மாநில அரசுகளை கலைக்கும் 356-வது பிரிவு நீக்கம்..திமுக தேர்தல் அறிக்கைக்கு எதிராக சிபிஎம் வாக்குறுதி!

சென்னை: மக்களால் தேர்ந்தெடுக்கப்பட்ட மாநில அரசுகளைக் கலைக்க வகை செய்யும் அரசியல் சாசனத்தின் 356-வது பிரிவு ரத்து செய்யப்பட வேண்டும் என்பது திமுகவின் தேர்தல் வாக்குறுதி. ஆனால் திமுக கூட்டணி கட்சியான சிபிஎம், 356-வது பிரிவில் மாற்றங்கள் செய்ய வேண்டும் என தேர்தல் அறிக்கையில் தெரிவித்திருப்பது விவாதங்களாகி இருக்கிறது.

தமிழ்நாட்டில் திமுக அரசு, எமர்ஜென்சியை எதிர்த்த போது ஈழத் தமிழரை ஆதரித்த போதும் 356-வது பிரிவின் கீழ் மத்திய அரசால் கலைக்கப்பட்டது. மத்தியில் ஆளும் அரசானது நினைத்த நேரத்தில் மாநில அரசுகளைக் கலைக்கக் கூடிய ஆயுதமாகவே 356-வது பிரிவு இருந்து வந்தது.

ஆனால் உச்சநீதிமன்றத்தின் கடுமையான தீர்ப்புகளால்தான் அண்மை காலமாக 356-வது பிரிவு பயன்படுத்தப்படாமல் இருக்கிறது. இருப்பினும் மாநில அரசுகளை 356-வது பிரிவை பயன்படுத்தி கலைக்க வேண்டும் என்ற கோரிக்கையை பல அரசியல் கட்சிகள் அரசியல் ஆதாயங்களுக்காக முன்வைக்கின்றன. இதனால் மாநில அரசுகளுக்கு தலைக்கு மேல் தொங்கும் கத்தியாகவே 356-வது பிரிவு இருந்து வருகிறது.

அரசியல் சாசனத்தின் 356-வது பிரிவு அறவே நீக்கப்பட வேண்டும்- ரத்து செய்யப்பட வேண்டும் என்பது திமுக, அதிமுக உள்ளிட்ட தமிழ்நாட்டு அரசியல் கட்சிகளின் பொதுவான கருத்து. தற்போதைய லோக்சபா தேர்தலுக்கான தேர்தல் அறிக்கையில் 356-வது பிரிவை நீக்க வேண்டும் என திமுக, அதிமுக, நாம் தமிழர் கட்சிகள் வாக்குறுதி அளித்துள்ளன.

ஆனால் தமிழ்நாட்டின் சிபிஎம் கட்சி வெளியிட்ட தேர்தல் அறிக்கை, அதன் கூட்டணி கட்சியான திமுகவின் தேர்தல் அறிக்கைக்கு முரண்பாடாக உள்ளது. திமுகவின் தேர்தல் அறிக்கையில், மக்களால் தேர்ந்தெடுக்கப்பட்ட மாநில அரசுகளைக் கலைத்திட வழிவகுக்கும் அரசியலமைப்புச் சட்டப் பிரிவு 356-ஐ அகற்றிட திமுக தொடர்ந்து வலியுறுத்தும் என வாக்குறுதி அளிக்கப்பட்டுள்ளது.

ஆனால் சிபிஎம் கட்சியின் தேர்தல் அறிக்கையிலோ, பிரிவு 356 ஐ பொருத்தமான ஏற்பாட்டைக் கொண்டு மாற்றுவது; மேலும் அதைத் தவறாகப் பயன்படுத்துவதைத் தடுக்க, பிரிவு 355 இல் உரிய திருத்தம் செய்வது என பொத்தாம் பொதுவாக வாக்குறுதி அளித்துள்ளது. அதாவது 356-வது பிரிவை ரத்து செய்யாமல் மாற்றம் செய்வது என்கிற ஒரு நிலைப்பாட்டை சிபிஎம் வாக்குறுதியாக தந்திருப்பது விவாதமாகி இருக்கிறது.

English summary

CP(I)M opposed DMK's Stand on Article 356 should be abolish.