அமோனியா கேஸ் கசிவால் இறந்தவர்களின் எண்ணிக்கை 9 ஆக உயர்வு! அரசு மருத்துவமனைகளில் மரண ஓலம்!

Updated: Tuesday, June 23, 2026, 8:52 [IST]

Subscribe to Oneindia Tamil

சென்னை: திருவள்ளூரை அடுத்த பெரியபாளையத்தில் இறால் பதப்படுத்தும் தொழிற்சாலையில் அமோனியா கேஸ் கசிவால் பாதிக்கப்பட்டு இறந்தவர்களின் எண்ணிக்கை 9ஆக உயர்ந்துள்ளது. சென்னை ராஜீவ் காந்தி அரசு மருத்துவமனையில் சிகிச்சை பெற்று வந்த பெண் ஒருவர் இறந்ததால் பலி எண்ணிக்கை உயர்ந்தது.

திருவள்ளூர் மாவட்டம், பெரியபாளையம் அருகே இறால் பதப்படுத்தப்படும் தனியார் நிறுவனத்தில் நேற்று முன் தினம் அமோனியா கசிவு ஏற்பட்டு, 64 பேர் பாதிப்படைந்தனர்.

இதில் 8 பேர் வரை இறந்திருந்த நிலையில், சென்னை ராஜீவ் காந்தி அரசு மருத்துவமனையில் சிகிச்சை பெற்று வந்த பெண் ஒருவர் பலியானதால் பலி எண்ணிக்கை 9ஆக உயர்ந்துள்ளது.

மேலும் இந்த அமோனியா கேஸ் கசிவால் பாதிக்கப்பட்ட தொழிலாளர்கள் ராஜீவ்காந்தி அரசு பொது மருத்துவமனை, ஸ்டான்லி அரசு மருத்துவமனை மற்றும் தனியார் மருத்துவமனைகளில் தீவிர சிகிச்சை பெற்று வருகிறார்கள்.

இறந்தவர்களுக்கு தலா ரூ 2 லட்சம் நிவாரணமாக வழங்கப்படும் என முதல்வர் விஜய் அறிவித்துள்ளார்.

இந்த நிலையில் நேற்று சட்டசபை கூட்டத் தொடர் கூடியது. அப்போது அமோனியா கேஸ் கசிவு குறித்து அமைச்சர் பர்வேஸ் 110- விதியின் கீழ் விளக்கம் அளித்தார்.

அதில் திருவள்ளூரை அடுத்த பெரியபாளையத்தில் உள்ள இறால் பதப்படுத்தும் ஆலையில் பைப் லைனில் இருந்த கோளாறால் அமோனியா வாயு கசிந்தது.

இதை சுவாசித்தவர்கள் மயங்கி விழுந்தனர். பாதிக்கப்பட்டவர்கள் மருத்துவமனையில் அனுமதிக்கப்பட்ட 5 பெண்கள் (நேற்றைய பலி எண்ணிக்கையின்படி)பலியானார். இந்த சம்பவம் குறித்து தகவலறிந்த முதல்வர் விஜய், மனவேதனை அடைந்தார்.

பாதிக்கப்பட்டவர்களின் குடும்பத்தினருக்கு ஆறுதல் தெரிவித்ததுடன் அவர்களின் குடும்பத்தினருக்கு தலா ரூ 2 லட்சம் நிதியுதவி வழங்கப்படுவதாக அறிவித்திருந்தார். மேலும் சம்பவம் குறித்து 3 நாட்களில் விளக்கம் அளிக்கப்படும். இனி வரும் நாட்களில் இது போன்ற சம்பவம் நடைபெறாத வண்ணம் ஆய்வுகள் தொடரும் என பர்வேஸ் தெரிவித்திருந்தார்.

ஆனால் பாதிக்கப்பட்டவர்களை நேரில் சந்தித்த பிரேமலதா, திருமாவளவன் உள்ளிட்டோர், இறந்தவர்களுக்கான ரூ 2 லட்சம் நிவாரணம் போதாது, எனவே அதை உயர்த்தி வழங்க வேண்டும், இறந்தவர்களின் குடும்பத்தில் ஒருவருக்கு அரசு வேலை வழங்க வேண்டும் என தவெக அரசுக்கு கோரிக்கை விடுத்துள்ளனர்.