"சிம்பு விக்கெட்டை எடுத்தது நான்தான்".. வைரல் ஆகும் முதல்வர் ஸ்டாலின் ஸ்பின் பவுலிங் வீடியோ!

சென்னை: தமிழக முதலமைச்சர் மு.க.ஸ்டாலின் 'Vibe With MKS' நிகழ்ச்சியில், தான் நட்சத்திர கிரிக்கெட்டில் பங்கேற்று நடிகர் சிம்பு உள்ளிட்ட 3 பேரின் விக்கெட்களை வீழ்த்தியதாக கூறியிருந்தார். தற்போது அந்தப் போட்டியில் முதலமைச்சர் ஸ்டாலின் பந்து வீசி விக்கெட் எடுத்த வீடியோக்கள் சமூக வலைதளங்களில் வைரலாகி வருகின்றன.

தமிழ்நாட்டின் இளம் விளையாட்டு வீரர்கள், வீராங்கனைகளுடன் 'Vibe with MKS' என்ற பெயரில் தமிழக முதலமைச்சர் மு.க.ஸ்டாலின் கலந்துரையாடல் நிகழ்வை நடத்தினார். இந்த நிகழ்ச்சி மூலம் தமிழ்நாட்டின் இளம் தலைமுறை விளையாட்டு வீரர்களுடன் முதல்வர் மு.க.ஸ்டாலின் கலந்துரையாடினார். அப்போது விளையாட்டு வீரர்கள் முதல்வர் மு.க.ஸ்டாலினிடம், அவருக்கு பிடித்த விளையாட்டு, இளமைக் காலம், விளையாட்டு மீதான ஆர்வம் உள்ளிட்ட பல்வேறு கேள்விளை எழுப்பினர். கேள்விகளுக்கு புன்னகையுடன் முதல்வர் மு.க.ஸ்டாலின் பதிலளித்தார்.

கிரிக்கெட் தொடர்பாக வீரர்கள் எழுப்பிய கேள்விக்கு பதில் அளித்த முதல்வர் ஸ்டாலின், "எம்சிசி பள்ளியில் படித்த போது ஹாக்கி அணியில் இருந்தேன். ஹாக்கியும் பிடிக்கும். கிரிக்கெட்டும் பிடிக்கும். நான் பள்ளியில் படித்துக்கொண்டிருந்த போது தெருவில் கிரிக்கெட் விளையாடி இருக்கிறேன். எனது தந்தையும் எங்களுடன் விளையாடி இருக்கிறார்.

நான் பவுலர். 'ஆஃப் ஸ்பின்' நன்றாக போடுவேன். நான் தலைவருக்கு பவுலிங் போட்டு இருக்கிறேன். அதேபோல பள்ளியில் 'புக் கிரிக்கெட்' விளையாடுவோம். அந்த அளவுக்கு கிரிக்கெட் மீது நான் ஆர்வமாக இருந்தேன். சேப்பாக்கம் மைதானத்தில் சினிமா நடிகர்கள் விளையாடிய நட்சத்திர கிரிக்கெட் போட்டியிலும் நான் விளையாடி இருக்கிறேன். நான் 3 விக்கெட் எடுத்தேன். டி.ராஜேந்தரின் மகன் நடிகர் சிலம்பரசன் எனது எதிரணி. அவரது விக்கெட், நெப்போலியன் விக்கெட்டையும் நான் எடுத்தேன். இன்னொரு விக்கெட் ஞாபகம் இல்லை." எனக் கூறி இருந்தார்.

திராவிட நாயகரின் விக்கெட் கணக்கு இப்போ தொடங்கினது இல்ல, எப்பவோ தொடங்கினது!

பங்காளிகளும், சங்கிகளும், ஆவலுடன் எதிர்பார்த்த தலைவரின் அசத்தல் பவுலிங் வீடியோ இதோ உங்களுக்காக! 😍🔥

POWERHOUSE @mkstalin 🔥 pic.twitter.com/yg1LFBcNUN

— DMK IT WING (@DMKITwing) December 26, 2025

முதலமைச்சர் ஸ்டாலின் கலந்துரையாடலில் குறிப்பிட்ட அந்த நட்சத்திர கிரிக்கெட் போட்டியின் பழைய வீடியோக்களை நெட்டிசன்கள் தேடிப்பிடித்து சமூக வலைதளங்களில் பகிர்ந்து வருகின்றனர். திமுக ஐடி விங்கும் இந்த வீடியோவை பகிர்ந்துள்ளது. இந்த வீடியோக்கள் தற்போது இணையத்தில் வைரலாகி வருகின்றன.

அந்த வீடியோவில், முதலமைச்சர் ஸ்டாலின், விளையாட்டு சீருடையில் மிகத் துல்லியமாகப் பந்து வீசி விக்கெட்டுகளைச் சரித்துள்ளார். சிம்பு, அனுபம் கெர், நெப்போலியன் ஆகியோரை தனது பவுலிங்கில் சாய்த்துள்ளார் ஸ்டாலின். அவரது ஸ்பின் பவுலிங்கை விளையாட்டு ஆர்வலர்கள் வியந்து பாராட்டி வருகின்றனர்.

English summary

In the ‘Vibe With MKS’ program, Tamil Nadu Chief Minister MK Stalin had mentioned that he participated in a celebrity cricket match and took the wickets of three players, including actor Silambarasan (Simbu). Now, videos of CM Stalin bowling and taking wickets in that match are going viral on social media.