விஜய்யிடம் ரூ.3 கோடி கடன் வாங்கிய புஸ்சி ஆனந்த்.. மகன், மகளும் கடனாளிகள்! வேட்பு மனுவில் தகவல்

சென்னை: தமிழக வெற்றிக் கழக தலைவர் விஜய் பெரம்பூர் மற்றும் திருச்சி கிழக்கு தொகுதிகளில் போட்டியிடும் நிலையில் இன்று பெரம்பூரில் வேட்புமனு தாக்கல் செய்தார். வேட்புமனுவில் சொத்து விவரங்களை குறிப்பிட்டு இருந்த நிலையில், அதில் தவெக பொதுச்செயலாளரான புஸ்சி ஆனந்துக்கு ரூ.3 கோடி கடன் கொடுத்திருப்பதாக கூறியுள்ளார். மேலும் மனைவி சங்கீதா, மகன், மகள், தாய், தந்தைக்கும் கடன் கொடுத்து இருப்பதாக கூறியிருக்கிறார்.

தமிழக வெற்றிக் கழக தலைவரும், நடிகருமான விஜய் வரும் சட்டசபை தேர்தலில் 2 தொகுதிகளில் போட்டியிடுகிறார். பெரம்பூர் மற்றும் திருச்சி கிழக்கு ஆகிய தொகுதிகளில் போட்டியிடுகிறார். வேட்பு மனு 4 நாட்கள் மட்டுமே தாக்கல் செய்ய முடியும் என்பதால் இன்று விஜய் முதல் நாளிலேயே பெரம்பூரில் வேட்புமனுவினை தாக்கல் செய்தார்.

அப்போது வேட்புமனுவில் விஜய் தன் சொத்து விவரங்களை குறிப்பிட்டு இருந்தார். குறிப்பாக அசையும் சொத்துக்கள் என்ன, அசையா சொத்துக்கள் என்ன போன்ற விவரங்களை குறிப்பிட்டிருந்தார். விஜய் தன் மீது எந்த வழக்குகளும் இல்லை என்பதையும் குறிப்பிட்டிருந்தார். மொத்தமாக ரூ.520 கோடி சொத்து இருப்பதாக குறிப்பிட்டுள்ளார்.

அதிலும் வங்கிக் கணக்குகளில் ரூ.278 கோடி மற்றும் 110 சவரன் தங்க நகைகள், ரூ.1 கோடி மதிப்பிலான வைர நகைகள், ரூ. 404.58 கோடி மதிப்பிலான அசையும் சொத்துகளும், ரூ. 11.51 கோடிக்கு அசையா சொத்துகள் இருப்பதாக அதில் குறிப்பிட்டுள்ளார். மேலும், ஐந்து கார்களும் உள்ளன என்றும், கடன் எதுவும் இல்லை என்றும் விஜய் தனது பிரமாண பத்திரத்தில் தெரிவித்து இருக்கிறார்.

மேலும் தவெக பொதுச்செயலாளராக உள்ள புஸ்சி ஆனந்த் என்னிடம் ரூ.3 கோடி கடன் வாங்கியிருப்பதாக விஜய் தனது பிரமாண பத்திரத்தில் குறிப்பிட்டுள்ளார். மேலும் தன் மனைவி சங்கீதாவுக்கு ரூ.12 கோடி கடன் கொடுத்துள்ளதாக அவர் கூறியுள்ளார். மேலும் மகன் சஞ்சய்க்கு 8 லட்சம் மற்றும் மகள் திவ்யாவுக்கு ரூ.4 லட்சம் கடன் கொடுத்துள்ளதாகவும், தாய் ஷோபா மற்றும் தந்தை சந்திரசேகருக்கு மொத்தம் ரூ.3.87 கோடி கடன் கொடுத்துள்ளதாகவும் கூறியுள்ளார்.

கார் மற்றும் பைக்குகளை பொறுத்தவரை விஜய்யிடம் மிக விலை உயர்ந்த காராக ரூ.3 கோடி மதிப்புள்ள டொயோட்டோ லெக்சஸ் கார் உள்ளது. இதேபோன்று முக விலை குறைந்ததாக டிவிஎஸ் எக்ஸெல் இருசக்கர வாகனமும் தன்னிடம் இருப்பதாக கூறியுள்ளார். ரூ.67 ஆயிரம் மதிப்பு கொண்ட இந்த எக்ஸெல் பைக்கை கடந்த ஆண்டு தான் விஜய் வாங்கினாராம்.

English summary

Bussy Anand Named in Vijays Affidavit; ₹3 Crore Loan Revealed During Perambur Nomination: Vijay filed his nomination in Perambur, contesting from two constituencies. In his affidavit, he disclosed lending ₹3 crore to party general secretary Bussy Anand and also mentioned loans given to his wife, children, and parents.