சென்னை தினம்.. “அதான் மாத்தியாச்சுல”.. ஆளுநர் ரவி வெளியிட்ட வாழ்த்தால் சர்ச்சை!

சென்னை: இன்று சென்னை தினம் கொண்டாடப்படும் நிலையில் ஆளுநர் ஆர்.என்.ரவி தமிழில் 'மெட்ராஸ் தினம்' எனக் குறிப்பிட்டு வாழ்த்து தெரிவித்துள்ளது சர்ச்சையை ஏற்படுத்தியுள்ளது.

இன்று 384-வது'சென்னை தினம்' கொண்டாடப்படுகிறது. இதனையடுத்து, தமிழக அரசு சார்பிலும், சென்னை மாநகராட்சி சார்பிலும் சென்னையில் பல்வேறு கலைநிகழ்ச்சிகள் நடைபெறுகிறது. சென்னை தினத்தையொட்டி, அரசியல் தலைவர்களும், பொதுமக்களும் சென்னை தின வாழ்த்துகளைத் தெரிவித்து வருகின்றனர். இந்த நிலையில் தமிழக ஆளுநர் ஆர்.என்.ரவி 'மெட்ராஸ்' தின வாழ்த்து எனத் தெரிவித்துள்ளார்.

ஆளுநர் ரவி தமிழிலும், ஆங்கிலத்திலும் வெளியிட்டுள்ள வாழ்த்துப் பதிவில், "மெட்ராஸ் தினத்தில் அனைவருக்கும் எனது அன்பான வாழ்த்துக்கள்! வியப்பூட்டும் கலாசார பன்முகத்தன்மை, ஆழமாக வேரூன்றிய ஆன்மிகம், அறிவார்ந்த வலிமை ஆகியவற்றின் இந்த தொடர்ச்சியை அதே ஆர்வத்துடனும் அர்ப்பணிப்புடனும் மேலும் முன்னெடுத்து கொண்டாடுவோம்" என தெரிவித்துள்ளார்.

மெட்ராஸ் என்ற பெயர் சென்னை என அதிகாரப்பூர்வமாக மாற்றப்பட்ட பிறகு, தமிழில் 'சென்னை தினம்' என்றே கொண்டாடப்பட்டு வருகிறது. இந்நிலையில் ஆளுநர் ஆர்.என்.ரவி மெட்ராஸ் எனப் பதிவிட்டு வாழ்த்து தெரிவித்துள்ளது மக்கள் மத்தியில் சர்ச்சையை ஏற்படுத்தியுள்ளது.

பொது நிகழ்ச்சிகளில் ஆளுநர் ரவி தமிழில் பேசி வருகிறார். பல மாதங்களாக தமிழ் கற்றுக்கொண்டு வரும் ஆளுநர் ரவி, தற்போது ஓரளவுக்கு தமிழை நன்றாகவே பேசி வருகிறார். அப்படி இருக்கும்போது, இன்று ஆளுநர் வெளியிட்டுள்ள பதிவில் 'மெட்ராஸ்' தினம் எனக் குறிப்பிட்டுள்ளது சர்ச்சையை ஏற்படுத்தியுள்ளது.

English summary

After the name of Madras was officially changed to Chennai, the Governor MK Stalin greeting by referring to it as 'Madras' in Tamil, causing controversy.