மெட்ரோவில் மொபைல் போன் பேசுறீங்களா? ரயிலில் சத்தமா பேசினா ரூ.500 அபராதம்.. சென்னை பயணிகளுக்கு அதிரடி

Updated: Sunday, April 19, 2026, 16:53 [IST]

Subscribe to Oneindia Tamil

சென்னை: சென்னை மெட்ரோ ரயிலில் பயணிக்கும் போது சக பயணிகளுக்கு இடையூறு விளைவிக்கும் வகையில் சத்தமாகப் பேசினால் 500 ரூபாய் அபராதம் விதிக்கப்படும் என்ற அறிவிப்பு, அன்றாட பயணிகளிடையே பெரும் விவாதத்தையும் வரவேற்பையும் பெற்றுள்ளது. நவீன போக்குவரத்து வசதியாகக் கருதப்படும் மெட்ரோவில், அமைதியான பயணச் சூழலை உருவாக்க வேண்டியது அவசியம் என்பதை வலியுறுத்தி இந்த அதிரடி நடவடிக்கை எடுக்கப்பட்டுள்ளது.

சென்னையில் போக்குவரத்து நெரிசலைக் குறைப்பதில் மெட்ரோ ரயில் முக்கியப் பங்கு வகிக்கிறது. அலுவலகம் செல்பவர்கள், மாணவர்கள் எனப் பலதரப்பட்ட மக்கள் இதனைப் பயன்படுத்தி வருகிறார்கள்.

பொதுவாக மெட்ரோ பயணங்கள் அமைதியாக இருக்கும் என்று எதிர்பார்க்கப்படும் நிலையில், சமீபகாலமாகச் சில பயணிகளின் செயல்பாடுகள் மற்றவர்களுக்கு எரிச்சலூட்டும் வகையில் அமைந்திருப்பதாகப் புகார்கள் எழுந்தன.

சென்னை மெட்ரோ அதிரடி ரூல்ஸ்

குறிப்பாக செல்போனில் அதிக சத்தத்துடன் உரையாடுவது, சமூக வலைதள வீடியோக்களை மற்றவர்கள் கேட்கும் வகையில் ஒலிக்க விடுவது மற்றும் குழுவாகச் சேர்ந்து சத்தமாகப் பேசி ரகளையில் ஈடுபடுவது போன்ற புகார்கள் மெட்ரோ நிர்வாகத்திற்குத் தொடர்ந்து சென்ற வண்ணம் இருந்தன.

இதனை முறைப்படுத்த சென்னை மெட்ரோ ரயில் நிர்வாகம் இப்போது சட்ட ரீதியான நடவடிக்கையில் இறங்கியுள்ளது. மெட்ரோ ரயில் (இயக்கம் மற்றும் பராமரிப்பு) சட்டம் 2002-ன் கீழ், மற்ற பயணிகளுக்குத் தொந்தரவு கொடுப்பது தண்டனைக்குரிய செயலாகும். இதன் அடிப்படையில், இனி ரயிலுக்குள் சத்தமாகப் பேசுபவர்களுக்கும், விதிமுறைகளை மீறுபவர்களுக்கும் 500 ரூபாய் அபராதம் விதிக்கப்படும் என எச்சரிக்கை விடுக்கப்பட்டுள்ளது.

ரயில் பயணிகளுக்கு நோ இடையூறு

இந்த விதிமுறையின்படி, பயணிகள் தங்களது செல்போனில் பேசும்போது மிகக் குறைந்த தொனியில் பேச வேண்டும். மற்றவர்களுக்குக் கேட்கும் வகையில் ஸ்பீக்கர் போட்டு பேசுவதைத் தவிர்க்க வேண்டும்.

அதேபோல், சினிமா பாடல்கள் அல்லது வீடியோக்களைப் பார்க்கும்போது கண்டிப்பாக ஹெட்போன் பயன்படுத்த வேண்டும். ஒருவேளை மற்ற பயணிகள் உங்கள் பேச்சால் அல்லது செயலால் பாதிக்கப்படுகிறோம் என்று புகார் அளித்தால், உடனடியாக நடவடிக்கை எடுக்கப்படும்.

இதைச் சோதனையிட ரயில்களில் சீருடை அணியாத அதிகாரிகள் மற்றும் பாதுகாப்புப் படையினர் ரோந்துப் பணியில் ஈடுபடுத்தப்பட உள்ளனர். குறிப்பாகப் பெண்கள் மற்றும் முதியவர்கள் பயணிக்கும் பெட்டிகளில் இத்தகைய இடையூறுகள் அதிகமாக இருப்பதாகக் கருதப்படுவதால், அங்கு கண்காணிப்பு பலப்படுத்தப்பட்டுள்ளது. பிடிபடுபவர்களிடம் இருந்து அபராதம் வசூலிக்கப்படுவதோடு, மீண்டும் அதே தவறைச் செய்தால் ரயிலில் இருந்து இறக்கிவிடவும் வாய்ப்புள்ளது.

பொதுமக்கள் ஆதரவு

பொது இடங்களில் எப்படி நடந்து கொள்ள வேண்டும் என்ற சமூகப் பொறுப்பை பயணிகளிடம் வளர்க்கவே இந்த அபராதம் விதிக்கப்படுவதாக நிர்வாகம் தரப்பில் கூறப்படுகிறது.

அமைதியான பயணத்தை விரும்பும் பல ஆயிரக்கணக்கான பயணிகளுக்கு இந்த அறிவிப்பு பெரும் நிம்மதியை அளித்துள்ளது. மெட்ரோ ரயில் பயணத்தின் தரத்தை மேம்படுத்தவும், சர்வதேச தரத்திலான பயண அனுபவத்தை வழங்கவும் சென்னை மெட்ரோ எடுத்துள்ள இந்த முயற்சிக்கு மக்கள் மத்தியில் ஆதரவு பெருகி வருகிறது.