இதுக்குத்தானே காத்திருந்தாங்க.. பொங்கலுக்கு சென்னையில் நடக்க போகும் தரமான சம்பவம்.. செம மாற்றம்!

சென்னை: பொங்கல் பண்டிகையில் இருந்து சென்னையில் இரண்டு இடங்களில் படகு போக்குவரத்து தொடங்க உள்ளது. சென்னை மக்களுக்கு இந்த இரண்டு இடங்களும் புதிய சுற்றுலா தளங்களாக மாறும் சூழல் ஏற்பட்டு உள்ளது.

பொங்கல் பண்டிகைக்குள் மாதவரம் ஏரி மற்றும் அதனுடன் இணைந்த மணலி ஏரிகளில் படகுச் சவாரி வசதிகள் ஏற்படுத்தப்படவுள்ளன. பெருநகர சென்னை மாநகராட்சியின் (GCC) தொடர் முயற்சிகளால் இந்த ஏரிகள் தற்போது தூர்வாரப்பட்டு, தூய்மைப்படுத்தப்பட்டுள்ளன. மாதவரம் ஏரி 66 ஏக்கர் பரப்பளவையும், மணலி ஏரி 29 ஏக்கர் பரப்பளவையும் கொண்டவை.

தமிழ்நாடு சுற்றுலா வளர்ச்சிக் கழகம்

தமிழ்நாடு சுற்றுலா வளர்ச்சிக் கழகம் (TTDC) படகுச் சவாரி சேவைகளை அறிமுகப்படுத்துவதற்கான சாத்தியக்கூறு ஆய்வை நிறைவு செய்துள்ளது. மோட்டார் படகுகளை இயக்குவதற்கு ஏரிகளின் ஆழம் போதுமானதாக உள்ளதா என்பதைத் தீர்மானிக்க கடந்த சில நாட்களாகச் சோதனை ஓட்டங்களையும் நடத்தியது. TTDC, மோட்டார் படகுகள், பெடல் படகுகள், மற்றும் துடுப்புப் படகுகளை ஏரிகளில் பயன்படுத்துவதற்காக வாங்கத் திட்டமிட்டுள்ளதாக வட்டாரங்கள் தெரிவிக்கின்றன.

மாநகராட்சி வட்டாரங்கள் இத்திட்டம் குறித்துப் பேசுகையில், மாதவரம் ஏரியைத் தூர்வாரும் மற்றும் சுத்தம் செய்யும் பணிகள் ஜூன் 2024 இல் தொடங்கி, அதே ஆண்டு செப்டம்பரில் நிறைவடைந்தன என்றன. முதல் கட்டப் பணிகளுக்காக ₹4.56 கோடி செலவிடப்பட்டது. இந்தப் பணி ஏரியின் ஆழத்தை அதிகரித்து, அதிக நீர் சேமிப்பிற்கு வழிவகுத்துள்ளது. தூர்வாரப்பட்ட மண் ஏரிக் கரைகளை வலுப்படுத்தப் பயன்படுத்தப்பட்டது.

மணலி ஏரியில் 1.8 கி.மீ நீளப் பாதசாரி நடைபாதை

மேலும், ஏரிக் கரைகளில் வெட்டிவேர் புல் (Chrysopogon zizanioides) நடப்பட்டுள்ளது. இதன் வேர்கள் மண்ணை இறுக்கமாகப் பிடித்து, மண் அரிப்பைத் தடுக்கும். தற்போது 750 மீட்டர் நீள நடைபாதை தயாராக உள்ளது, மேலும் 1,650 மீட்டர் நீளத்திற்கு நீட்டிக்கும் பணிகள் நடைபெற்று வருகின்றன. இன்னும் இரண்டு வாரங்களில், ஏரியைச் சுற்றி 2.3 கி.மீ தூரத்திற்கு முழுமையாக நடந்து செல்ல முடியும்.

இந்த ஏரிப் பகுதிகளில் வெளிச்ச வசதி, அமரும் இடங்கள், கழிப்பறைகள், வாகன நிறுத்துமிடங்கள் மற்றும் காத்திருப்புப் பகுதிகள் போன்ற அத்தியாவசிய அடிப்படை வசதிகள் தற்போது உருவாக்கப்பட்டு வருகின்றன. மாதவரம் ஏரியில் இருந்து உபரிநீரை பெறும் மணலி ஏரியில் 1.8 கி.மீ நீளப் பாதசாரி நடைபாதை உள்ளது. இதன் 95% பணிகள் நிறைவடைந்துள்ளன, வெறும் சரளைக்கல் இடும் பணி மட்டுமே பாக்கியுள்ளதாக மாநகராட்சி தெரிவித்துள்ளது.

மணலி ஏரியின் சுற்றுச்சுவர் கட்டுதல், நடைமேடை அமைத்தல் மற்றும் பிற மேம்பாட்டுப் பணிகளுக்கு சுமார் ₹11.75 கோடி செலவாகும் என எதிர்பார்க்கப்படுகிறது. வறண்ட காலங்களில் கழிவுநீர் ஏரிகளுக்குள் கலப்பதைத் தடுக்க மதகுகள் பொருத்தப்பட்டுள்ளன. மணலி ஏரியில் இருந்து வரும் உபரிநீர் ஆதன் பின்னர் புழல் உபரி கால்வாயில் கலக்கிறது. எர்ணாவூர் ஏரியிலும் படகுச் சவாரி வசதி அமைக்க திட்டமிடப்பட்டுள்ளதாக அதிகாரப்பூர்வத் தகவல்கள் கூறுகின்றன.

இது தொடர்பாக அப்பகுதி மக்கள் கூறுகையில், மணலி, மாதவரம் மற்றும் அதைச் சுற்றியுள்ள பகுதிகளில் அடிக்கடி நீர்த் தட்டுப்பாடு ஏற்படுவதால், இந்த ஏரிகளை குடிநீர் விநியோகத்திற்குப் பயன்படுத்தலாம் என்றார். பக்கிங்காம் கால்வாய் போன்ற முக்கிய கால்வாய்களையும் படகுச் சவாரி நோக்கங்களுக்காக புத்துயிர் பெறச் செய்யலாம் எனவும் அவர் மேலும் தெரிவித்தார்.

English summary

Chennai Madhavaram and Manali lake boat ride will be starting this Pongal Chennai