு கையில் காசு வச்சிருந்தால் இந்தியாவில் இருக்கும் ஏதோ ஒரு மூலையில் இருக்கும் டீம் காலேஜில் சீட் கன்ஃபார்ம்.. என் தலைமுறையில் நான் தான் முதல் பட்டதாரி...

நான் ஒழுங்கா படிக்காவிட்டாலும் என் அப்பா லட்ச லட்சமாக காசு கொடுத்து என்னை டாக்டராக்க வேண்டும் என ஆசையில் சேர்த்து விட்டார். எனக்கு இந்த ஃபீல்டு பிடிச்சிருக்கு... ஜெகதீஷ் மூலமாகவும் மக்கள் மூலமாகவும் ஏதாவது ரெவலூஷன் கொண்டு வரனும் என யோசிச்சிட்டு இருக்கேன். நீட் எக்ஸாம் முழுக்க முழுக்க பண நோக்கத்துடன் தான் இருக்கு... நீங்க ஜஸ்ட் பாஸ் ஆனாலே போதும் இந்தியாவில் இருக்கும் ஏதோ ஒரு டீம் மெடிக்கல் கல்லூரியில் ரூ.25 லட்சம் ஆண்டுக்கு செலுத்தினால் வாங்கி விடலாம்.

சோஷியல் மீடியாவில் என்ன நினைக்கிறார்கள் என்றால்.. இது சட்ட விரோதமாக வாங்குறாங்க.. பிளாக்கில் வாங்குறாங்க என நினைக்கிறார்கள்.. இது லீகல் தான்.. மத்திய அரசு அனுமதியோடு இருக்கு... நீட் கொண்டு வருவதற்கு சொன்ன இரண்டு காரணம் என்னவென்றால், மருத்துவ மாணவர்களின் தரத்தை உறுதி செய்வது மற்றும் பணம் புரள்வதை தடுக்க போறோம் என்றார்கள். ஆனால் இரண்டையுமே பண்ணவில்லை.

பணம் தான் இங்கு எல்லாமே.. பணம் கொடுத்து டாக்டர் ஆகிறவர் பணத்தை சம்பாதிக்க வேண்டும் என்றுதான் நினைப்பார். பொதுமக்களுக்கு சர்வீஸ் பண்ண வேண்டும் என இருக்க மாட்டார். நமது அரசியல் அமைப்பின் அடிப்படை என்னவென்றால் கூட்டாட்சி.. மாநில சுயாட்சி... மாநிலங்கள் எல்லாம் சேர்த்துதான் ஒன்றிய அரசே தவிர.. ஒன்றிய அரசை சேர்த்து மாநில அரசு கிடையாது. நமக்கு எல்லா உரிமைகளும் இருக்கிறது.

முன்னாள் முதல்வர் அண்ணாதுரையும் இதைத்தான் சொல்லி இருக்கிறார். மருத்துவ மாணவராக சொல்கிறேன்.. தமிழ்நாடு அனைத்து மாநிலங்களுக்கும் ரோல் மாடலாக உள்ளது. மருத்துவ கட்டமைப்பு தமிழகத்தில் சிறப்பாக உள்ளது. உலகின் தலை சிறந்த மருத்துவர்கள்... நமது மாநில பாடத்திட்டத்தில் படித்தவர்கள்.

ஜெகதீஷ் மரணத்திற்கு பிறகு நான் இது பற்றி பேசுவதை பார்த்து விட்டு மத்திய அரசை ஆதரிக்கிறவர்களும் நீட் தேர்வை ஆதரிக்கிறவர்களும் தொடர்ந்து என் மேலே.. ஓபனா சொல்வது என்றால் பாஜக ஆதரவாளர்கள் எல்லாம்... என்னை வெட்டனும், குத்தனும் என்கிறார்கள். அதெல்லாம் சொன்னா கூட பரவா இல்லை..ED யை விட்டு சோதனை நடத்த வேண்டும் என்று சொல்கிறார்கள்.

இவன் அப்பா 25 லட்ச ரூபாய் கட்டுறாரு.. ரெய்டு பண்ணனும் என சொல்கிறார்கள்.. லீகலா வாங்குறாங்க... போய்.. மத்திய அரசை கேளுங்க.. அதை கேட்காமல் என்னை ரெய்டு பண்ணனும் சொல்லுறது சில்லியாக இருக்கிறது.. எனக்கு 19 வயதுதான் ஆகிறது... உங்களுக்கு கட்ஸ் இருந்தால் சித்தாந்தத்துடனும் புள்ளி விவரங்களுடன் பேசுங்கள்... மிரட்டலுடன் பேசாதீங்க... இவ்வாறு அவர் கூறினார்.

English summary

Fayasteen, a medical student who participated in the anti-NEET hunger strike organized by the DMK, said that the BJP is talking about the fact that the enforcement department should conduct a search at my house because I am speaking against the NEET exam.