ரூ 24.50 கோடி மோசடி! பாஜக வேட்பாளர் தேவநாதன் யாதவ்வின் ஜாமீன் மனு தள்ளுபடி! ஹைகோர்ட் அதிரடி

Updated: Tuesday, October 29, 2024, 13:40 [IST]

Subscribe to Oneindia Tamil

சென்னை: நிதி நிறுவன மோசடி வழக்கில் கைது செய்யப்பட்ட தேவநாதன் யாதவை ஜாமீனில் விடுவிக்க சென்னை உயர்நீதிமன்றம் மறுத்துவிட்டது.

சென்னை மயிலாப்பூரில் செயல்பட்டு வந்த தி மயிலாப்பூர் இந்து பெர்மனெட் ஃபண்ட் நிதி நிறுவனத்தில் முதலீடு செய்த 144 முதலீட்டாளர்களிடம் 24 கோடியே 50 லட்சம் ரூபாய் மோசடி செய்ததாக அந்நிதி நிறுவனத்தின் இயக்குனரும் பாஜக கூட்டணி கட்சி தலைவருமான தேவநாதன் யாதவ் உள்பட 6 பேரை பொருளாதார குற்றப்பிரிவு காவல் துறையினர் கைது செய்தனர்.

இந்த வழக்கில் ஜாமீன் கோரி தேவநாதன் உள்பட 3 பேர் தாக்கல் செய்த மனுக்களை ஏற்கனவே சிறப்பு நீதிமன்றம் இரண்டுமுறை தள்ளுபடி செய்துள்ளது. இதையடுத்து சென்னை உயர்நீதிமன்றத்தில், தேவநாதன் யாதவ் மற்றும் குணசீலன் ஆகியோர் ஜாமீன் கேட்டு மனு தாக்கல் செய்திருந்தனர்.

இந்த வழக்கு நீதிபதி தனபால் முன்பு விசாரணைக் கொண்டபோது, கூடுதல் குற்றவியல் வழக்கறிஞர் சி. முனியப்பராஜ் ஆஜராகி, புலன் விசாரணை தொடர்ந்து நடைபெற்று வருவதாகவும், விசாரணை 4000 ஆயிரத்துக்கும் மேற்பட்டோர் புகார் அளித்துள்ளதாக குறிப்பிட்டார்.

இருவரையும் ஜாமீனில் விடுவிக்க கூடாது என எதிர்ப்பு தெரிவித்தார். பாதிக்கப்பட்ட முதலீட்டாளர்கள் சங்கத்தின் சார்பில் வழக்கறிஞர் திருமூர்த்தி ஆஜராகி, பொது மக்களின் பணம் 600 கோடி ரூபாய் தொடர்புடைய மோசடி இது என்றும், தேவநாதன் இந்த நிதி நிறுவனத்தின் இயக்குனர் ஆவதற்கு முன்பு நிதிநிலைமை சீராக இருந்தது ஆனால் அவர் இயக்குனர் ஆன பின்பு மோசமாகிவிட்டதாக தெரிவித்தார்.

பொருளாதார குற்றங்களை தீவிரமாக கருத வேண்டும் என கேட்டுக் கொண்டார். அனைத்து தரப்பு வாதங்களுக்கு கேட்ட நீதிபதி தேவநாதன் மற்றும் இயக்குனர் குணசீலன் ஆகியோர் ஜாமீன் மனுவை தள்ளுபடி செய்து உத்தரவிட்டுள்ளார்.