தேசிய கல்வி கொள்கையை தமிழக அரசு ஏற்க மறுக்கும் காரணம் என்ன?

சென்னை: தேசிய கல்வி கொள்கை (NEP) 2020-ன் மூன்று மொழி கொள்கைக்கு எதிராக தமிழகத்தில் மீண்டும் தீவிர எதிர்ப்பு எழுந்துள்ளது. தமிழகம், நீண்ட ஆண்டுகளாக பின்பற்றி வரும் இருமொழிக் கொள்கையை மாற்றும் எந்த முயற்சியையும் ஏற்க முடியாது என வலியுறுத்துகிறது.

NEP 2020-ன் அடிப்படையில் போவதாக இருந்தால், குறைந்தது 5-ம் வகுப்பு வரை மாணவர்கள் தங்கள் தாய்மொழியில் கல்வி பயில வேண்டும் என்ற நிபந்தனை முன்வைக்கப்பட்டுள்ளது. மேலும், சாத்தியமான இடங்களில் 8-ம் வகுப்பிற்குப் பிறகும் நீட்டிக்க வேண்டும் என்று பரிந்துரைக்கிறது.

மூன்று மொழி சூத்திரம், தாய்மொழியுடன் மற்றொரு இந்திய மொழி மற்றும் ஆங்கிலம் கற்றுக்கொள்ள வேண்டும் என்ற நிபந்தனையை முன்வைக்கிறது. இது, சமஸ்கிருதம் உள்ளிட்ட மொழிகளை விருப்ப பாடமாக சேர்ப்பதற்கும் வழிவகுக்கும். மூன்றாவது மொழியாக ஹிந்தி, சமஸ்கிருதம் தவிர வேறு எதையாவது எடுத்தால் அதற்கு ஆசிரியர்கள் இருப்பது கேள்விக்குறி என்ற வாதம் தமிழ் ஆர்வலர்களால் முன்வைக்கப்படுகிறது. 3 மொழிகளை கற்பது கட்டாயம் என்றால் அரசு பள்ளிகளில் மாணவர்கள் பாதியிலேயே படிப்பை கைவிட்டு கூலி வேலைக்கு செல்லும் நிலையும் உருவாகலாம் என்ற வாதங்களும் முன்வைக்கப்படுகின்றன. மேலும், தமிழ்நாடு அரசு, இதை தமிழ்மொழியை புறக்கணிக்கும் முயற்சியாக பார்க்கிறது.

1968 முதல்நீடிக்கும் மொழி விவாதம்

1968 முதல் மூன்று மொழிக் கொள்கை இந்தியாவில் பல இடங்களில் அமல்படுத்தப்பட்டு வந்தாலும், தமிழகம் தொடர்ந்து எதிர்த்து வந்தது. 1969-இல் ஹரியானா மாநிலம் தமிழ் மொழியை இரண்டாம் மொழியாக ஏற்றுக்கொண்டது, ஆனால் 2010-இல் இதை கைவிட்டது. இதுபோல், தெலுங்கு மற்றும் தமிழ் மொழிக்கான ஆசிரியர்கள் பற்றாக்குறை காரணமாக, ஹிமாச்சல் பிரதேசம் இதை நடைமுறைப்படுத்த முடியாமல் தவித்தது.

மொழி சார்ந்த சிக்கல்கள்

தமிழக அரசியல் கட்சிகள், தேசிய அளவில் இந்த மூன்று மொழிக் கொள்கையை எதிர்த்தும், மாநிலத்திற்கு தனி சிறப்பு வழங்கக்கோரி வலியுறுத்தி வருகின்றன. தமிழகம், பள்ளிகளில் தமிழ் மற்றும் ஆங்கிலம் மட்டுமே போதுமானது என கூறி, இந்தக் கொள்கையை ஏற்க மறுக்கிறது.

முதல்வர் மு.க. ஸ்டாலின் உள்ளிட்ட தலைவர்கள், மொழிகளை ஏற்றுக்கொள்வது நல்லது என்றாலும், மாணவர்களுக்கு தேவையில்லாத திணிப்பு ஏற்படுத்தக் கூடாது என தெரிவிக்கின்றனர். இதற்கிடையில், தமிழ் ஆர்வலர்கள், 'மூன்று மொழிக் கொள்கை, பிராந்திய மொழிகளை புறக்கணிக்கும் சூழலை உருவாக்கும்' எனக் கண்டனம் தெரிவிக்கின்றனர்.

NEP 2020-யை உருவாக்கிய குழுவின் தலைவர், முன்னாள் ISRO தலைவர் கஸ்தூரி ரங்கன், 'இளம் வயதில் பல மொழிகள் கற்றுக்கொள்ளும் மாணவர்கள், நல்ல அறிவாற்றல் வளர்ச்சியை அடைவர்' என வலியுறுத்தினார். இது கல்வித் தரத்தை உயர்த்தும் என்றபோதும், மாநில அரசுகளின் மொழிக் கொள்கைகளுடன் இது முரண்படுகிறது.

எதிர்கால பாதை?

NEP 2020-ன் அடிப்படையில், மத்திய இடைநிலை கல்வி வாரியம் (CBSE) 10-ம் வகுப்பிற்கு முன் இரண்டு இந்திய மொழிகளை கட்டாயமாக்க முயற்சி செய்து வருகிறது. இதேபோல், 11, 12-ம் வகுப்புகளில் ஒரு இந்திய மொழியுடன், வெளிநாட்டு மொழிகளை தேர்வுசெய்யும் வாய்ப்பும் வழங்கப்பட்டுள்ளது.

இந்த சூழலில், தமிழ்நாடு தனித்துவமான கல்வி கொள்கையை கையாள வேண்டிய நிலை ஏற்பட்டுள்ளது. இதனால் இரண்டாயிரம் கோடி அளவுக்கு வர வேண்டிய மத்திய அரசின் கல்வி நிதியையும் இழக்கும் சூழல் உருவாகியுள்ளது. மூன்று மொழி கொள்கை எதிர்கொள்ளும் நடைமுறை சிக்கல்களை மாநிலம் எவ்வாறு சமாளிக்கிறது என்பதற்காக, அடுத்த கட்ட நடவடிக்கைகள் பரிசீலனையில் உள்ளன.

NEP 2020-ன் மூன்று மொழி கொள்கை தமிழ்நாட்டிற்கு ஏற்றதா? இதனால் மாணவர்களுக்கு ஏற்படும் சவால்கள் குறித்து உங்கள் கருத்துகளை தெரிவியுங்கள்!

English summary

Tamil Nadu has strongly opposed the three-language policy in India's National Education Policy (NEP) 2020, reigniting debates on language education. The policy promotes multilingual learning and emphasizes mother tongue-based education until at least Grade 5, with flexibility to extend further. While NEP 2020 aims to enhance cognitive benefits through early multilingual exposure, Tamil Nadu insists on its two-language formula, rejecting any deviation. The policy also includes provisions for classical and foreign languages, but its implementation faces challenges such as teacher availability and regional adaptation. The ongoing debate highlights India's linguistic diversity and the need for flexible education policies.