தமிழகத்தில் சொகுசு கப்பல் சுற்றுலா திட்டம்.. தொடங்கி வைத்த முதல்வர்! தண்ணீரில் மிதக்கும் "சொர்க்கம்!"

Updated: Saturday, June 4, 2022, 18:39 [IST]

Subscribe to Oneindia Tamil

சென்னை: சென்னையில் இருந்து ஆழ்கடலுக்கு சென்று திரும்பும் வகையில் சொகுசு கப்பல் சுற்றுலா திட்டத்தை முதலமைச்சர் ஸ்டாலின் இன்று தொடங்கி வைத்தார்.

சொகுசு கப்பல்

சென்னையில் இருந்து 2 நாள் பயணமாக ஆழ்கடல் பகுதிக்கு சென்று திரும்பும் வகையில் சொகுசு கப்பல் சுற்றுலா திட்டத்தை முதலமைச்சர் ஸ்டாலின் இன்று தொடங்கி வைத்துள்ளார். சென்னை துறைமுகத்தில் கொடியசைத்து கப்பலை தொடங்கி வைத்த முதல்வர், கப்பலின் கேப்டன் உள்ளிட்ட உயர் அதிகாரிகளை சந்தித்து பேசினார். கப்பல் இயக்கப்படும் அறைக்கு முதல்வரை அழைத்துச் சென்ற கேப்டன் எவ்வாறு கப்பல் இயக்கப்படும் என்பதை விவரித்தார்.

சுற்றிப்பார்த்தார்

மேலும், கோர்டிலியா குரூஸ் (Cordelia cruise) சொகுசு கப்பலை முழுமையாக சுற்றிப்பார்த்த முதல்வர் ஸ்டாலின் பயணிகளின் பாதுகாப்பு மற்றும் அவர்களுக்கு தேவையான மருத்துவ உதவிகள் உட்பட பல்வேறு விவகாரங்கள் பற்றி கேட்டறிந்தார். சுற்றுலாத்துறை அமைச்சர் மதிவேந்தன் மற்றும் துறையின் உயர் அதிகாரிகள் அது தொடர்பாக விளக்கி எடுத்துக்கூறினார்கள்.

முக்கிய சாதனை

சொகுசு கப்பல் மூலம் ஆழ்கடலுக்கு சென்று திரும்பும் சுற்றுலா திட்டமானது தமிழக வரலாற்றில், குறிப்பாக தமிழக சுற்றுலாத்துறை சாதனைகளில் முக்கியமான ஒன்றாக பார்க்கப்படுகிறது. தமிழகத்தில் அறிமுகமாகியுள்ள சொகுசு கப்பல் சுற்றுலா திட்டத்துக்கு எவ்வளவு கட்டணம் நிர்ணயித்துள்ளது என்ற தகவல் வெளியாகவில்லை.

அதிக வரவேற்பு

ஆழ்கடல் பகுதிக்கு 2 நாள் பயணமாக சொகுசு கப்பலில் சென்று வரும் இந்த சுற்றுலா திட்டத்துக்கு, மக்கள் மத்தியில் முதற்கட்டமாக அமோக வரவேற்பு கிடைத்திருப்பது குறிப்பிடத்தக்கது. முதல் நாளான இன்றே ஆயிரக்கணக்கானோர் அதில் பயணம் செய்ய முன் பதிவு செய்துள்ளனர். கப்பலை கொடியசைத்து தொடங்கி வைக்க வருகை தந்த முதல்வர் ஸ்டாலின், பயணிகளை நோக்கி கையசைத்து பயணம் சிறப்புடன் இருக்க வாழ்த்தினார்.