தாயார் மறைவு..ஓ.பன்னீர் செல்வம் வீட்டிற்கு நேரில் சென்று ஆறுதல் சொன்ன முதல்வர் ஸ்டாலின்

ஓ.பன்னீர் செல்வம் தாயார் மறைவினை அடுத்து நேரில் சென்று ஆறுதல் கூறியுள்ளார் முதல்வரும் திமுக தலைவருமான மு.க. ஸ்டாலின்.

சென்னை: தமிழக முதல்வர் மு.க ஸ்டாலின் இன்று முன்னாள் முதல்வரும் எதிர்கட்சி துணை தலைவருமான ஓ.பன்னீர் செல்வம் வீட்டிற்கு நேரில் சென்று ஆறுதல் கூறினார். ஓ.பன்னீர் செல்வத்தின் தாயார் மறைவினை அடுத்து பசுமை வழிச்சாலையில் உள்ள வீட்டிற்கு சென்று ஆறுதல் தெரிவித்தார் முதல்வர் ஸ்டாலின்.

தமிழக முன்னாள் முதல்வர் ஓ.பன்னீர்செல்வத்தின் தாயார் பழனியம்மாள் நாச்சியார்,வயது 95. வயோதிகம் காரணமாக இவருக்கு கடந்த சில மாதங்களுக்கு முன் உடல் நலக்குறைவு ஏற்பட்டது. கடந்த மாதம் 25ஆம் தேதி பழனியம்மாள் நாச்சியார் உயிரிழந்தார். அவரது மறைவிற்கு அரசியல் கட்சித்தலைவர்கள் பலரும் இரங்கல் கூறினர்.

ஓ பன்னீர் செல்வம் தாயார் மறைவுக்கு தமிழக முதல்வர் மு.க ஸ்டாலின் தனது ட்விட்டர் பக்கத்தில் இரங்கல் தெரிவித்தார். அவரது ட்விட்டர் பதிவில், "முன்னாள் முதலமைச்சர் அண்ணன் ஓ பன்னீர் செல்வம் அவர்களின் தாயார் பழனியம்மாள் அவர்கள் உடல்நலக்குறைவின் காரணமாக மறைவெய்தினார் என்றறிந்து மிகவும் வேதனையடைகிறேன். ஆளாக்கிய அன்னையை இழந்து தவிக்கும் திரு. பன்னீர்செல்வம் அவர்களுக்கு எனது ஆழ்ந்த இரங்கலையும் ஆறுதலையும் தெரிவித்துக் கொள்கிறேன்" என்று பதிவிட்டிருந்தார்.

திமுகவினர் பலர் அன்றைய தினமே ஓ.பன்னீர் செல்வம் வீட்டிற்கு நேரில் சென்று அஞ்சலி செலுத்தினர். கம்பம் ராமகிருஷ்ணன் உள்ளிட்ட திமுகவினர் ஓ.பன்னீர் செல்வம் தாயார் உடலுக்கு அஞ்சலி செலுத்தியதோடு கலங்கி நின்ற ஓ.பன்னீர் செல்வத்திற்கு ஆறுதல் கூறினர்.

எதிரி கட்சியினராக கருதப்பட்ட திமுகவினர் உள்பட பலரும் நேரில் வந்து ஆறுதல் கூறிய நிலையில் அண்ணன் தம்பிகளாக பழகிய முன்னாள் அமைச்சர்கள் யாரும் எட்டிக்கூட பார்க்கவில்லை என்பதுதான் ஓ.பன்னீர் செல்வத்திற்கு அதிக சோகத்தை ஏற்படுத்தியது.

இந்த நிலையில் முதல்வர் மு.க ஸ்டாலின், உதயநிதி ஸ்டாலின் ஆகியோர் பசுமை வழிச்சாலையில் உள்ள ஓ.பன்னீர் செல்வம் வீட்டிற்கு நேரில் சென்று ஆறுதல் கூறினார். மழை பெய்து கொண்டிருந்த நேரத்திலும் முதல்வர் ஸ்டாலின் தனது வீட்டிற்கு நேரில் வந்தது கண்டு ஓ.பன்னீர் செல்வம் நெகிழ்ச்சியடைந்தார்.

English summary

Tamil Nadu Chief Minister M. K. Stalin today visited former Chief Minister and Deputy Leader of Opposition O. Panneer Selvam's house and condoled with him. After the death of O. Panneer Selvam's mother, Chief Minister Stalin visited the house on Pasumai vazhi salai and offered condolences.