பூந்தமல்லி டூ போரூர் ஒருபக்கம்.. ஓஎம்ஆர் டூ மாதவரம் மறுபக்கம்.. சென்னை மெட்ரோ அதிரடி.. வருது மாற்றம்
சென்னை: சென்னையில் மெட்ரோ ரயில் பணிகள் காரணமாக சாலைகள் பல இடங்களில் சேதம் அடைந்து வரும் நிலையில், அந்த சாலைகள் அனைத்தும் சீரமைக்கப்படும் என சென்னை மெட்ரோ ரயில் நிர்வாகம் அறிவித்துள்ளது.
சென்னையில் விமானநிலையம் முதல் விம்கோ நகர் (திருவெற்றியூர்) வரையிலும், பரங்கிமலை முதல் கோயம்பேடு, அண்ணா நகர், சென்ட்ரல் வழியாக விம்கோ நகர் என இரு வழித்தடங்களில் 55 கிமீ தூரத்திற்கு மெட்ரோ ரயில் ஓடுகிறது. இரண்டாவது கட்டமாக சோழிங்கநல்லூர் முதல் மாதவரம் வரையிலும், கலங்கரை விளக்கம் முதல் பூந்தமல்லி வரையிலும் மெட்ரோ ரயில்கள் பணிகள் நடந்து வருகிறது. மொத்தம் 3 வழித்தடங்களில் மெட்ரோ ரயில் பணிகள் நடந்து வரும் நிலையில், சாலைகள் எல்லாம் சேதம் அடைந்துள்ளன. போக்குவரத்து நெரிசல் காரணமாக போக்குவரத்தும் பாதிக்கப்பட்டுள்ளது.
இந்நிலையில் மெட்ரோ ரயில் பணிகள் நடந்து வரும் பகுதிகளில் சாலையை விரைந்து சீரமைக்க வேண்டும் என்று பொதுமக்கள் கோரிக்கை வைத்து வந்தனர். இந்த கோரிக்கையை சென்னை மெட்ரோ ரயில் நிறுவனம் ஏற்றுக்கொண்டுள்ளது.
இந்நிலையில் சென்னை மெட்ரோ ரயில் நிறுவனம் வெளியிட்டுள்ள அறிவிப்பில், " சென்னையில் மெட்ரோ ரயில் பணிகள் நடைபெற்று வரும் அனைத்து இடங்களிலும் குறிப்பாக பூந்தமல்லி நெடுஞ்சாலையில் பூந்தமல்லி முதல் போரூர் வரை சேதமடைந்த சாலையை சீரமைக்கும் பணிகள் இருபுறமும் நடைபெற்று வருகின்றன.
தற்போது பூந்தமல்லி முதல் போரூர் வரை நெடுஞ்சாலையில் 3.7 கி.மீ நீளத்துக்கு சாலை போடப்பட்டு, சீரமைப்புப்பணிகள் 75 சதவீதம் நிறைவடைந்துள்ளது. ஆற்காடு சாலையில் 11.6 கி.மீ. சாலைபோடப்பட்டு, 87 சதவீத சாலை சீரமைப்புப் பணிகள் நிறைவடைந்துள்ளன.
அதேபோல, மேடவாக்கம் சாலையில் 2 கி.மீ. நீளத்துக்கு சாலை போடப்பட்டு, 65 சதவீத சாலை சீரமைக்கும் பணிகள் நிறைவடைந்துள்ளன.இந்த சாலைகளில் வாகனங்கள் சுலபமாகச் செல்ல முடியும். திருவொற்றியூர், மாதவரம், மற்றும் ஓ.எம்.ஆர். நெடுஞ்சாலைகளிலும் சேதமடைந்த சாலைகள் அனைத்தும் பழுதுபார்க்கப்பட்டு சீரமைக்கப்பட்டுவிட்டன.
வடகிழக்குப் பருவ மழையைக் கருத்தில் கொண்டும், பொதுமக்கள் மற்றும் வாகன ஓட்டிகளின் நலன் கருதியும் சாலை சீரமைக்கும் பணிகள் மிகவும் துரிதமாக நடைபெற்று வருகின்றன. இதேபோன்று, சென்னை மெட்ரோ ரயில் பணிகள் நடைபெற்று வரும் அனைத்து இடங்களிலும் சாலைகள் சேதமடைந்தால் உடனே அந்த சாலைகள் சீரமைக்கப்படும் என தெரிவித்துள்ளது.
Click it and Unblock the Notifications
Sign in with Google