காங்கிரஸ் வேட்பாளர் தேர்வில் பெரும் முறைகேடு.. சர்வே என்ற பெயரில் ஊழல்.. ஜோதிமணி பரபர குற்றச்சாட்டு

Updated: Friday, May 29, 2026, 10:56 [IST]

Subscribe to Oneindia Tamil

சென்னை: தமிழ்நாடு சட்டசபைத் தேர்தலில் காங்கிரஸ் கட்சியின் தொகுதி மற்றும் வேட்பாளர் தேர்வில் மிகப்பெரிய முறைகேடுகள் நடந்துள்ளதாக கரூர் எம்.பி ஜோதிமணி கடுமையாக குற்றஞ்சாட்டியுள்ளார். "சர்வே என்ற பெயரில் ஊழல் நடந்துள்ளது" என அவர் பகிரங்கமாக விமர்சித்திருப்பது அரசியல் வட்டாரத்தில் பரபரப்பை ஏற்படுத்தியுள்ளது.

இது தொடர்பாக ஜோதிமணி எம்பி கூறியிருப்பதாவது:- தமிழ்நாடு சட்டமன்றத் தேர்தலில் காங்கிரஸ் கட்சியின் தொகுதித் தேர்வு மற்றும் வேட்பாளர் தேர்வில் மிகப்பெரிய முறைகேடு நடந்துள்ளது. வேட்பாளர்களைத் தேர்வு செய்த பிறகு அதற்குத் தகுந்தது போல தொகுதிகள் கேட்டுப் பெறப்பட்டுள்ளன. சர்வே என்ற பெயரில் மிகபெரிய ஊழல் நடைபெற்றுள்ளது.

Congress MP Jothimani accuses own party leaders alleges corruption in candidate selection

ஜோதிமணி எம்பி கடும் குற்றச்சாட்டு

கட்சிக்கு நீண்டகாலம் பணியாற்றியவர்களை, வெற்றி வாய்ப்பு உள்ளவர்களை முற்றிலும் புறக்கணித்துவிட்டு, புதியவர்கள், வெற்றி வாய்ப்பில்லாத பலருக்கு தொகுதிகள் கேட்டுப்பெறப்பட்டு வாய்ப்பளிக்கப்பட்டுள்ளது. தேரதலில் போட்டியிட வாய்ப்பு பெற்ற சிலர் தேர்தல் முடிந்து சில நாட்களுக்குள் கட்சியில் இருந்து விலகுகின்றனர் அல்லது ஒதுங்கிவிட்டனர்.

இவர்களுக்கெல்லாம் வாய்ப்பு வழங்கியது யார்? எதனடிப்படையில் இவர்களுக்கு வாய்ப்பு வழங்கப்பட்டது? தவறு செய்தவர்கள் மீது எடுக்கப்பட்ட நடவடிக்கை என்ன? தொகுதித் தேர்வு மற்றும் வேட்பாளர் தேர்வு குறித்து விசாரணை நடத்தாமல், தேர்தலில் கட்சி விரோத நடவடிக்கைகளை மட்டும் விசாரிக்க கமிட்டி அமைப்பது தவறு செய்தவர்கள் தப்பித்துக் கொள்வதற்கான ஒரு ஏற்பாடு மட்டுமே.

தவறு செய்தவர்கள் காப்பாற்றப்படுகிறார்கள்

காங்கிரஸ் கட்சி உண்மையிலேயே தன்னை சீரமைத்துக் கொள்ள விரும்பினால் தமிழ்நாடு சட்டமன்ற தேர்தல் தொடர்பான விசாரணையை முறையாக நடத்த வேண்டும். தவறு செய்தவர்கள் மீது கடும் நடவடிக்கை எடுக்க வேண்டும். அப்பொழுதுதான் கட்சித் தொண்டர்களின் நம்பிக்கையைப் பெற முடியும். பல்வேறு மாநிலத் தேர்தல்களில் தொகுதி மற்றும் வேட்பாளர் தேர்வு தொடர்பாக குற்றச்சாட்டுகள் எழுகிறது.

சில நேரங்களில் இதுவும் தோல்விக்கு ஒரு காரணமாக அமைகிறது. ஆனால் விசாரணை செய்வதற்குப் பதிலாக தவறு செய்தவர்கள் காப்பாற்றப்படுகிறார்கள். தமிழ்நாடு வேட்பாளர் தேர்வை மிக அருகில் பார்த்தபோது மிகவும் அதிர்ச்சியாக இருந்தது. இவ்வளவு வெளிப்படையாகய் தவறுகள் நடப்பது கட்சியின் எதிர்காலத்திற்கு மிகபெரிய பின்னடைவாக அமையும்.

Recommended For You

“காங்கிரஸ், கம்யூனிஸ்ட்களை விமர்சிக்க அவர்களுக்கு துணிச்சல் இல்லை”.. திருமாவளவன் அட்டாக்!

இந்த நாட்டை பாஜக நரேந்திர மோடியிடம் இருந்து காப்பாற்ற வேண்டிய வரலாற்றுக் கடமை காங்கிரஸ் கட்சிக்கு உள்ளது. தலைவர் திரு. ராகுல்காந்தி அவர்கள் எவ்வித சமரசமும் இல்லாமல் போராடி வருகிறார். ஆனால் கட்சிக்குள் நடக்கும் இதுபோன்ற தவறுகள் காங்கிரஸ் கட்சித் தொண்டர்களின் நம்பிக்கையை குலைத்து வருகிறது. நாம் ஒரு வலிமையான எதிர்க்கட்சியாக களத்தில் நின்று போராடி வெற்றிபெற வேண்டுமானால் கட்சிக்குள் தொண்டர்கள் மாவட்ட, வட்டார தலைவர்களின் குரலுக்கு மதிப்பு இருக்க வேண்டும்.

நேர்மையோடும், வெளிப்படைத் தனமையோடும், கட்சி செயல்பட வேண்டும். காங்கிரஸ் கட்சிக்குள் செய்யப்பட வேண்டிய தேர்தல் சீர்திருத்தம் தமிழ்நாட்டில் இருந்து துவங்கட்டும்" என்று கூறியுள்ளார்.

முறைகேடு நடைபெற்று இருப்பதாக

தமிழக சட்டசபை தேர்தலில் காங்கிரஸ் கட்சி திமுகவுடன் கூட்டணி அமைத்து போட்டியிட்டது. இதில் தொகுதி பங்கீடு செய்வதில் நீண்ட இழுபறி ஏற்பட்டது. நீண்ட நெடிய போராட்டத்திற்கு பிறகே திமுக காங்கிரஸ் கூட்டணியில் உடன்பாடு ஏற்பட்டது. இதிலும் சில தரப்பினர் விஜய்க்கு ஆதரவாகவும், சிலர் திமுகவுக்கு ஆதரவாகவும் செயல்பட்டதாக கட்சிக்குள் அதிகம் பேசப்பட்டது.
இன்னொரு பக்கம், தமிழக காங்கிரஸ் கமிட்டி தலைவர்களை தேர்தலுக்கு முன்பாகவே ஜோதிமணி விமர்சித்து இருந்தார். வேட்பாளர் தேர்வில் வெளிப்படைதன்மை இல்லை என்ற ரீதியில் ஜோதிமணி விமர்சித்த நிலையில், தற்போது வெளிப்படையாகவே முறைகேடு நடைபெற்று இருப்பதாக குற்றம் சாட்டியுள்ளார்.

ஜோதிமணியின் இந்த குற்றச்சாட்டு தமிழக காங்கிரஸ் வட்டாரத்தில் புயலை கிளப்பியுள்ளது. தமிழக காங்கிரஸ் கமிட்டியின் தலைவர் விரைவில் மாற்றப்படலாம் என்று கட்சியினர் மத்தியில் பேசப்படும் நிலையில், ஜோதிமணி இந்த புது குண்டை தூக்கி வீசியுள்ளார்.