விஜயின் முயற்சி வெற்றி பெற வாழ்த்து! முதல் ஆளாக முந்திக்கொண்ட காங்கிரஸ்!

சென்னை: தமிழ்நாட்டில் திமுக -காங்கிரஸ் தொகுதி பங்கீடு பேச்சுவார்த்தையில் இழுபறி நீடித்து வரும் நிலையில், தமிழக வெற்றி கழகம் என்ற பெயரில் அரசியல் கட்சி தொடங்கும் விஜய்க்கு காங்கிரஸ் முதல் ஆளாக முந்திக்கொண்டு வாழ்த்துக் கூறியுள்ளது.

அரசியல் கட்சியை ஏன் தொடங்குகிறோம் என்பதற்கான விஜயின் விளக்கம் தமிழக அரசியலில் ஆரோக்கியமான சூழல் உருவாக உதவும் என காங்கிரஸ் புகழ்ந்துள்ளது. 12 ஆண்டுகளுக்கு முன்னர் ராகுல் காந்தியும், விஜயும் சந்தித்து பேசியது இங்கே நினைவுகூரத்தக்கது.

இது குறித்து தமிழக காங்கிரஸ் கமிட்டி தலைவர் கே.எஸ்.அழகிரி விடுத்துள்ள பதிவு வருமாறு;

''திரைப்படத்துறையில் செல்வாக்குமிக்கவராக கலைப்பணி ஆற்றும் திரு. விஜய் அவர்கள் தமிழக வெற்றி கழகம் என்ற பெயரில் அரசியல் கட்சி தொடங்கும் அறிவிப்பை வெளியிட்டிருப்பதை வாழ்த்தி வரவேற்கிறேன். மக்களைப் பிளவுபடுத்துகிற அரசியலுக்கு எதிராகவும், மக்களின் வளர்ச்சிக்கு தடையாகவும் இருக்கிற சக்திகளுக்கு எதிராக அவர் கருத்து கூறியிருப்பது மிகுந்த மகிழ்ச்சியைத் தருகிறது.''

''பிறப்பொக்கும் எல்லா உயிருக்கும் என்று சுட்டிக்காட்டி அனைவரும் பிறப்பால் சமம் என்ற கருத்தை அவர் வலியுறுத்தியிருப்பது இன்றைய அரசியல் சூழலில் மிகவும் முக்கியத்துவம் வாய்ந்தது. அரசியல் கட்சியை ஏன் தொடங்குகிறோம் என்பதற்கான அவரது விளக்கம் தமிழக அரசியலில் ஆரோக்கியமான சூழல் உருவாக உதவும் என்று நம்புகின்றேன். அவரது முயற்சி வெற்றி பெற வாழ்த்துகிறேன். '' இவ்வாறு அவர் தெரிவித்துள்ளார்.

கே.எஸ்.அழகிரியிடம் இருந்து வாழ்த்து வந்த பிறகு அமைச்சர் உதயநிதி ஸ்டாலினும் விஜயின் அரசியல் பிரவேச அறிவிப்பை வரவேற்று ஒரு பதிவு வெளியிட்டார்.

English summary

Congress has been the first to congratulate Vijay for starting a political party named Tamilaga Vetri Kazhagam.