ஆர்பிஐ முக்கியமான முடிவு.. ரெப்போ ரேட் சரிகிறது.. வீட்டு லோன், கார், பைக் லோனுக்கு EMI குறையுது!

சென்னை: ரெப்போ வட்டி விகிதத்தில் 25 அடிப்படைப் புள்ளிகள் குறைப்பை அறிவிக்க மத்திய ரிசர்வ் வங்கி திட்டமிட்டுள்ளதாக தகவல் வெளியாகி உள்ளது.

பணவீக்கம் கணிசமாகக் குறைந்ததாலும், பொருளாதாரம் வலுவாக வளர்ச்சி அடைவதாலும், இந்திய ரிசர்வ் வங்கி தனது வரவிருக்கும் டிசம்பர் மாத பணவியல் கொள்கைக் கூட்டத்தில் ரெப்போ வட்டி விகிதத்தில் 25 அடிப்படைப் புள்ளிகள் குறைப்பை அறிவிக்க வாய்ப்புள்ளது என கடன் மதிப்பீட்டு நிறுவனமான கேர்எட்ஜ் (CareEdge) செவ்வாய்க்கிழமை வெளியிட்ட அறிக்கை தெரிவித்துள்ளது.

பணவீக்கம் சரிவு

பணவீக்கம் கடந்த அக்டோபரில் 0.3 சதவீதமாக சரிந்துள்ளது. இது கடந்த பத்தாண்டுகளில் இல்லாத குறைந்தபட்ச அளவாகும். ரிசர்வ் வங்கியின் 4 சதவீத இலக்கு வரம்புக்குக் கீழாக உள்ள இந்தச் சரிவு மிக நல்ல பொருளாதார சூழல் ஆகும். இது வட்டி விகிதக் குறைப்பிற்கான கொள்கை வாய்ப்பை உருவாக்குவதாக அறிக்கை சுட்டிக்காட்டியுள்ளது. தற்போது ரெப்போ விகிதம் 5.5 சதவீதமாக உள்ளது.

இதையடுத்து இந்திய ரிசர்வ் வங்கி (RBI) வரும் டிசம்பர் மாதத்தில் தனது முக்கிய கொள்கை வட்டி விகிதத்தை 25 அடிப்படைப் புள்ளிகள் (bps) குறைக்கக்கூடும் என்று எதிர்பார்க்கப்படுகிறது. இந்த நடவடிக்கை மூலம், ரெப்போ விகிதம் தற்போதுள்ள 5.50% இலிருந்து 5.25% ஆகக் குறையும்.

இந்த வட்டி விகிதக் குறைப்புக்கு முக்கியக் காரணம், இந்தியாவில் பணவீக்கம் கணிசமாகக் குறைந்திருப்பதுதான். குறிப்பாக, அக்டோபர் 2025 இல் சில்லறைப் பணவீக்கம் சுமார் 0.25% ஆகப் பதிவாகி, கடந்த 10 ஆண்டுகளில் இல்லாத மிகக் குறைந்த நிலையை எட்டியுள்ளது.

அதேவேளை, நாட்டின் பொருளாதாரம் தொடர்ந்து வலுவாகவே உள்ளது. 2025-26 நிதியாண்டின் இரண்டாம் காலாண்டில், இந்தியாவின் மொத்த உள்நாட்டு உற்பத்தி (GDP) 8.2% ஆக உயர்ந்துள்ளது. குறைந்த பணவீக்கம் மற்றும் வலுவான வளர்ச்சி ஆகிய இரண்டும் இணைந்து, 25 அடிப்படைப் புள்ளிகள் வட்டி விகிதக் குறைப்பு சாத்தியம் எனப் பல பொருளாதார வல்லுநர்களை நம்பச் செய்துள்ளது.

வட்டி குறைப்பு

இத்தகைய வட்டி குறைப்பு, கடன் பெறுவதை மலிவாக்கும். வங்கிக் கடன்கள் மற்றும் வீட்டுக் கடன்கள் போன்றவை வாங்க எளிதாக மாறும். இது முதலீட்டையும், நுகர்வோர் செலவினங்களையும் ஊக்குவித்து, வணிகங்களுக்கும், குறிப்பாகக் கடன் தேவைப்படும் தனிநபர்களுக்கும் பெரிதும் பயனளிக்கும்.

எனினும், தற்போதைய பொருளாதார வளர்ச்சி வலிமையாக இருப்பதால், ரிசர்வ் வங்கி இப்போதைக்கு அவசரப்படாமல் காத்திருக்கலாம் என்றும் சில ஆய்வாளர்கள் எச்சரிக்கின்றனர். வட்டி விகிதக் குறைப்பு குறித்த இறுதி முடிவு, வரும் வாரங்களில் பணவீக்கம் மற்றும் ஒட்டுமொத்த வளர்ச்சியின் போக்குகளைப் பொறுத்தே அமையும்.

எப்போது வரும்

இந்த அதிகாரப்பூர்வ அறிவிப்பு அக்டோபரில் வெளியாகும் என்று தகவல்கள் வந்தன. ஆனால் தற்போது டிசம்பர் அல்லது ஜனவரியில் இந்த அறிவிப்பு வெளியாகும் என்ற தகவல் வெளியாகி உள்ளது.

ஏற்கனவே மூன்று முறை வட்டி விகிதங்கள் குறைக்கப்பட்ட நிலையில், ஒரு சிறிய இடைவெளிக்குப் பிறகு இந்த நான்காவது குறைப்பு நிகழ்கிறது. அக்டோபரில் அறிவிப்பு வெளியாகும் என்று எதிர்பார்க்கப்பட்டது. ஆனால் ஆர்பிஐ கூட்டத்தில் இதற்கான அறிவிப்பு வெளியாகவில்லை. ரிசர்வ் வங்கியின் இந்தச் செயலைத் தொடர்ந்து, பல வங்கிகளும் தங்கள் கடன் வட்டி விகிதங்களைக் குறைக்கும். இதனால், வீட்டுக் கடன் மற்றும் சிறு வணிகக் கடன்களுக்கான வட்டி குறையும் வாய்ப்புள்ளது. வாகன கடன்களுக்கான வட்டியும் குறையும் என்பது குறிப்பிடத்தக்கது.

English summary

collage for home RBI may cut the Repo Rate says a major report: EMI will go down