சின்மயி, கஸ்தூரி, மதுவந்தி.. சென்னை துப்புரவு பணியாளர்கள் போராட்டம்.. அடுத்தடுத்து வந்த ஆதரவு
சென்னை: ராயபுரம் மற்றும் திரு.வி.க. நகர் மண்டலங்களில் துப்புரவுப் பணியாளர்கள் போராட்டம் நடத்தி வருகின்றனர். நேற்று விடாத மழையிலும் அவர்கள் தொடர் போராட்டம் செய்தனர். இந்த போராட்டத்திற்கு சினிமா பிரபலங்கள் சின்மயி, கஸ்தூரி, மதுவந்தி ஆகியோர் கடந்த சில நாட்களாக ஆதரவு தெரிவித்தனர்.
அவர்கள் நடத்தி வந்த போராட்டம் பத்தாவது நாளாக நீடித்த நிலையில், பெருநகர சென்னை மாநகராட்சி (GCC) தனியார் நிறுவனத்தின் பணியாளர்களைக் கொண்டு வழக்கமான குப்பை அகற்றும் பணிகளை முறைப்படி தொடங்கி உள்ளது. துப்புரவுப் பணியாளர்களுக்கு நான்கு மாதங்களுக்குள் ஊதிய திருத்தம் செய்யப்படும். அதனால் ஊழியர்கள் போராட்டத்தை கைவிட வேண்டும் என்று சென்னை மாநகராட்சியின் மூத்த அதிகாரிகள் தெரிவித்துள்ளனர்.
தற்காலிக பணியாளர்கள்
ராயபுரம் மற்றும் திரு.வி.க. நகர் மண்டலங்களில் சுமார் 150 தற்காலிக சுகாதாரப் பணியாளர்கள் பணியைத் தொடங்கியுள்ளதாக சென்னை மாநகராட்சி வட்டாரங்கள் தெரிவிக்கின்றன
சென்னை மாநகராட்சி வட்டாரங்களின்படி, நேற்று முதல் ராயபுரம் மற்றும் திரு.வி.க. நகர் மண்டலங்களில் (மண்டலங்கள் V மற்றும் VI) திடக்கழிவு மேலாண்மைக்காக ஒப்பந்தம் செய்யப்பட்ட ராம்கி என்விரோ இன்ஜினியர்ஸ் லிமிடெட் என்ற தனியார் நிறுவனம் மூலம் சுமார் 150 தற்காலிக சுகாதாரப் பணியாளர்கள் பணியைத் தொடங்கினர். வரும் நாட்களில் 300-க்கும் மேற்பட்ட பணியாளர்கள் இணைவார்கள் என்று வட்டாரங்கள் தெரிவித்தன.
சென்னை துப்புரவு பணியாளர்கள்
"இந்தப் பணியாளர்கள் இதற்கு முன்னர் தேசிய நகர்ப்புற வாழ்வாதார இயக்கம் (NULM) மூலம் சென்னை மாநகராட்சியில் பணிபுரிந்தவர்கள். தற்போது சம்மதக் கடிதங்களைச் சமர்ப்பித்து புதிய நிறுவனத்தில் இணைந்துள்ளனர். ஒப்பந்தத்தின்படி 3,809 சுகாதாரப் பணியாளர்களை நியமிக்க நிறுவனம் தேவைப்பட்டாலும், இதுவரை 1,770 பேரை மட்டுமே நியமித்துள்ளது. மீதமுள்ள 2,039 பணியிடங்கள் (மண்டலம் V-ல் 975 மற்றும் மண்டலம் VI-ல் 1,059) தற்போது போராடி வரும் NULM பணியாளர்களுக்காக ஒதுக்கப்பட்டுள்ளது" என்று மாநகராட்சி அறிவித்தது.
திடக்கழிவு மேலாண்மையை சென்னை மாநகராட்சியே கையாள்வதை விட, தனியார்மயமாக்கல் ஒரு சிறந்த மாதிரி என்பதை நிரூபித்துள்ளதாக இணை ஆணையர் (சுகாதாரம்) வி.பி. ஜெயசீலன் ஏற்கனவே ஊடகங்களில் தெரிவித்தார். . "2025 ஆகஸ்ட் 1 முதல், சில பணியாளர்கள் இந்தப் பணியை ஏற்க மறுத்து, போராட்டங்களை நடத்தி வருகின்றனர். இது மண்டலங்கள் V மற்றும் VI-ல் குப்பை சேகரிப்பில் தற்காலிக இடையூறை ஏற்படுத்தியுள்ளது. இதனால் பொது இடங்கள் பாதிக்கப்பட்டு, சுகாதார அபாயங்கள் ஏற்படக்கூடும்."
சுகாதார பணியாளர்களுக்கு கோரிக்கை
"போராடி வரும் பணியாளர்கள் புதிய அமைப்பில் சேருவதைப் பரிசீலித்தால் இந்தச் சிக்கல் தீர்க்கப்படலாம். புதிய அமைப்பு உறுதியான வேலைவாய்ப்பு, முழு சட்டப் பாதுகாப்பு மற்றும் மேம்படுத்தப்பட்ட நலத்திட்டங்களை வழங்குகிறது. 2000-ம் ஆண்டு முதல் சென்னையில் தனியார் துப்புரவுப் பணிகள் வெளிப்படையான கண்காணிப்பு, விரைவான பொது குறை தீர்வு மற்றும் மூன்று-ஷிப்ட் செயல்பாடுகள் மூலம் வெற்றிகரமாக நிரூபிக்கப்பட்டுள்ளன" என்று அவர் மேலும் கூறினார்.
இதற்கிடையில், தொழிலாளர் சங்கத்திற்கும் சென்னை மாநகராட்சி அதிகாரிகளுக்கும் இடையிலான ஐந்தாம் கட்டப் பேச்சுவார்த்தை தொடர்ந்த போதிலும், எந்தத் தீர்வும் எட்டப்படவில்லை என்று உழைப்போர் உரிமை சங்கத்தின் பொதுச் செயலாளர் எஸ். ஜானகிராமன் தெரிவித்தார். "குறைந்த ஊதியத்தில் மற்றும் வேலைப் பாதுகாப்பு இல்லாமல் பணியாளர்கள் சேரத் தயாராக இல்லை. போராட்டங்கள் தொடரும்" என்று அவர் கூறினார்.
தனியார் நிறுவனம் வேண்டாம்
விடாமல் ராயபுரம் மற்றும் திரு.வி.க. நகர் மண்டலங்களில் துப்புரவுப் பணியாளர்கள் போராட்டம் நடத்தி வருகின்றனர். நேற்று விடாத மழையிலும் அவர்கள் தொடர் போராட்டம் செய்தனர். இந்த போராட்டத்திற்கு சினிமா பிரபலங்கள் சின்மயி, கஸ்தூரி, மதுவந்தி ஆகியோர் கடந்த சில நாட்களாக ஆதரவு தெரிவித்தனர்.
போராட்டத்தில் ஈடுபட்டிருந்த துப்புரவுப் பணியாளர்கள் தரப்பு கூறுகையில், பலர் இலவசமாகவே வீதிகளைச் சுத்தம் செய்யத் தயாராக உள்ளனர். ஆனால் வேலை நிரந்தரத்தை அரசு வழங்க வேண்டும் என்பதால், தனியார் நிறுவனத்தில் சேர மாட்டார்கள் என்றார். அனைத்து சுகாதாரப் பணியாளர்களுக்கும் ஊதியம் ஒரே மாதிரியாக வழங்கப்படும் என்றும், நான்கு மாதங்களுக்குள் ஊதிய திருத்தம் ஏற்படலாம் என்றும் மூத்த மாநகராட்சி அதிகாரி ஒருவர் தெரிவித்தார்.
Click it and Unblock the Notifications
Sign in with Google