பாஜகவை விமர்சிப்பது ஏன்?.. எம்.பி தம்பிதுரை விளக்கம்!

பாஜகவை பற்றி விமர்சிப்பது என்னுடைய தனிப்பட்ட கருத்து என்று அதிமுகவை சேர்ந்த தம்பிதுரை எம்.பி. தெரிவித்துள்ளார்.

சென்னை: பாஜகவை பற்றி விமர்சிப்பது என்னுடைய தனிப்பட்ட கருத்து என்று அதிமுகவை சேர்ந்த தம்பிதுரை எம்.பி. தெரிவித்துள்ளார்.

கடந்த சில நாட்களாக அதிமுக எம்.பியும் மக்களவை துணை தலைவருமான தம்பிதுரை பாஜகவை தொடர்ச்சியாக விமர்சித்து வந்தார். பாஜக அதிமுகவை அடிமை போல நடத்துகிறது என்று கூறினார். இதற்கு பாஜகவினரும் பதில் அளித்து வந்தனர்.

இதனால் பாஜக அதிமுக நட்பில் சிறிய விரிசலும் ஏற்பட்டது. இந்த நிலையில் பாஜகவை விமர்சிப்பது தம்பிதுரையின் தனிப்பட்ட கருத்து என அமைச்சர் ஜெயக்குமார் கூறி, பிரச்சனைக்கு முற்றுப்புள்ளி வைத்தார். ஜெயக்குமாரின் கருத்துக்கு தற்போது தம்பிதுரை விளக்கம் அளித்துள்ளார்.

அதில், பாஜகவின் கொள்கைகளுடன் முரண்படும் நேரத்தில் நான் அந்தக்கட்சியை விமர்சிக்கிறேன். பாஜக அதிமுகவின் எம்எல்ஏக்களை, தலைவர்களை நடத்தும் விதம் சரியில்லை. பாஜக உடன் இன்னும் கூட்டணி குறித்து பேசவில்லை.

பாரதீய ஜனதா கட்சியுடன் அதிமுக கூட்டணி வைத்திருக்கிறது என்று யார் சொன்னது?. தேர்தல் தேதி அறிவிக்கப்பட்ட பின் தேவைப்பட்டால் மெகா கூட்டணி அமைக்கப்படும். அதுகுறித்து இப்போது முடிவு செய்யமுடியாது.

மறைந்த முதல்வர் ஜெயலலிதா எந்த வழியை வகுத்தாரோ, அந்த வழியில் நாங்கள் சென்று கொண்டு இருக்கிறோம். தேர்தலின் போது கூட்டணி குறித்து பேசி முடிவெடுப்போம். இன்னும் தேர்தல் தேதியை அறிவிக்கப்படவில்லையே.

பாஜகவை நான் விமர்சிப்பது என்னுடைய தனிப்பட்ட கருத்து. இதை ஒட்டுமொத்த அதிமுகவின் கருத்தாக எடுத்துக்கொள்ள கூடாது. என்னுடைய கருத்தை நான் கூறுகிறேன் என்று தம்பிதுரை கூறியுள்ளார்.

English summary

Commenting on BJP is my own personal choice says, AIADMK MP M. Thambi Durai.