புலி வருது கதை நிஜமாச்சே.. காங்கிரஸை விட்டு பாஜகவுக்கு ஓடிப் போன விஜயதாரணி.. அப்படி வசனம் பேசுனாரே!

சென்னை: காங்கிரஸ் கட்சியை விட்டு வெளியேறி பாஜகவில் இணைந்துவிட்டார் விளவங்கோடு எம்.எல்.ஏ. விஜயதாரணி (விஜயதரணி). ஒவ்வொரு சட்டசபை, லோக்சபா தேர்தலுக்கும் விஜயதாரணி கட்சி மாறுவார் என யூகங்களாக சொல்லப்பட்டதை 2019 லோக்சபா தேர்தலில் உண்மை என பாஜகவுக்கு தாவி நிரூபித்துவிட்டார் விஜயதாரணி.

விளவங்கோடு சட்டசபை தொகுதியில் 3 முறை காங்கிரஸ் வேட்பாளராகப் போட்டியிட்டு வென்றவர் விஜயதாரணி. கவிமணி தேசிக விநாயகம் பிள்ளை குடும்பத்தைச் சேர்ந்தவர். கவிமணி தேசிக விநாயகம் பிள்ளையில் பேத்தி விஜயதாரணி.

அதிமுக-தமாகா இடையே ஊசலாடிய விஜயதாரணி: 2016 சட்டசபை தேர்தலுக்கு முன்னதாக தமிழ்நாடு மகிளா காங்கிரஸ் தலைவராக இருந்தார் விஜயதாரணி. அவருக்கும் அப்போதைய தமிழ்நாடு காங்கிரஸ் கமிட்டித் தலைவர் இளங்கோவனுக்கும் இடையே மோதல் வெடித்தது. இதனால் அவரது மகிளா காங்கிரஸ் தலைவர் பறிக்கப்பட்டது. அந்த சூழ்நிலையில் விஜயதாரணி, அண்ணா திமுகவுக்கு தாவுவார்.. தமிழ் மாநில காங்கிரஸுக்குப் போய்விடுவார் என கூறப்பட்டது. அப்போது ஜெயலலிதாவை நேரில் சந்தித்தும் பேசியிருந்தார் விஜயதாரணி. இதனால் அதிமுக வேட்பாளராகப் போகிறார் என்றெல்லாம் கூறப்பட்டது. ஆனாலு காங்கிரஸ் கட்சியின் வேட்பாளராக விளவங்கோட்டில் போட்டியிட்டு மீண்டும் வென்றார்.

2021-ல் பரபரப்பை கிளப்பிய விஜயதாரணி: கடந்த 2021-ம் ஆண்டு சட்டசபை தேர்தலின் போதும் கூட விஜயதாரணி, பாஜகவுக்கு தாவுகிறார் என செய்திகள் பரவின. ஆனால் அப்போது திட்டவட்டமாக மறுத்த விஜயதாரணி, என்னுடைய குழந்தை பருவம் முதலே காங்கிரஸில்தான் இருக்கிறேன். ப.சிதம்பரம் அலுவலகத்தில் ஜூனியராக இருந்தேன். அப்போது தனி கட்சியை நடத்தி வந்தார் சிதம்பரம். அந்த தருணத்தில் கூட ப.சிதம்பரம் கட்சியில் சேராமல் காங்கிரஸில்தான் இருந்தேன். ஒவ்வொரு தேர்தலுக்கு என்னைப் பற்றி இப்படி காங்கிரஸ் உள்ளேயும் தொகுதியை சேர்ந்த எதிர்க்கட்சிகளும் வதந்தி கிளப்புகிறார்கள். நான் காங்கிரஸை விட்டே போகமாட்டேன் என்றார். அந்த தேர்தலிலும் விளவங்கோடு தொகுதியில் போட்டியிட்டு மீண்டும் காங்கிரஸ் எம்.எல்.ஏவானார்.

பதவி கிடைக்காத விரக்தி?: 2021 சட்டசபை தேர்தலுக்கு பின்னர் சட்டசபை காங்கிரஸ் குழு தலைவர் பதவி, தமிழ்நாடு காங்கிரஸ் தலைவர் என பலவற்றுக்கும் முட்டி மோதிக் கொண்டே இருந்தார் விஜயதாரணி. ஆனால் அவருக்கு எந்த ஒரு பதவியும் கிடைக்கவில்லை. இதனால் அண்மைகாலமாக விஜயதாரணி, பாஜக பக்கம் போகிறார்; அவருக்கு டெல்லி மேலிடம் சிக்னல் கொடுத்துவிட்டது என கூறப்பட்டது. இதனை திட்டவட்டமாக விஜயதாரணி மறுக்காமலும் இருந்து வந்தார். ஒவ்வொரு தேர்தலின் போதும் யூகங்களாக பேசப்பட்டதை இம்முறை காங்கிரஸில் இருந்து பாஜகவுக்கு தாவி உண்மை என நிரூபித்தே விட்டார்.. ஆம் புலி வருது கதையாகவே மாறிவிட்டது விஜயதாரணியின் கட்சி தாவல்!

விளவங்கோடும் விஜயதாரணியும்: 2011-ம் ஆண்டு சட்டசபை தேர்தலில் முதன் முதலில் விளவங்கோடு தொகுதியில் போட்டியிட்ட விஜயதாரணி 43.69% வாக்குகளைப் பெற்றார். அவரை எதிர்த்து போட்டியிட்ட சிபிஎம் கட்சியின் லீமாரோஸ் 27.17% வாக்குகளைப் பெற்றிருந்தார். 2016-ம் ஆண்டு சட்டசபை தேர்தலில் 2-வது முறையாக மீண்டும் விளவங்கோடு தொகுதியில் களமிறங்கிய விஜயதாரணி, 42.73% வாக்குகளைப் பெற்றார். விளவங்கோடு தொகுதியில் 2-வது இடத்தைப் பெற்ற பாஜக வேட்பாளர் தர்மராஜ் 22.14%
வாக்குகளைப் பெற்றார். 2021 சட்டசபை தேர்தலில் 3-வது முறையாக களத்தை சந்தித்த விஜயதாரணி 52.12% வாக்குகளையும் அவரை எதிர்த்து போட்டியிட்ட பாஜகவின் ஜெயசீலன் 35.04% வாக்குகளையும் பெற்றார். 2026 சட்டசபை தேர்தலில் விளவங்கோடு தொகுதியில் பாஜக வேட்பாளராக களமிறங்கி வெற்றியை விஜயதாரணி அறுவடை செய்வாரா? என்பதை காலம்தான் சொல்லும்.

English summary

Congress party Shocked over Tamil Nadu party MLA Vijayadharani joined BJP today.